រាជធានីភ្នំពេញ ៖ ជំនួបលើកទី២រវាងកីឡាករជើងខ្លាំង ជ័យ កុសល និងកែវ រំចង់ កាលពីថ្ងៃសុក្រ ទី៧ កញ្ញា មិនត្រឹមតែបង្ហាញពីលទ្ធផល ចាញ់ឈ្នះប៉ុណ្ណោះទេ ប៉ុន្តែស្ទើរតែធ្វើឲ្យអ្នកទស្សនា ភ័យរឿងពួកគេចង់វាយគ្នានៅក្រៅឆាកថែមទៀតផង។ អ្នកទស្សនាផ្ទាល់នៅសង្វៀនទូរទស្សន៍បាយ័នបឹងស្នោ សុទ្ធតែឃើញកីឡាករ ជ័យ កុសល ខាំមាត់សម្លក់ កែវ រំចង់ ចង់ស៊ីសាច់នៅម៉ោង
រាជធានីភ្នំពេញ ៖ ជំនួបលើកទី២រវាងកីឡាករជើងខ្លាំង ជ័យ កុសល និងកែវ រំចង់ កាលពីថ្ងៃសុក្រ ទី៧ កញ្ញា មិនត្រឹមតែបង្ហាញពីលទ្ធផល ចាញ់ឈ្នះប៉ុណ្ណោះទេ ប៉ុន្តែស្ទើរតែធ្វើឲ្យអ្នកទស្សនា ភ័យរឿងពួកគេចង់វាយគ្នានៅក្រៅឆាកថែមទៀតផង។ អ្នកទស្សនាផ្ទាល់នៅសង្វៀនទូរទស្សន៍បាយ័នបឹងស្នោ សុទ្ធតែឃើញកីឡាករ ជ័យ កុសល ខាំមាត់សម្លក់ កែវ រំចង់ ចង់ស៊ីសាច់នៅម៉ោង សម្រាក បន្ទាប់ពីលោកត្រូវរយះត្រង់ប្រជុំចិញ្ចើម ហើយមានឈាមហូរស្រោចមុខ។
ស្ដែងកាន់តែច្បាស់នោះទៅទៀត គឺនៅពេលចប់ទឹកទី៥ ស្រាប់តែកីឡាករទាំងពីរស្ទុះវាយគ្នាយ៉ាងកំរោលដែលស្ទើរតែធ្វើឲ្យលោកអាជ្ញាកណ្ដាលឃាត់ទង្វើពួកគេមិនចង់ជាប់ ។ ជ័យ កុសល ត្រូវអ្នកឲ្យទឹក និងគ្រូបង្វឹកបង្វេះចេញភ្លាមៗ ដើម្បីកុំឲ្យមានការឌឺដងដាក់គ្នាបន្ថែម បន្ទាប់ពីមានការប្រកាសថាលោកក្លាយជាអ្នកចាញ់ក្រោមដៃ កែវ រំចង់ ទាំងមិនអស់ចិត្ត ។មជ្ឈដ្ឋានភាគច្រើនបានត្រឹមតែដឹងថា កីឡាករ កែវ រំចង់ ម្ចាស់ខ្សែក្រវាត់ស៊ីម៉ង់រូបភ្នំ មកពីក្លិបកងពលលេខ៨ភ្នំទ្រព្យ អាចការពារខ្សែក្រវាត់ ហើយឈ្នះជ័យ កុសល ដែលជាជើងខ្លាំងមកពីក្លិបសិង្ហកីឡាទាំងលំបាក ក្នុងជំនួបសងសឹកគ្នាជាលើកទី២នោះតែប៉ុណ្ណោះ។
ប៉ុន្តែប្រហែលមិនបានដឹងថា នៅខាងក្រៅឆាកនៃការប្រកួតបែកឈាមដ៏គួរឲ្យរន្ធត់រវាងពួកគេ គឺស្ទើរតែធ្វើឲ្យអ្នកទាំងពីរផ្ទុះជម្លោះចង់វាយគ្នានោះឡើយ ។ មូលហេតុដែលនាំឲ្យមានរឿងកើតឡើងយ៉ាងដូច្នេះ គឺបណ្ដាលមកពី កែវ រំចង់ វាយឌឺខ្លាំងពេក ហើយក្នុងមួយទឹកៗ គេមានការបំពានលើ ជ័យ កុសល ទៀតផង ទើបធ្វើឲ្យ ជ័យ កុសល ឆេះដុំចង់កញ្ជ្រោលក្រៅឆាក ។ មិនមែនព្រោះតែរឿង ជ័យ កុសល ចាញ់ កែវ រំចង់ ទើបកើតគំនិតខឹងគុំនោះទេ ប៉ុន្តែអ្នកទស្សនាផ្ទាល់សុទ្ធតែមើលឃើញដូចគ្នាថា កែវ រំចង់ មានទង្វើឌឺហួសពីការស្មាន ស្របគ្នាធ្វើឲ្យ ជ័យ កុសល ខឹងច្រើន ចាប់តាំងពីលោកភ្លាត់ស្នៀតឱ្យ កែវ រំចង់ វាយបែកឈាមស្រោចមុខ។
ត្រឹមកាយវិការសើចញាក់មុខ និងទង្វើឌឺលោកក្នុងពេលប្រកួត គឺមិនមែនជាហេតុផលដែលរុញឲ្យ ជ័យ កុសល មានកំហឹងឡើយ ប៉ុន្តែអ្វីដែលគេកត់សម្គាល់ឃើញ គឺកែវ រំចង់ មានសកម្មភាពសម្រុកហាក់ដូចជាមានគំនុំជាមួយ ជ័យ កុសល តាំងពីពេលណា ហើយរមែងស្ទុះវាយមួយដៃ ឬជ្រុលទាត់មួយជើងនៅពេល ជ័យ កុសល ដួល និងស្ទើរតែគ្រប់ពេលបញ្ចប់ទឹកនីមួយៗទៀត ។
បើទោះជា ជ័យ កុសល មិនបញ្ជាក់ដោយពាក្យសម្ដីថា គេខឹងចំពោះទង្វើ កែវ រំចង់ ប៉ុន្តែគ្មានអ្នកណាមើលមិនដឹងនោះទេ ដោយសារតែក្នុងពេលសម្រាកជូតឈាមម្ដងៗ ពិសេសគឺក្នុងពេលរបូតប្រដាប់ការពាររបស់លោកតែម្ដង គឺ ជ័យ កុសល បានឈរច្រត់ចង្កេះខាំធ្មេញ និងសម្លក់ កែវ រំចង់ ស្ទើរតែចង់ជ្រុះគ្រាប់ភ្នែក ដែលហាក់ចង់ទៅស៊ីសាច់ កែវ រំចង់ ទាំងរស់តែម្ដង ។ ម៉្លោះហើយ ទើបនៅចុងទឹកទី៥ គេឃើញ ជ័យ កុសល ស្ទុះទៅវាយ កែវ រំចង់ ទាំងកំរោល បន្ទាប់ពី កែវ រំចង់ នៅតែល្មើសធាក់ចំកណ្ដាលទ្រូង លោកពេញទំហឹង នៅពេលស្នូរជួងបានកំណត់ឲ្យបញ្ឈប់ការប្រកួតទៅហើយ។ មិនត្រឹមតែលោកអាជ្ញាកណ្ដាលប៉ុណ្ណោះទេ ដែលស្ទុះឃាត់ ជ័យ កុសល ស្ទើរមិនចង់ជាប់ សូម្បីតែគ្រូបង្វឹក និងអ្នកឲ្យទឹករបស់ ជ័យ កុសល នៅខាងក្រោមរេញ ក៏ស្រែកស្ទើរភ្លាត់សំឡេងឲ្យជ័យ កុសល ទប់កំហឹងកុំឆេវឆាវមួយពេលនោះដែរ ។
ក្រុមអ្នកទស្សនាផ្ទាល់ សុទ្ធតែមើលឃើញដូចគ្នាថា បើពេលនោះ ជ័យ កុសល ស្ទុះទៅវាយ កែវ រំចង់ បាន ហើយ កែវ រំចង់ តដៃមកវិញ គឺសង្គ្រាមក្រៅឆាករវាងកីឡាករល្បីឈ្មោះទាំងពីរ ពិតជាកើតឡើងទប់មិនជាប់ឡើយ ដោយសារតែ ជ័យ កុសល បង្ហាញឲ្យគេឃើញច្បាស់ទៅហើយថាខ្លួនអស់ការអត់ធ្មត់។ ជាមួយនឹងកាយវិការខ្ទប់មុខចង់ស្រក់ទឹកភ្នែកនឹងការបរាជ័យរបស់ខ្លួនផង និងខឹង កែវ រំចង់ ផង ជ័យ កុសល ត្រូវគេបង្វេះចេញពីសង្វៀនភ្លាមៗ ដើម្បីកុំឲ្យមានទង្វើឌឺដងដាក់គ្នាណាមួយបន្ថែម
ទៀត ក្នុងពេល កែវ រំចង់ ដែលបានទទួលជ័យជម្នះកំពុងមោទនភាព សើចផង រាំផង នៅចំពោះមុខមហាជន ។
បុរសដែលត្រូវអ្នកឈរក្បែរហៅឈ្មោះថារ៉ាវុធ បាននិយាយដោយចំៗថា គណៈកម្មការ គួរតែព្រមាន កែវ រំចង់ សម្រាប់ការប្រកួតលើកក្រោយ ព្រោះបើជ្រុលដៃជ្រុលជើងម្ដងម្កាលវាមិនមែនជារឿងប្លែកទេ ប៉ុន្តែនេះគឺមានចេតនា វាយឆ្មក់ធ្វើឲ្យគូប្រកួតខឹងតែម្ដង ទើបបណ្ដាលឲ្យ ជ័យ កុសល ខឹងញ័រខ្លួនហើយចង់ស្ទុះវាយដល់ម្ល៉ឹង ។ ទោះយ៉ាងណា នៅពីក្រោយហេតុការណ៍នោះ គេជឿថា ពួកគេនឹងសម្ដែងអារម្មណ៍ជាកីឡាករ ដោយមិនចងកំហឹងដាក់គ្នា ដូចអ្វីដែលអ្នកទស្សនាផ្ទាល់បានឃើញនោះឡើយ ។ លោក នាង ស៊ីវត្ថា អ្នករៀបចំការប្រកួតបានសម្រួលចិត្ត ជ័យ កុសលភ្លាមៗ ដោយប្រកាសដាក់មេក្រូថា អរគុណចំពោះការប្រឹងប្រែងរបស់លោក ហើយបើទោះជាមិនបានឈ្នះ តែលោកធ្វើបានយ៉ាងល្អសម្រាប់ការប្រកួតដណ្ដើមខ្សែក្រវាត់ដ៏កក្រើកមួយនេះ ។
ក្រុមអ្នករៀបចំការប្រកួត មានគម្រោងហៅកីឡាករ កែវ រំចង់ មកណែនាំពាក់ព័ន្ធនឹងកំហុសឆ្គង ដែលធ្វើឲ្យ ជ័យ កុសល ខឹងសម្បានោះ ដើម្បីកុំឲ្យការប្រកួតលើកក្រោយៗរបស់លោក ប្រឈមនឹងការរិះគន់ដូចពេលនេះ បើទោះជាស្ទីលឌឺដាក់ដៃគូប្រកួត គឺជាយុទ្ធសាស្រ្តឈ្នះតែមួយគត់របស់ខ្លួនក៏ដោយ ។ យ៉ាងណាមិញ កម្មវិធីប្រដាល់នាយប់នោះត្រូវគេកត់សម្គាល់ថា មានអ្នកទស្សនាច្រើនមិនគួរឲ្យជឿឡើយ ដោយសូម្បីតែនៅខាងក្រៅទីលានប្រកួត ក៏មានអ្នកទស្សនាណែនណាន់តាន់តាប់អង្គុយនៅមុខកញ្ចក់ទូរទស្សន៍ផ្ទាំងធំ ដែលស្ថានីយទូរទស្សន៍បាយ័ន បានផ្សាយបន្តផ្ទាល់ឲ្យទស្សនានាគ្រានោះផងដែរ ៕
ចែករំលែកព័តមាននេះ