យោង​​តាម​​លោក Eddie Jordan​ប្រ​ធាន​​ក្រុម​​អ្នក​​វិ​ភាគ​​ប្រ​ចាំ​ BBC F1ឱ្យ​​ដឹង​​ថា កីឡាករ​អង់​គ្លេស Lewis Hamiltonគ្រោង​នឹង​ចាក​ចេញ​ពី​ក្រុម MacLarenទៅ​បើក​បរ​ឱ្យ​ក្រុម​ Mercedesនៅ​រដូវ​កាល​ប្រ​ណាំង​ឆ្នាំ​២០១៣ ។អតី​ត​ប្រ​ធាន​​ក្រុម​រូបនេះ​បាន​និយាយ​ថា Hamiltonនឹង​ចូល​ទៅ​ជំ​នួស​កីឡាករ​អា​ល្លឺ​ម៉ង់​ Michael Schumacherដែល​នឹង​ចូល​និ​វត្តន៍​ជា​លើក​ទី​២​នៅ​ដំ​ណាច់​ឆ្នាំ​នេះ ។

លោក​ Jordan​បាន​ថ្លែង​ថា​៖«ខ្ញុំ​ជឿ​ថា កីឡាករ​ Hamilton​ន​ិង​​ក្រុម​ Mercedesពិត​ជា​បាន​ព្រម​ព្រៀង​គ្នា​ជា​លក្ខណ​​ៈបុគ្គល​រួច​ជា​ស្រេច​ហើយ​ៗ​ កុង​ត្រា​ពិត​ប្រា​កដ​មួយ​នឹង​លេចចេញ​ជា​រូប​រាង​ក្នុង​ពេល​ឆាប់​ៗ​នេះ »។​ក្រុម​ Mercedesនៅ​​ក្នុង​សេចក្តី​ប្រ​កាស​មួយ​បាន​និយាយ​ថា ខ្លួន​មិន​និយាយ​អំពី​បញ្ហា​នេះ​ទេ ។ ប៉ុន្តែ​គេ​បាន​បន្ថែម​ថា ៖«ដរាប​ណា​មិន​ទាន់​ដល់​ពេល​ប្រ​កាស​ពី​បញ្ជី​ឈ្មោះ​កីឡាករ​ប្រ​ណាំង​ក្នុង​រដូវ​កាល​ឆ្នាំ​ក្រោយ​ វា​នៅ​តែ​មិន​ទាន់​ច្បាស់​ដែល​ថា យើង​ចាត់​ទុក​បញ្ហា​នេះ​ជា​ការ​ពិត​នោះ​ទេ »។

ឯអ្នក​នាំ​ពាក្យ​របស់​ក្រុម McLarenបាន​ថ្លែង​ថា​៖«ក្រុម​អ្នក​រៀប​ចំ​ការងារ​របស់​កីឡាករ Hamiltonបាន​ប្រាប់​យើង​ថា រឿង​នេះ​មិន​ពិត​ទេ ។ ពេល​នេះ​ការចរចា​លើ​កុង​ត្រា​ថ្មី​រវាង​ Hamiltonនិង​ក្រុម  McLaren​កំពុង​តែ​បន្ត​ »។​ទោះ​ជា​យ៉ាង​ណា លោក Jordanបាន​បញ្ជាក់​ថា ខ្លួន​ដឹង​ច្បាស់​ថា​ Hamiltonមិន​ទាន់​បាន​ចុះ​កុង​ត្រា​ថ្មី​ជា​មួយ​ជា​មួយ​ក្រុម MacLarenនៅ​ឡើយ​ទេ ហើយ​នេះ​ក៏​ជា​ការ​បើក​ផ្លូវ​មួយ​សម្រាប់រូប​គេ​ចូល​រួម​ជា​មួយ​ក្រុម Mercedes  ។

​ប្រ​សិន​ជា​កីឡាករ Hamilton​ចាក​ចេញ​មែន​ វា​នឹង​ធ្វើ​​ក្រុម McLarenជួប​នឹង​បញ្ហា​ដ៏​ធំ​មួយ​ជា​ពិ​សេស​លើ​ការ​ស្វែង​កីឡាករ​ជំ​នួស​ដែល​មាន​សមត្ថ​ភាព​ប្រ​ហាក់​ប្រ​ហែល​គេ​ ។ នៅ​លើ​តារាង​ជើង​ឯក​ពិភពលោក​វិញ Hamiltonក្នុង​ពេល​ឥឡូវ​នេះ​ស្ថិត​នៅ​លំ​ដាប់​ទី​៥​មាន​១១៧​ពិន្ទុ គឺ​៤៧​ពិន្ទុ​តាម​ពី​ក្រោយ​កីឡាករ​នាំ​មុខ​ Fernando Alonso  ៕