រាជធានីភ្នំពេញ ៖ តាមរយៈកោះសន្តិភាពស្ត្រីឈ្មោះប៉ូ រី អាយុ៤៧ឆ្នាំ ស្នាក់នៅផ្ទះជួលក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ បានលើកម្រាមដៃដប់សំពះថ្លែងអំណរគុណ និងជូនពរលោក សេង ធូ អាយុ៣៣ឆ្នាំ សប្បុរសជនដែលបានផ្តល់ថវិកាតាមរយៈកោះសន្តិភាពជូនដល់រូបគាត់ចំនួន៥០ម៉ឺនរៀល កាលពីដើមខែសីហា ឆ្នាំ២០១២ កន្លងមក ។
សូមរំលឹកថា លោក សេង ធូ បានបរិច្ចាគថវិកាផ្ទាល់ខ្លួនចំនួន៥០ម៉ឺនរៀលជូនដល់ស្ត្រីឈ្មោះប៉ូ រី បន្ទាប់ពីសារព័ត៌មានកោះសន្តិភាពចុះផ្សាយព័ត៌មានរៀបរាប់អំពីស្ត្រីរូបនេះខ្វះលុយសម្រាប់ថ្លៃផ្ទះជួលចំនួន៥ម៉ឺនរៀល ក៏ដាច់ចិត្តហូបធូបមូស ហើយផឹកស្រាប៉ងសម្លាប់ខ្លួន តែត្រូវបានអ្នកជិតខាងនាំយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ។ ផ្តើមចេញពីក្តីអាណិតអាសូរចំពោះស្ត្រីដ៏កម្សត់នេះ លោក សេង ធូ ក៏បានផ្ញើថវិកាមកស្នាក់ការកោះសន្តិភាពចំនួន៥០ម៉ឺនរៀល ដើម្បីយកទៅជួយឧបត្ថម្ភដល់ស្ត្រីឈ្មោះ ប៉ូ រី ហើយថវិកានេះភ្នាក់ងារកោះសន្តិភាពបានយកទៅប្រគល់ជូនដល់ដៃស្ត្រីឈ្មោះ ប៉ូ រី តាំងពីដើមខែសីហាមកម៉្លេះ ។
ស្រ្តីឈ្មោះ ប៉ូ រី បានរៀបរាប់ថា បន្ទាប់ពីទទួលបានថវិការបស់សប្បុរសជន បច្ចុប្បន្នគាត់បានទិញកង់មួយគ្រឿង សម្រាប់ដឹកបន្លែលក់ចិញ្ចឹមជីវិតតទៅមុខទៀត ៕
ចែករំលែកព័តមាននេះ