បាតុកម្មនានាបានកើតមាននៅប្រទេសសអេហ្ស៊ីប ម៉ារ៉ុក ទុយនីស៊ី និងសូដង់ ប្រឆាំងនឹងខ្សែភាពយន្តមួយរបស់ផលិតករមានសញ្ជាតអីុស្រាអែល -អាមេរិកម្នាក់ដែលខ្សែភាពយន្តនោះបានហៅសាសនាអ៊ិស្លាមថាជាជំងឺ«មហារីកមួយ»។
កាលពីថ្ងៃទី១១ កញ្ញា ឯកអគ្គរដ្ឋទូតអាមេរិកម្នាក់ត្រូវសម្លាប់នៅលីប៊ីក្នុងអំពើហិង្សាប្រឆាំងស្ថានកុងស៊ុលអាមេរិកនៅក្រុងបេនហ្គាហ្ស៊ី ។ ខ្សែភាពយន្តរឿង «ភាពស្លូតត្រង់ របស់ពួកអ៊ិស្លាម»INNOCENCE OF MUSLIMS ធ្វើឱ្យកក្រើកពុំត្រឹមនៅលីប៊ីទេ ។ ខ្សែភាពយន្តនេះញុំាងឱ្យមានអំពើហិង្សា នៅលីប៊ិ និងនៅទីក្រុងគែរ ។ ក្រោយបាតុកម្មហិង្សាប្រឆាំងស្ថានទូតអាមេរិកនៅក្រុងគែរ កាលពីថ្ងៃទី១១ កញ្ញា ពួកអ៊ិស្លាមនិយមអេហ្ស៊ីប ពី២០០ទៅ៣០០នាក់បានធ្វើបាតុកម្មជាថ្មីនៅកន្លែងដដែលនោះទៀត ។
នៅប្រទេសទុយនីស៊ី ប៉ូលិសបានបាញ់ឧស្ម័នបង្ហូរទឹកភ្នែកដើម្បីបំបែកពួកអ៊ិស្លាមនិយមប្រមាណជា៣០០នាក់ ដែលប៉ុនប៉ងទំលុះរបាំងសន្តិសុខជុំវិញស្ថានទូតអាមេរិកប្រចាំប្រទេសទុយនីស៊ី ។
នៅម៉ារ៉ុក មនុស្សរវាងពី៣០០ទៅ៤០០នាក់បានធ្វើបាតុកម្មក្នុងហេតុផលដូចគ្នានៅក្បែរស្ថានកុងស៊ុលអាមេរិកប្រចាំទីក្រុងកាសាប្លង់កាជាទីក្រុងធំជាងគេបំផុតរបស់ប្រទេស ។ ពួកបាតុករបាននាំគ្នាស្រែកថា «ស្លាប់ទៅអូបាម៉ា»។
មនុស្សជាច្រើនរយនាក់ក៏ធ្វើបាតុកម្មដែរនៅមុខស្ថានទូតអាមេរិកប្រចាំក្រុងខាទុមរដ្ឋធានីស៊ូដង់ ។ ចំណែកនៅជ្រោយហ្គាហ្សាពលរដ្ឋប៉ាឡេស្ទីនជាច្រើនសិបនាក់បានធ្វើបាតុកម្មប្រឆាំងអាមេរិកដោយដុតនៅមុខទីស្នាក់ការអ.ស.បប្រចាំហ្គាហ្សានូវទង់ជាតិអាមេរិកនិងរូបថតទាំងឡាយរបស់លោកTERRY JONES គ្រូប្រដៅសាសនាគ្រឹស្តអាមេរិកដែលគាំទ្រខ្សែភាពយន្តនោះ ហើយជននោះល្បីឈ្មោះដោយសារតែហ៊ានដុតជាសាធារណៈនូវគម្គីរ កូរអានមួយ។
ខ្សែភាពយន្តរឿងភាពស្លូតត្រង់របស់ពួកអ៊ិស្លាមនោះរបស់ផលិតករលោក សាមបាស៊ីលជាជនជាតិអីុស្រាអែលរស់នៅកាលីហ្វ័រនីញ៉ាចាក់ផ្សាយតាមYOUTUBE បង្ហាញតួអង្គ ជាព្រះមហាមា៉ត់ រាងស្រីមិនស្រី ប្រុសមិនប្រុស រាងដូចប្រុសអ្នករួមភេទដូចគ្នា និងអាសអាភាស ។ បច្ចុប្បន្នលោកសាមបាស៊ីលបានលាក់ខ្លួននៅកន្លែងសំងាត់មួយ ខណៈពួកអ៊ិស្លាមកំពុងមានកំហឹងយ៉ាងពុះពោរ ។
ខ្សែភាពយន្តនេះរបស់គេផលិតអស់ប្រាក់ប្រមាណជា៥លានដុល្លារហើយទទួលការគាំទ្រពីគ្រូប្រដៅសាសនាគ្រឹស្គអាមេរិកTERRY JONES ។ ឆាកមួយបង្ហាញមនុស្សម្នាក់មានឈាមប្រឡាក់ខ្លួន លើកទឹកចិត្តដល់បណ្តាមនុស្សរបស់គេឱ្យប្លន់កន្លែងនានាដែលពួកគេវាយប្រហារ ហើយប្រើប្រាស់បណ្តាកុមារ ។ ចំណែកឆាកមួយទៀតបង្ហាញជាបន្តបន្ទាប់នូវតួព្រះមហាម៉ាត់កំពុងតែរួមភេទជាមួយភរិយាម្នាក់ ក្នុងចំណោមភរិយាទាំងឡាយបន្ទាប់មកជាមួយនារីដទៃៗទៀត ៕
ចែករំលែកព័តមាននេះ