រាជធានីភ្នំពេញ ៖ ក្លិបបាល់ទាត់ព្រះខ័នរាជស្វាយរៀងរបស់កម្ពុជា បានខកខានឱកាសគ្រងតំណែងជើងឯកពានរង្វាន់កម្រិតទី៣ ប្រចាំទ្វីបអាស៊ី AFC Challenge League រដូវកាល ២០២៤-២៥…
រាជធានីភ្នំពេញ ៖ ក្លិបបាល់ទាត់ព្រះខ័នរាជស្វាយរៀងរបស់កម្ពុជា បានខកខានឱកាសគ្រងតំណែងជើងឯកពានរង្វាន់កម្រិតទី៣ ប្រចាំទ្វីបអាស៊ី AFC Challenge League រដូវកាល ២០២៤-២៥ ក្រោយបញ្ចប់ការប្រកួតវគ្គផ្ដាច់ព្រ័ត្រ ឈានដល់ម៉ោងបន្ថែម១៥នាទី២ដង ចាញ់ក្រុមភ្ញៀវ FK Arkadag មកពីប្រទេសតួកម៉េនីស្ថាន ដោយលទ្ធផល ២ទល់នឹង១ កាលពីយប់ថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានជាតិមរកតេជោ ក្រោមក្រសែភ្នែកអ្នកទស្សនាជាង៥ម៉ឺននាក់។
ទោះខកខានឱកាសគ្រងជើងឯកពានរង្វាន់កម្រិតទី៣ ប្រចាំទ្វីបអាស៊ី ដើម្បីបង្កើតប្រវត្តិសាស្ត្រសម្រាប់បាល់ទាត់កម្ពុជាក៏ពិតមែន ប៉ុន្តែលោក Pep Munoz គ្រូបង្វឹកព្រះខ័នរាជស្វាយរៀងបានបង្ហាញមោទនភាពលើកូនក្រុមរបស់លោក ចំពោះការខំប្រឹងប្រែង ព្រមទាំងបានបង្ហាញទម្រង់លេងដ៏ល្អ ពិសេសលេងតាមផែនការ និងការរៀបចំ។
ថ្លែងនៅក្នុងសន្និសីទសារព័ត៌មានក្រោយការប្រកួត លោក Pep បានលើកឡើងដូច្នេះថា «ការប្រកួតថ្ងៃនេះ យើងលេងបានល្អ ពិសេសតាមផែនការ និងការរៀបចំ។ យើងក៏បានដឹងដែរថា FK Arkadag គឺជាក្រុមវាយបកខ្លាំង។ យើងបានគ្រប់គ្រងការប្រកួតស្ទើរទាំងស្រុង ពិសេស៣០នាទីដំបូង។ បន្ទាប់ពី FK Arkadag ទាត់ចូល១គ្រាប់ ក្រុមកាន់តែពិបាក តែទីបំផុតយើងក៏តាមស្មើមកវិញ។ សម្រាប់ម៉ោងបន្ថែម១៥នាទី ២ដង យើងបានបង្កើតឱកាសច្រើន តែធ្វើមិនបានសម្រេច ហើយចុងក្រោយ ពួកគេក៏រកគ្រាប់ទី២ ដោយការវាយបក»។
ឆ្លើយតបនឹងសំនួរអ្នកសារព័ត៌មាន ជុំវិញការលេងកេងពេលវេលារបស់ FK Arkadag លោក Pep បានឱ្យដឹងដូច្នេះថា «អ្នកឃើញហើយប៉ុន្មានលើកដែលពួកគេដួលនៅលើទីលាន? យើងអត់អាចនិយាយបានថាវាជាការស៊ីម៉ោងនោះទេ ប៉ុន្តែការដែលពួកគេធ្វើបែបនេះគឺដើម្បីពួកគេបានសម្រាក និងប្រមូលកម្លាំងមកវិញ។ យើងទទួលស្គាល់ថា យើងក៏នឿយហត់ ប៉ុន្តែដោយសារយើងព្យាយាមប្រយុទ្ធទៅខាងគេ គេគ្រាន់តែការពារ ២ជួរ ទុកខាងលើតែម្នាក់ដើម្បីវាយបក។ គាត់ធ្វើបែបនេះ ការផ្លាស់ប្ដូរខាងរបស់យើងក៏ធ្វើឱ្យពួកគេហត់នឿយដែរ អ៊ីចឹងហើយបានជាយើងមោទនភាពជាមួយកីឡាករយើងដែលគាត់ធ្វើបានល្អខ្លាំង ហើយចុងក្រោយកីឡាករយើងសម្រុកខ្លាំងទើបកីឡាករយើងកាន់តែហត់នឿយ។ ជាចុងក្រោយ ខ្ញុំជាគ្រូបង្វឹក ការចាញ់ការប្រកួតនេះ ខ្ញុំគឺជាអ្នកដាក់កីឡាករលេង អ៊ីចឹងការបរាជ័យនេះ គឺខ្ញុំជាអ្នកទទួលខុសត្រូវ»។
ក្រោយគ្រងតំណែងជើងឯក AFC Challenge League រដូវកាល ២០២៤-២៥ លោក Ahmet Allaberdiyev គ្រូបង្វឹក FK Arkadag បានលើកឡើងថា «ពួកយើងសូមអរគុណសម្រាប់អ្នកគាំទ្រ។ វាពិតជាអំណោយផលសម្រាប់ម្ចាស់ផ្ទះ ដែលមានអ្នកគាំទ្រដល់ទៅជាង៥ម៉ឺននាក់ ហើយពួកយើងពិតជាសប្បាយចិត្ត ដែលទទួលបានជ័យជម្នះក្នុងការប្រកួតនេះ»។ ជាមួយគ្នានោះ លោកបានទទួលស្គាល់ថា ស្វាយរៀងជាក្រុមខ្លាំង និងមានផែនការលេងច្បាស់លាស់ ប៉ុន្តែការប្រកួតនេះ សំណាងនៅខាង FK Arkadag លោកពិតជាសប្បាយចិត្ត ដែលក្រុមលោកទទួលបានជ័យជម្នះ៕ រូបភាព ៖ Preah Khan Reach Svay Rieng FC
ចែករំលែកព័តមាននេះ