ខេត្ដស្វាយរៀង ៖ នៅព្រឹកថ្ងៃទី៦ មិថុនា ឆ្នាំ២០១០ លោកវ៉ាន់ ប៊ុនធឿន តំណាងកាសែតកោះសន្ដិភាពបាននាំយកអំណោយសប្បុរសជនចំនួន១០ដុល្លារទៅជូនលោកយាយកែវ អៀម អាយុ៨៤ឆ្នាំ នៅភូមិសង្កែ ឃុំឈើទាល ស្រុកស្វាយជ្រំ ដែលត្រូវឪម៉ាល់ទិចចំនួន៥០មេ តែមិនស្លាប់ ដោយក្រុមគ្រូពេទ្យជួយសង្គ្រោះទាន់ពេលវេលា ។ ប្រាក់អំណោយនេះ គឺជាការផ្ដល់ជូនលើកទី២របស់លោកអ៊ុក នាង មន្ដ្រីនគរបាលចូលនិវត្ដន៍មានអាសយដ្ឋានផ្ទះលេខ១០៦E1z ផ្លូវលេខ៥៣ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ។
ជាមួយគ្នានេះលោកយាយបានប្រាប់ កោះសន្ដិភាពទៀតថា កាលពីថ្ងៃទី៥ មិថុនា លោកស្រីស្វាយ បុបា្ព និងក្រុមការងាររបស់ អង្គការ CMAC បានរៃអង្គាសបុគ្គលិកចំនួន ៥២នាក់បានប្រាក់ចំនួន៣២៣.៧០០រៀល និង៣៦ដុល្លារ មកឧបត្ថម្ភលោកយាយ ដើម្បីព្យាបាលជំងឺ ។ លោកស្រីស្វាយ បុបា្ព បានប្រាប់លោកយាយថា ដោយលោកស្រីបានអានកាសែតកោះសន្ដិភាពកាលពីថ្ងៃទី២៦ ឧសភា ឆ្នាំ២០១០ ក៏មានការអាណិតអាសូរ ហើយរៃអង្គាសបុគ្គលិក៥២នាក់ប្រមូលថវិកាមកឧបត្ថម្ភយាយ ។
លោកយាយកែវ អៀម ត្រូវឪម៉ាល់ទិចចំនួន៥០មេ តាំងពី ថ្ងៃទី៩ ឧសភា ២០១០មក គឺជិតមួយខែមកហើយ តែលោកយាយនៅតែមានរបួសស្លាកស្នាមពេញទាំងខ្លួន និងដៃជើងពុំទាន់ជាស្រួលបួលនៅឡើយទេ ហើយលោក យាយសែនត្រេកអរយ៉ាងខ្លាំងដែលមានសប្បុរសជនបានជួយឧបត្ថម្ភជាបន្ដបន្ទាប់យ៉ាងសន្ធឹកសន្ធាប់ដែលលោកយាយពុំនឹកស្មានដល់ ។
លោកយាយបានលើកម្រាមដៃដប់សំពះជូនពរដល់សប្បុរសជនទាំងអស់ ជាពិសេស ដល់លោកឧកញ៉ាអភិបាលកាសែតកោះសន្ដិភាព និងសហការីទាំងអស់ដែលបាន ចុះផ្សាយពីទុក្ខវេទនារបស់លោកយាយដល់សប្បុរសជនបានដឹង និងជួយទាន់ពេលវេលា សូមលោកលោកស្រីសប្បុរសជនទាំងអស់ជួបតែពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមឱ្យមានប្រាជ្ញាឈ្លាសវៃប្រកបការរកស៊ីឱ្យបានកាក់កបរីកចំរើនគ្រប់ៗគ្រួសារ ។
ចែករំលែកព័តមាននេះ