រាជធានីភ្នំពេញ ៖ កម្មករកាត់ដេររោងចក្រថម ហ្វម ប្រមាណ៣០០នាក់ក្នុងចំណោមកម្មករទាំងអស់ចំនួន៦២០នាក់ បានលើកគ្នាមកធ្វើបាតុកម្មនៅតាមដងផ្លូវជាតិលេខ៥ មុខឃ្លាំងសាំងសូគីម៉ិច ស្ថិតក្នុងសង្កាត់ឫស្សីកែវ ខណ្ឌឫស្សីកែវ ដោយឈរត្រៀបត្រាលើកបដា និងរូបថតសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើម្បីទាមទារឱ្យមានការដោះស្រាយ ។
ការតវ៉ានេះបានធ្វើឡើងកាលពីវេលាម៉ោង៧ និង៣០នាទីព្រឹកថ្ងៃទី៦ កញ្ញា បន្ទាប់ពីពួកគេបាននាំគ្នាធ្វើកូដកម្មនៅក្នុងរោងចក្រ និងដុតកង់រថយន្តនៅមុខរោងចក្រ ស្ថិតនៅភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រយៈពេល៦ថ្ងៃមកហើយ ពុំមានការដោះស្រាយ ដែលអាចឱ្យពួកគេទទួលយកបាន ។ ទោះបីជាយ៉ាងណា ប្រភពពីរោងចក្រថាការដឹកនាំកម្មករធ្វើបាតុកម្មនេះគឺបង្កឡើងដោយសហជីពមកពីខាងក្រៅដែលមិនមានបញ្ជកានៅក្នុងរោងចក្រ ទើបរោងចក្រមិនព្រមជួបដោះស្រាយ ។
តាមព័ត៌មានឱ្យដឹងថា នៅព្រឹកនោះកម្មករបានឈរត្រៀបត្រានៅលើសួនមុខឃ្លាំងសាំងដោយកាន់បដា និងរូបថតសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ទទូចសុំឱ្យសម្តេចជួយដោះស្រាយ ព្រោះនេះជាថ្ងៃទី៦ហើយនៅតែមិនមានដំណោះស្រាយ ។
កម្មករបានឱ្យដឹងថា រោងចក្រថម ហ្វម នេះមានកម្មករចំនួន៦០២នាក់ ដែលបាននាំគ្នាធ្វើកូដកម្មតាំងពីព្រឹកថ្ងៃសុក្រទី៣១ សីហា កន្លងមក ដែលមុនដំបូងនាំគ្នាធ្វើកូដកម្មក្នុងរោងចក្រ ដើម្បីទាមទារលក្ខខណ្ឌការងារចំនួន៤ចំណុចទេ តែពុំមានដំណោះស្រាយ ហើយនៅព្រឹកថ្ងៃទី១ កញ្ញា ក៏បាននាំគ្នាចេញមកមុខរោងចក្រទាមទាររហូតដល់១៦ចំណុចនៅតែគ្មានដំណោះស្រាយ ។ ក្នុងរយៈពេលតវ៉ាពួកគាត់បានដុតកង់រថយន្តកាលពីល្ងាចថ្ងៃទី៥ កញ្ញា នៅមុខរោងចក្រ ហើយព្រឹកនេះទើបនាំគ្នាលើកគ្នាមកកាន់ផ្លូវជាតិដើម្បីទាមទារឱ្យមានដំណោះស្រាយ។
ចំណុចទាំង១៦ដែលកម្មករទាមទារនោះគឺ
១-សូមឱ្យក្រុមហ៊ុនផ្តល់លុយបាយ៤ពាន់រៀល នៅពេលថែមម៉ោង២ម៉ោង ។
២-សុំកុំកាត់ប្រាក់កម្មករបង់ពន្ធអាករដ្ឋ ។
៣-នៅពេលកម្មករមកធ្វើការយឺតម្តងម្កាលកុំកាត់ប្រាក់រង្វាន់ ។
៤-សូមក្រុមហ៊ុនកាត់បន្ថយកម្តៅក្នុងកន្លែងធ្វើការ និងរៀបចំច្រកចេញចូលដើម្បីបង្ការគ្រោះថ្នាក់ផ្សេងៗ ។
៥-ក្រុមហ៊ុនត្រូវសង់រោងដាក់កង់ម៉ូតូឱ្យកម្មករ។
៦-សុំក្រុមហ៊ុនអនុញ្ញាតឱ្យស្ត្រីទៅពិនិត្យផ្ទៃពោះ១ថ្ងៃក្នុង១ខែ ។
៧-កម្មករគ្រោះថ្នាក់ការងារក្រុមហ៊ុនចេញថ្លៃព្យាបាលទាំងស្រុង ដោយរក្សាប្រាក់ឈ្នួល និងប្រាក់រង្វាន់ផ្សេងៗនៅដដែល ។
៨-សុំក្រុមហ៊ុនផ្តល់ប្រាក់ស្នាក់នៅ និងថ្លៃធ្វើដំណើរ៧ដុល្លារ និងប្រាក់រង្វាន់១០ដុល្លារ ។
៩-ក្រុមហ៊ុនអនុញ្ញាតឱ្យស្ត្រីមានផ្ទៃពោះចេញមុនម៉ោង១៥នាទី ។
១០-សុំឱ្យកម្មករប្រើច្បាប់ឈប់សម្រាកពិសេស ។
១១-នៅពេលកម្មករឈប់សម្រាកព្យាបាលជំងឺមានសំបុត្រពេទ្យសុំរក្សាប្រាក់ឈ្នួល និងប្រាក់រង្វាន់ ។
១២-សុំអនុញ្ញាតឱ្យកម្មករប្រើប្រាស់ការឈប់សម្រាកប្រចាំឆ្នាំនៅពេលមានធុរៈផ្សេងៗ ។
១៣-សុំក្រុមហ៊ុនរៀបចំកូដមេដៃចំនួន៣ដងក្នុង១ថ្ងៃ ។
១៤-សុំក្រុមហ៊ុនទទួលសំបុត្រពេទ្យគ្រប់មជ្ឈដ្ឋានដែលទទួលស្គាល់ដោយពេទ្យរដ្ឋ ។
១៥-សុំដករដ្ឋបាលចេញ និង ១៦-សុំក្រុមហ៊ុនបើកលុយបាយក្នុងមួយអាទិត្យម្តង ។
ការធ្វើកូដកម្មរហូតដល់ម៉ោង១១ព្រឹក កម្មករក៏បានដង្ហែទៅកាន់សាលារាជធានីភ្នំពេញ ដែលការដង្ហែរហូតដល់ភូមិសាមគ្គី ត្រូវបានលោកកូប ស្លេះ អភិបាលរងខណ្ឌឫស្សីកែវ រួមទាំងសមត្ថកិច្ចព្យាយាមឃាត់ និងធ្វើការសម្របសម្រួល និងដោយមានការចូលរួមពីមន្ត្រីក្រសួងការងារផង ក្រុមកម្មករបានបំបែកគ្នារង់ចាំការដោះស្រាយនៅក្រសួងការងារ ។
លោកកូប ស្លេះ អភិបាលរងខណ្ឌឫស្សីកែវ បានឱ្យដឹងថា តាមជំហរថៅកែរោងចក្រគាត់មានចិត្តដោះស្រាយជាមួយកម្មករ តែមិនដោះស្រាយជាមួយសហជីពដែលមកពីខាងក្រៅឡើយ ។ បើពុំដូច្នេះទេ រោងចក្រសុខចិត្តបិទទ្វារ៕
ចែករំលែកព័តមាននេះ