រាជធានីភ្នំពេញ ៖ រហូតមកដល់ពេលនេះ វត្តមានរបស់អ្នកស្រីសាំង សុម៉ាលី ភរិយាអតីតអ្នកប្រដាល់ល្បីឈ្មោះអេ ភូថង កំពុងតែមានឈ្មោះបោះសំឡេងនៅលើសង្វៀនប្រដាល់កាន់តែខ្លាំង ក្នុងតំណែងជាអាជ្ញាកណ្តាលស្រីផង និងជាគ្រូបង្វឹកផង ។ អ្នកស្រីបានបញ្ជាក់ឱ្យដឹងពីដំណើរជីវិតរបស់ខ្លួន ដែលនាំឱ្យអ្នកស្រីចូលប្រឡូកក្នុងអាជីពខាងលើនេះ ។
ថ្វីដ្បិតលោក អេ ភូថង បានសម្រេចចិត្តដកថយពីការឡើងប្រដាល់នៅលើសង្វៀនអស់ប្រមាណជាង៣ឆ្នាំ ប៉ុន្តែអតីតកីឡាករជើងខ្លាំងដែលធ្លាប់អង្រួនសង្វៀនប្រដាល់រូបនេះ មិនទៅណាឆ្ងាយពីទីលានប្រដាល់ ដែលធ្លាប់រុញឱ្យលោកល្បីល្បាញឡើយ ។ អ្វីដែលធ្វើឱ្យលោកមានមោទនភាព គឺបន្ទាប់ពីលោកដុសខាត់កូនស្រីឈ្មោះអេ យ៉ានុត អាយុ១៤ឆ្នាំ ឱ្យក្លាយជាកីឡាការិនីប្រដាល់ និងបញ្ចេញភរិយា គឺអ្នកស្រីសាំង សុមា៉លី ឱ្យធ្វើជាអាជ្ញាកណ្តាលម្នាក់ទៀត ។
ថ្លែងក្នុងជំនួបផ្តាច់មុខមួយជាមួយអ្នកសារព័ត៌មានកោះសន្តិភាព អ្នកស្រីបញ្ជាក់ថា មុនពេលរៀបការជាមួយលោកអេ ភូថង អ្នកស្រីមិនដែលនឹកចង់ក្លាយខ្លួនជាគ្រូបង្វឹកផ្នែកប្រដាល់ ឬជាអាជ្ញាកណ្តាលនោះឡើយ ដោយសារតែអ្នកស្រីយល់ថា អាជីពនោះមិនសមចំពោះមនុស្សស្រី ។ ប៉ុន្តែអាចមកពីអ្នកស្រីរួមរស់ក្នុងជីវិតជាភរិយារបស់លោកអេ ភូថង ប៉ុណ្ណោះ ទើបរុញឱ្យអ្នកស្រីបោះជំហានចាប់យកអាជីពនេះ ។ អ្នកស្រីកើតនៅថ្ងៃទី៣ មីនា ឆ្នាំ១៩៧៨ នៅទីរួមខេត្តកោះកុង ជាកូនច្បងក្នុងគ្រួសារ ដែលមានបងប្អូនបង្កើតចំនួន៤នាក់(ស្រី៣ ប្រុស១) និងបានបញ្ចប់ការសិក្សាត្រឹមថ្នាក់ទី៩ នៅវិទ្យាល័យកោះកុង ។ ក្រោយពេលឈប់រៀន អ្នកស្រីចាប់យករបរលក់គ្រឿងទេសនៅក្នុងខេត្ត រហូតដល់ឆ្នាំ១៩៩៧ ទើបចាស់ទុំផ្សំផ្គុំឱ្យរៀបការជាមួយលោកអេ ភូថង ។ សព្វថ្ងៃ អ្នកស្រី និងស្វាមី មានកូនប្រុសស្រីចំនួន៤នាក់ គឺប្រុស៣ ស្រី១ ដែលកូនស្រីនោះ គឺកីឡាការិនីប្រដាល់អេ យ៉ានុត ។
ទាក់ទិននឹងការបោះជំហានចូលធ្វើជាអាជ្ញាកណ្តាលនេះវិញ អ្នកស្រីបញ្ជាក់ថា ពីដំបូងអ្នកស្រីមិនចូលចិត្តឡើយ ដោយសូម្បីតែអ្នកណាបើកទូរទស្សន៍ចំកម្មវិធីប្រដាល់ក៏ស្អប់ និងមិនដែលមើលដែរ ។ អ្នកស្រីថ្លែងថា «និយាយរួមខ្ញុំឃើញគេប្រកួតគ្នាលើរេញ គឺខ្លាចណាស់ ទើបមិនចង់មើល ហើយខឹងទាំងខ្លួនឯងដែលបានប្តីធ្វើជាអ្នកប្រដាល់ ប៉ុន្តែក្រោយមកពេលខ្ញុំដើរតាមគាត់ដើម្បីលើកទឹកចិត្តគាត់ ស្រាប់តែខ្ញុំចាប់ផ្តើមប្តូររបត់យល់ឃើញទាំងនោះចេញអស់រលីង»។ មកទល់ពេលនេះ អ្នកស្រីមិនត្រឹមតែចូលចិត្តវិស័យកីឡាប្រដាល់ប៉ុណ្ណោះទេ ថែមទាំងចូលប្រឡូកក្នុងអាជីពនេះក្នុងតំណែងជាគ្រូបង្វឹក និងធ្វើជាអាជ្ញាកណ្តាលយ៉ាងជោកជាំទៀតផង។ អ្នកស្រីបានចាប់អាជីពជាអាជ្ញាកណ្តាលកាលពី២ឆ្នាំមុន នៅអំឡុងចុងឆ្នាំ២០១០ បន្ទាប់ពីលោកអេ ភូថង បង្ហាត់ឱ្យចេះស្ទាត់គ្មានចន្លោះនូវស្នៀតកីឡាប្រដាល់ ។
ភ្លាមៗនោះ អ្នកស្រីបានចូលប្រឡូកក្នុងអាជីពជាចៅក្រមផ្តល់ពិន្ទុប៉ុណ្ណោះ ប៉ុន្តែមកពីជំនាញនោះវាកាន់តែធ្វើឱ្យអ្នកស្រីថ្នឹកនឹងវិស័យប្រដាល់ ទើបខាងសហព័ន្ធសម្រេចចាត់តាំងឱ្យអ្នកស្រីចូលធ្វើជាអាជ្ញាកណ្តាលវិញ ។ អ្នកស្រីអះអាងថា ជាធម្មតាដើម្បីក្លាយខ្លួនជាអាជ្ញាកណ្តាល គឺគេច្រើនហែលឆ្លងជីវិតធ្វើជាអ្នកប្រដាល់ជាមុនសិន ប៉ុន្តែសម្រាប់អ្នកស្រី គឺមិនធ្លាប់ទេ ដោយសូម្បីតែឡើងរេញម្តងក៏គ្មានដែរ ប៉ុន្តែសម្រាប់បច្ចេកទេសប្រដាល់ដើម្បីបង្ហាត់សិស្ស និងចាប់បំបែកគូប្រកួតនៅលើរេញដោយមិនឱ្យមានគ្រោះថ្នាក់វិញ គឺអ្នកស្រីចេះស្ទាត់ទាំងអស់ ។
រំលឹកដល់អតីតកាលនោះ អ្នកស្រីសាំង សុម៉ាលី ថ្លែងបណ្តើរសើចបណ្តើរថា ពេលមានការជំរុញពីស្វាមី និងមិត្តភក្តិរបស់គាត់ អ្នកស្រីរារែកណាស់ ដោយបានទាំងប្រកែកព្រោះខ្លាចត្រូវកីឡាករវាយទាត់ត្រូវនាំឱ្យគ្រោះថ្នាក់ដល់ខ្លួន ប៉ុន្តែពេលចូលប្រឡូកជាក់ស្តែងទៅ គឺមិនដូចអ្វីដែលខ្លួនធ្លាប់បារម្ភឡើយ ទើបកើតអារម្មណ៍ចូលចិត្ត ហើយថែមទាំងជំរុញឱ្យកូនស្រីអាយុុ១៤ឆ្នាំ និងកូនប្រុសដែលអាចហាត់បានផ្សេងទៀតចាប់យកអាជីពខាងកីឡាប្រដាល់នោះតែម្តង ។ អ្នកស្រី និងស្វាមី បានប្រឹងពុះពារបង្កើតក្លិបប្រដាល់អេ ភូថង មួយឡើងកាលពីឆ្នាំ២០០៥ ដោយពេលនេះមានសិស្សគុនជាង១០០នាក់ កំពុងទទួលការហ្វឹកហាត់ពីអ្នកស្រី និងស្វាមី ។ ក្រៅពីទទួលបង្វឹកដល់កូនសិស្សខ្លួនឯង អ្នកស្រីក៏ធ្វើជាគ្រូបង្វឹកឱ្យក្លិប«អប្សរាគុនខ្មែរ» ដើម្បីរកប្រាក់កម្រៃបន្ថែមនាពេលនេះផងដែរ ។
ជាមួយនឹងមហិច្ឆតាមិនលាឈប់ពីអាជីពប្រដាល់ អ្នកស្រីបញ្ជាក់ថា ផ្លូវដែលខ្លួនឯងកំពុងដើរដោយគ្មានគម្រោងទុកមុនមួយនេះ មិនត្រឹមតែជួយឱ្យអ្នកស្រីល្បីឈ្មោះក្នុងពិភពប្រដាល់ប៉ុណ្ណោះទេ ប៉ុន្តែវាថែមទាំងជួយឱ្យអ្នកស្រីមានមោទនភាពក្នុងការរកប្រាក់ដោយមិនលំបាក ក្រោយពីចេះស្ទាត់ពីជំនាញតាមប្តីនោះថែមទៀតផង ។ អីុចឹងហើយ ទើបអ្នកស្រីយល់ថា អាជីពណាក៏មិនគួរបែងចែករវាងបុរស និងស្ត្រីនោះដែរ សំខាន់ឱ្យតែចេះស្ទាត់នោះគឺល្អហើយ ៕
ចែករំលែកព័តមាននេះ