David Beckham ទទួលបានគោរមងារ «Sir» ពីព្រះមហាក្សត្រចក្រភពអង់គ្លេស
ចក្រភពអង់គ្លេស ៖ លោក David Beckham ត្រូវបានស្ដេចឆាលស៍ទី៣ (Charles III) នៃចក្រភពអង់គ្លេសតែងតាំងគោរមងារ «Sir»…
ចក្រភពអង់គ្លេស ៖ លោក David Beckham ត្រូវបានស្ដេចឆាលស៍ទី៣ (Charles III) នៃចក្រភពអង់គ្លេសតែងតាំងគោរមងារ «Sir» ជាផ្លូវការ ដែលជាគោរមងារកិត្តិយសថ្នាក់ជាតិខ្ពស់បំផុតមួយ កាលពីថ្ងៃទី១៤ ខែមិថុនា ឆ្នាំ២០២៥ កន្លងទៅ សម្រាប់សមិទ្ធផលលើវិស័យកីឡា និងសប្បុរសធម៌។
វីរបុរសបាល់ទាត់ចក្រភពអង់គ្លេសវ័យ៥០ឆ្នាំរូបនេះ បានទទួលគោរមងារ «Sir» ក្នុងបញ្ជីកិត្តិយសនៅក្នុងថ្ងៃព្រះរាជពិធីចម្រើនព្រះជន្ម៧៦ព្រះវស្សារបស់ស្តេចឆាលស៍ទី៣ ដែលទទួលស្គាល់សម្រាប់សមិទ្ធផលដ៏ឆ្នើមលើវិស័យកីឡា ក៏ដូចជាការរួមចំណែកដ៏សំខាន់ដល់សង្គមជាតិអង់គ្លេស។ ដូច្នេះចាប់ពីពេលនេះតទៅ Beckham នឹងត្រូវបានគ្រប់គ្នាស្គាល់ថា «Sir David Beckham» ហើយអ្នកស្រី Victoria Beckham ដែលត្រូវជាភរិយា ក៏នឹងត្រូវបានគ្រប់គ្នាស្គាល់ថា «Lady Victoria Beckham»។
ក្រៅអំពីមានអាជីពបាល់ទាត់ដ៏អស្ចារ្យហើយនោះ សហម្ចាស់ក្លិប Inter Miami នៃលីគកំពូលអាមេរិករូបនេះ បានបម្រើការជាឯកអគ្គរដ្ឋទូតអង្គការយូនីសេហ្វ (UNICEF) តាំងពីឆ្នាំ២០០៥ ហើយអតីតខ្សែបម្រើឆ្នើមរូបនេះ ក៏បានក្លាយជាឯកអគ្គរដ្ឋទូតសម្រាប់អង្គការសប្បុរសធម៌របស់ស្តេចឆាលស៍ ដែលជាមូលនិធិ King’s Foundation កាលពីឆ្នាំ២០២៤។
សូមជម្រាបជូនថា Sir David Beckham ដែលត្រូវបានតែងតាំងជាមន្ត្រី Order of the British Empire (OBE) កាលពីឆ្នាំ២០០៣រូបនេះ បានបង្ហាញខ្លួន១១៥ប្រកួតសម្រាប់ក្រុមជម្រើសជាតិអង់គ្លេស និងលេង៥៩ប្រកួតក្នុងនាមជាប្រធានក្រុម ហើយរូបគេក៏នៅតែជាកីឡាករអង់គ្លេសតែម្នាក់គត់ ដែលអាចរកគ្រាប់បាល់បញ្ចូលទីបាននៅព្រឹត្តិការណ៍ World Cup ៣សម័យកាលផ្សេងគ្នា ព្រមទាំងបានបង្ហាញខ្លួននៅគ្រប់ប្រកួតសំខាន់ៗរបស់ក្រុមរហស្សនាមតោកំណាចមួយនេះចន្លោះឆ្នាំ ១៩៩៨ និង២០០៦។
អតីតខ្សែបម្រើឆ្នើមជំនាញបញ្ជូនបាល់ឆ្ងាយ និងទាត់បាល់ហ្វ្រីឃិតរូបនេះ បានជួយក្រុម Manchester United ឈ្នះជើងឯកលីគកំពូលអង់គ្លេស Premier League ៦សម័យកាល រួមទាំងពាន FA Cup, FA Charity Shield, UEFA Champions League និង Intercontinental Cup ជាពិសេសការឈ្នះពានរង្វាន់ធំ៣ក្នុងមួយរដូវកាលដ៏ល្បីល្បាញកាលពីឆ្នាំ១៩៩៩។ Beckham ក៏បានជួយក្រុម Real Madrid ឈ្នះជើងឯកលីគកំពូលអេស្ប៉ាញ LA Liga ព្រមទាំង Spanish Super Cup មុនបន្តជួយ LA Galaxy ឈ្នះពានរង្វាន់ MSL ២លើកនៅអាមេរិក និងជើងឯកលីគកំពូលបារាំង Ligue 1 ១លើកជាមួយ Paris Saint-Germain មុនពេលប្រកាសចូលនិវត្តន៍នៅឆ្នាំ២០១៣។
កាលពីខែឧសភាកន្លងទៅ លោក David Beckham ព្រមទាំងភរិយាបានជាប់ឈ្មោះក្នុងចំណោមគ្រួសារមានទ្រព្យសម្បត្តិច្រើនបំផុតនៅចក្រភពអង់គ្លេស ខណៈដែលទ្រព្យសុទ្ធប្តីប្រពន្ធដ៏ល្បីល្បាញមួយគូនេះ ត្រូវបានប៉ាន់ប្រមាណថាមានសរុបដល់ ៥០០លានផោន ឬស្មើនឹង ៦៧១លានដុល្លារអាមេរិក។
បញ្ជីដែលចងក្រងដោយកាសែត Sunday Times ដ៏ល្បីរបស់ចក្រភពអង់គ្លេស ត្រូវបានបោះពុម្ពផ្សាយដោយបង្ហាញអំពីបុគ្គល និងគ្រួសារដ៏មានបំផុតចំនួន៣៥០នាក់ នៅចក្រភពអង់គ្លេស។ Beckham និងភរិយាបានជាប់ក្នុងចំណាត់ថ្នាក់ទី២៧៣ ដោយកើនឡើង២៤ចំណាត់ថ្នាក់ បើធៀបនឹងឆ្នាំមុន ខណៈប្តីប្រពន្ធមួយគូនេះ បានបង្ហាញវត្តមានលើកដំបូងក្នុងបញ្ជីមួយនេះ កាលពីឆ្នាំ២០០២ ដោយគ្រានោះ ពួកគេមានទ្រព្យសម្បត្តិត្រឹមតែ៣៥លានផោន ឬស្មើនឹង ៤៧លានដុល្លារអាមេរិកប៉ុណ្ណោះ។
លោកបានក្លាយជាឯកអគ្គរដ្ឋទូតម៉ាកយីហោល្បីលំដាប់ពិភពលោកជាច្រើនដូចជា Adidas, Hugo Boss, Haig Club, Armani និង Maserati ក៏ដូចជាម៉ាកយីហោផ្ទាល់ខ្លួនផងដែរ។ មិនត្រឹមតែប៉ុណ្ណោះ លោកក៏ជាសហម្ចាស់ក្លិបបាល់ទាត់ Inter Miami នៅលីគកំពូលសហរដ្ឋអាមេរិក ដែលមានកំពូលខ្សែប្រយុទ្ធអាហ្សង់ទីន Lionel Messi កំពុងប្រកបអាជីពនៅទីនោះ។ ដោយសារតែប្រាក់ចំណូលហូរចូលដូចទឹកនេះហើយ ទើបបានជាឥឡូវនេះ Beckham គឺជាអត្តពលិកមានទ្រព្យសម្បត្តិច្រើនជាងគេបំផុតនៅចក្រភពអង់គ្លេស។ នេះបើយោងតាមសេចក្តីរាយការណ៍របស់កាសែត Daily Mail ។
ទ្រព្យសម្បត្តិដ៏ច្រើនសន្ធឹកសន្ធាប់របស់គ្រួសារត្រកូល Beckham ក៏បានរួមចំណែកដ៏សំខាន់ពីអ្នកស្រី Victoria ផងដែរ តាមរយៈអាជីពម៉ូដដ៏កំពុងរីកចម្រើនរបស់អ្នកស្រី។ ម៉ាកយីហោដ៏ល្បីរបស់អ្នកស្រីនៅតែបន្តបោះជំហានទៅមុខ និងរីកចម្រើនជាបន្តបន្ទាប់ ដោយសារមួយផ្នែកទទួលបានការគាំទ្រពីតារាល្បីៗជាច្រើនដូចជា Eva Longoria, Kim Kardashian និង Gwyneth Paltrow ជាដើម។ ជាមួយទ្រព្យសម្បត្តិចំនួន៦៧១លានដុល្លារអាមេរិកឈរពីក្រោយស្តេចឆាលស៍ទី៣ ដែលទ្រព្យព្រះអង្គត្រូវបានប៉ាន់ប្រមាណថាមានប្រហែល៦៤០លានផោន ឬ ៨៦០លានដុល្លារនោះ Beckhams កំពុងតែស្ថិតក្នុងចំណោមក្រុមអភិជននៃគ្រួសារអ្នកមានជនជាតិអង់គ្លេស៕ ដកស្រង់ ៖ ESPN
ចែករំលែកព័តមាននេះ