ប្រាក់អឺរ៉ូឡើងថ្លៃខ្ពស់ដល់ទៅ១៨សប្តាហ៍ធៀបនឹងប្រាក់ដុល្លារកាលពីថ្ងៃអង្គារមុនពេលការសម្រេចស្តីពីការស្របនឹងរដ្ឋធម្មនុញ្ញនៃមូលនិធិប្រាក់សង្គ្រោះតំបន់ចាយប្រាក់អឺរ៉ូ ។ តុលាការរដ្ឋធម្មនុញ្ញអាល្លឺម៉ង់នឹងសម្រេចចិត្តនៅថ្ងៃពុធថាតើយន្តការស្ថិរភាពអឺរ៉ុបត្រឹមត្រូវតាមច្បាប់រដ្ឋធម្មនុញ្ញអាល្លឺម៉ង់ដែរឬយ៉ាងណា? កាលពីថ្ងៃអង្គាររដ្ឋមន្ត្រីហិរញ្ញវត្ថុអាល្លឺម៉ង់និយាយថា លោកសង្ឃឹមថា តុលាការនឹងចេញសេចក្តីសម្រេចគាំទ្រអឺរ៉ុប ហើយតុលាការក៏នឹងអះអាងថាខ្លួននឹងមិនពន្យារពេលការសម្រេចនេះទេ ។
ប្រាក់ដុល្លារមានតម្លៃ១,២៨៦២ដុល្លារធៀបនឹងប្រាក់អឺរ៉ូចាប់តាំងពីថ្ងៃទី១៤ សីហា ហើយមកដល់ថ្ងៃអង្គារនេះវាមានតម្លៃ១,២៨៧២ដុល្លារក្នុង១អឺរ៉ូ ។ បើគិតពីដើមខែសីហាមក ប្រាក់អឺរ៉ូឡើងថ្លៃ៦%ធៀបនឹងប្រាក់ដុល្លារក្រោយពីធនាគារកណ្តាលអឺរ៉ុបបានខ្នះខ្នែងបន្ធូរបន្ថយវិបត្តិហិរញ្ញវត្ថុនៅក្នុងបណ្តាលប្រទេសចាយប្រាក់អឺរ៉ូមួយចំនួនមានដូចជាអេស្ប៉ាញ និងអីុតាលីជាដើម ។ កាលពីសប្តាហ៍មុននេះ ធនាគារកណ្តាលបានចេញសំណើមួយដោយទិញសញ្ញាប័ណ្ណគ្មានដែនកំណត់ក្នុងបណ្តាប្រទេសមួយចំនួនប្រសិនបើប្រទេសទាំងនោះស្នើសុំជំនួយ។
ប្រាក់ដុល្លារក៏ធ្លាក់ចុះដែរធៀបនឹងប្រាក់យ៉េនជប៉ុន ដែលកាលពីថ្ងៃចន្ទ១ដុល្លារប្តូរបាន៧៧,៧៨យ៉េន ។ ចំណែកប្រាក់ដុល្លារអូស្ត្រាលីក៏ឡើងថ្លៃដែរ ធៀបនឹងប្រាក់ដុល្លារអាមេរិកដោយក្នុង១ដុល្លារអូស្ត្រាលីប្តូរបាន១,០៤៤៧ដុល្លារអាមេរិក ៕
ចែករំលែកព័តមាននេះ