ខេត្តកំពង់ស្ពឺ ៖ ក្រសួងបរិស្ថាន រកឃើញថា រោងចក្រផលិតថ្នាំជក់ កោះប៉ែន ដែលមានទីតាំងស្ថិតនៅក្នុងភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ…
ខេត្តកំពង់ស្ពឺ ៖ ក្រសួងបរិស្ថាន រកឃើញថា រោងចក្រផលិតថ្នាំជក់ កោះប៉ែន ដែលមានទីតាំងស្ថិតនៅក្នុងភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ បង្កឱ្យភាពកខ្វក់ក្នុងខ្យល់បង្កការប៉ះពាល់បរិស្ថាន ។
បន្ទាប់ពីមានសេចក្តីរាយការណ៍ពីប្រជាពលរដ្ឋ និងអាជ្ញាធរមូលដ្ឋាន រួមជាមួយការចុះពិនិត្យផ្ទាល់ មន្ត្រីក្រសួងបរិស្ថាន ដឹកនាំដោយលោក អ៊ុង វុទ្ធី អនុប្រធាននាយកដ្ឋាននៃអគ្គនាយកដ្ឋានគាំពារបរិស្ថាន កាលពីថ្ងៃទី១២ ខែកក្កដា ឆ្នាំ២០២៥ កន្លងទៅថ្មីៗនេះបានរកឃើញការបង្កឱ្យមានភាពកខ្វក់ក្នុងខ្យល់បង្កឡើងដោយរោងចក្រ កែច្នៃសន្លឹកថ្នាំជក់ កោះប៉ែន ស្ថិតនៅក្នុងភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ ។
ប្រជាពលរដ្ឋ ដែលរស់នៅក្បែរតំបន់រោងចក្រ ក៏ដូចជា អាជ្ញាធរមូលដ្ឋាន បានបញ្ជាក់ដូចគ្នាថា ពិតជាមានក្លិនឈួលថ្នាំ ហើយម្តងម្កាលពិបាកទ្រាំខ្លាំងណាស់ ។ ពួកគាត់មានការព្រួយបារម្ភចំពោះការប៉ះពាល់ដល់សុខភាពក្នុងការរស់នៅ ។
ជាមួយគ្នានេះ ក្រុមការងាររបស់ក្រសួងបរិស្ថាន ក៏បានរកឃើញថារោងចក្រ បានបើកដំណើការតាំងពីដើមឆ្នាំ២០២៥ ដោយពុំមានលិខិតអនុញ្ញាតពាក់ព័ន្ធការគ្រប់គ្រងបរិស្ថានពីមន្ទីរ ឬក្រសួងបរិស្ថាននោះទេ ។ ការទុកដាក់វត្ថុធាតុដើម ផលិតផល និងសំណល់ មិនបានត្រឹមត្រូវ បង្កឱ្យមានក្លិនទៅក្នុងបរិស្ថានដោយផ្ទាល់ ។
លើសពីនេះ រោងចក្រខាងលើ មិនបានរៀបចំប្រព័ន្ធបច្ចេកទេសបរិស្ថាន ដូចជា ប្រព័ន្ធបឺតធូលី និងការបំពាក់ឧបករណ៍កាត់បន្ថយក្លិនកខ្វក់ ។
រោងចក្រខាងលើនេះ ប្រឈមនឹងបញ្ហាក្រុមការងារជំនាញក្រសួង បរិស្ថាន បានអនុវត្តវិធានការមួយចំនួន ៖
– អគារផលិកម្មត្រូវរៀបចំ ជាបន្ទប់ខណ្ឌឱ្យដាច់ពីរវាង ផ្នែកផលិតកម្ម ផ្នែកស្តុកវត្ថុធាតុដើម និងផលិតផលសម្រេច
– ត្រូវបំពាក់ប្រព័ន្ធបឺតខ្យល់ និងឧបករណ៍ស្ទាក់ចាប់ធូលី និងក្លិនឱ្យបានគ្រប់គ្រាន់នៅផ្នែកផលិតកម្ម
– ធូលីដែលបានបឺតចេញពីច្រវ៉ាក់ផលិតកម្ម ត្រូវបញ្ចូលទៅក្នុងស៊ីឡូត្រឹមត្រូវ
– ត្រូវស្នើសុំលិខិតអនុញ្ញាត ពាក់ព័ន្ធនឹងការគ្រប់គ្រងបរិស្ថានពីមន្ទីរ ឬក្រសួងបរិស្ថាន ដើម្បីអនុវត្តបទដ្ឋានបរិស្ថានឱ្យបានត្រូវត្រូវ ។ ក្រុមការងារនឹងបន្តពិនិត្យ និងតាមដានការអនុវត្តវិធានការ ស្របទៅតាមក្រមបរិស្ថាន និងធនធានធម្មជាតិ៕
ចែករំលែកព័តមាននេះ