រាជធានីភ្នំពេញ ៖ ប្រជាពលរដ្ឋប្រមាណជាង៣០០គ្រួសាររស់នៅភូមិស្រយ៉ង់ខាងត្បូង ស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ បានលើកគ្នាធ្វើដំណើរមករាជធានីភ្នំពេញ ហើយឈរត្រៀមត្រាមុខរដ្ឋសភាជាតិដាក់ញត្តិសុំអន្តរាគមន៍ពីសម្តេចហេង សំរិន ប្រធានរដ្ឋសភា នាព្រឹកថ្ងៃទី៧ ខែកញ្ញា ។ ចំពោះញត្តិរបស់ប្រជាពលរដ្ឋខាងលើនេះ ខាងខុទ្ធកាល័យរដ្ឋសភាបានទទួលពីបងប្អូនប្រជាពលរដ្ឋហើយ ប៉ុន្តែពុំទាន់ដឹងថាមានដំណោះស្រាយយ៉ាងណានៅឡើយទេ ។
តាមប្រភពព័ត៌មានពីបងប្អូនប្រជាពលរដ្ឋខាងលើបានឱ្យដឹងថា ថ្មីៗនេះអាជ្ញាធរខេត្តព្រះវិហារបានចេញដីកាដកហូតនឹងឈូសឆាយដីស្រែ និងលំនៅឋានរបស់ពួកគាត់ឱ្យចេញពីតំបន់ដីខាងលើមិនឱ្យចូលទៅធ្វើចម្ការ ឬក៏បាញ់ថ្នាំសម្លាប់សត្វល្អិតក្នុងស្រែចម្ការទៀតផង ។ ផ្តើមចេញពីបញ្ហានេះហើយ ទើបពួកគាត់ទាំងអស់គ្នាមកតវ៉ាដល់មុខរដ្ឋសភា ដើម្បីសុំអន្តរាគមន៍ពីសម្តេចប្រធានរដ្ឋសភា ។ ប្រជាពលរដ្ឋបានលើកឡើងថា កាលពីថ្មីៗនេះ អាជ្ញាធរក្នុងស្រុកគូលែនបានឱ្យលោកគង់ សោភ័ណ្ឌ ប្រធានសុរិយោដីខេត្ត និងអាជ្ញាធរខេត្តព្រះវិហារឃុបឃិតជាមួយកងពលលេខ៤១ឱ្យឈ្មោះសាត់ ញ៉ក់ យកដីប្រជាពលរដ្ឋដាំដំណាំរបស់ក្រុមខ្លួនឯង ហើយម៉្យាងទៀតមិនឱ្យក្រុមយុវជនស្ម័គ្រចិត្តសម្តេចតេជោ ហ៊ុន សែន ចុះវាស់វែងដីជូនពួកគាត់ឡើយ ដោយអាជ្ញាធរសំអាងទៅលើលិខិតស.ជ.ណរបស់គណៈរដ្ឋមន្ត្រី ។
ប្រជាពលរដ្ឋបានលើកឡើងថា ក្រោយពីពួកគាត់បានឮសូរបទបញ្ជាលេខ១បានប្រកាសផ្សាយទូទាំងប្រទេសអំពីគោលនយោបាយចាស់ សកម្មភាពថ្មីលើវិស័យដីធ្លីរួចមក ពួកគាត់ទាំងអស់គ្នាបានធ្វើដំណើរមកភូមិគ្រឹះសម្តេចតេជោ ចំនួន២ដងរូចមកហើយ ។ ក្រោយមកទៀតមេទ័ពជួរមុខតំបន់ប្រាសាទព្រះវិហារលោកស្រី ឌិក និងលោកលឹម លាងសែ នាយករងខុទ្ធកាល័យនាយករដ្ឋមន្ត្រី បានសន្យាដោះស្រាយជូនពួកគាត់ជាហេតុធ្វើឱ្យគាត់មានក្តីសង្ឃឹមយ៉ាងខ្លាំង ។ ប៉ុន្តែរហូតដល់ពេលនេះនៅតែមិនទាន់មានដំណោះស្រាយជូនពួកគាត់នៅឡើយ ទើបនៅព្រឹកថ្ងៃទី៧ ខែកញ្ញា នេះពួកគាត់សម្រេចប្រមូលផ្តុំគ្នាមកតវ៉ានៅមុខភូមិគ្រឹះសម្តេច និងលោកជំទាវជាថ្មីម្តងទៀត ព្រមទាំងបានដាក់ញត្តិសុំអន្តរាគមន៍ពីរដ្ឋសភាជាតិផងដែរ ។
បងប្អូនប្រជាពលរដ្ឋខាងលើបាននិយាយថា ដីធ្លីរបស់គាត់ដែលត្រូវបានអាជ្ញាធរចេញដីកាដកហូតយកនោះ គឺពួកគាត់កាន់កាប់ ប្រើប្រាស់តាំងពីឆ្នាំ១៩៩៨មកម៉្លេះ ។ ដូច្នេះពួកគាត់ដាច់ខាតមិនយល់ព្រមតាមដីកាដកហូតដីធ្លីរបស់ពួកគាត់ពីសំណាក់អាជ្ញាធរខេត្តព្រះវិហារឡើយ ។ ក្តីសង្ឃឹមចុងក្រោយ គឺពួកគាត់សង្ឃឹមលើសម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត រួមជាមួយនឹងសម្តេចប្រធានរដ្ឋសភាជាតិប្រាកដជាជួយអន្តរាគមន៍ដល់ពួកគាត់ជាមិនខានឡើយ ៕
ចែករំលែកព័តមាននេះ