មិនដល់៤៨ម៉ោងផង ក្រោយការជ្រើសតាំងប្រធានាធិបតីថ្មីសូម៉ាលី លោកហាសាន់សិុកម៉ូហាមូដ គេចផុតពីសេចក្តីស្លាប់កាលពីថ្ងៃទី១២ កញ្ញា ពីការវាយប្រហាអត្តឃាតមួយ ប្រកាសទទួលខុសត្រូវដោយពួកអ៊ិស្លាមរ៉ាឌីកាល់ នៃក្រុមសីុបាប ដែលការវាយប្រហារនេះបណ្តាលឱ្យស្លាប់ទាហានយ៉ាងតិច៣នាក់ក្នុងរដ្ឋធានីមូហ្គាឌីស្យូ ។
កងកម្លាំងសហភាពអាហ្វ្រិកនៅសូម៉ាលី AMISOM បានបញ្ជាក់ថា ជនអត្តឃាតពីរនាក់បានត្រូវគេបាញ់សម្លាប់ ហើយគ្រឿងផ្ទុះនៅនឹងខ្លួនពួកគេបានផ្ទុះ ខណៈពួកគេប៉ុនប៉ងចូលក្នុងសណ្ឋាគារមួយជាកន្លែងប្រធានាធិបតីរូបនោះស្នាក់នៅ តាំងពីលោកត្រូវជ្រើសតាំងកាលពីថ្ងៃទី១០ កញ្ញា មក ។ ជនអត្តឃាតម្នាក់ទៀតត្រូវឃាត់ខ្លួន ហើយត្រូវបាញ់សម្លាប់ពេលគេប៉ុនប៉ងតោងឡើងជញ្ជាំងសណ្ឋាគារ JAZEERA ។ ចំណែកទាហានអ៊ូហ្គង់ដាម្នាក់របស់ AMISON និងទាហានសូម៉ាលី២នាក់ស្លាប់ក្នុងក្នុងការវាយប្រហារភេរវកម្មនោះ ។
អ្នកទទួលខុសត្រូវម្នាក់របស់កងកម្លាំងសន្តិសុខសូម៉ាលី លោកម៉ូហាម៉េដ អាប់ឌីការីន គូសបញ្ជាក់ថា បានឃើញសាកសពមនុស្ស៥នាក់ ក្នុងនោះមានសាកសពជនអត្តឃាត២នាក់ ហើយមនុស្ស៨នាក់ត្រូវរបួស ៕
ចែករំលែកព័តមាននេះ