កីឡាករអេស្ប៉ាញអាល់បឺតូ កុងតាឌ័របានបង្ហាញឱ្យឃើញនូវភាពខ្លាំងរបស់ខ្លួនជាដដែលបន្ទាប់ពីបានយកឈ្នះដំណាក់ទី១៧នៃក្របខណ្ឌ Tour of Spain កាលពីថ្ងៃពុធទី៥ខែកញ្ញាកន្លងមកនេះ ។ ការប្រណាំងក្នុងដំណាក់ខាងលើនេះត្រូវបានបញ្ចប់នៅទីក្រុង Fuente Déប្រទេសអេស្ប៉ាញ ។
កីឡាករអេស្ប៉ាញអាល់បឺតូ កុងតាឌ័របានបង្ហាញឱ្យឃើញនូវភាពខ្លាំងរបស់ខ្លួនជាដដែលបន្ទាប់ពីបានយកឈ្នះដំណាក់ទី១៧នៃក្របខណ្ឌ Tour of Spain កាលពីថ្ងៃពុធទី៥ខែកញ្ញាកន្លងមកនេះ ។ ការប្រណាំងក្នុងដំណាក់ខាងលើនេះត្រូវបានបញ្ចប់នៅទីក្រុង Fuente Déប្រទេសអេស្ប៉ាញ ។
កុងតាឌ័រដែលជាអ្នកជិះកង់ឱ្យក្រុម Saxo Bankបានយកឈ្នះដំណាក់ដែលមានចម្ងាយផ្លូវ១៨៧.៣គីឡូម៉ែត្រចេញដំណើរពីទីក្រុង Santanderឆ្ពោះទៅកាន់ទីក្រុង Fuente Dé ប្រទេសអេស្ប៉ាញដោយប្រើអស់ថិរវេលា៤ម៉ោង២៩នាទីនិង២០វិនាទីយកឈ្នះកីឡាករមិត្តរួមជាតិ Alejandro Valverdeជិះឱ្យក្រុម Movistar Teamដែលបានប្រើថិរវេលាច្រើនជាង ៦វិនាទី ស្មើជាមួយកីឡាករកូឡុំប៊ី Sergio Luis Henao Montoyaដែលជិះឱ្យក្រុមប្រណាំង Sky Procycling ។
ថ្លែងបន្ទាប់ពីទទួលបានជ័យជម្នះ កុងតាឌ័របានបញ្ជាក់ដោយក្តីរីករាយថា៖«បើនិយាយឱ្យពិតប្រាកដនោះ ខ្ញុំមិនទាន់បានត្រៀមខ្លួនឱ្យបានល្អបំផុតនោះទេ ប៉ុន្តែបំណងចង់ឈ្នះពិតជាមាន ។ ត្រឹមចំណាត់លេខ២ក៏ល្អដែរ តែឈ្នះដូចជាពេលនេះពិតជាល្អកាន់តែខ្លាំង ។ ខ្ញុំគិតថា ពេលនេះខ្ញុំកំពុងតែបោះជំហ៊ានទៅមុខ ។ ខ្ញុំសូមផ្ញើជ័យជម្នះនេះជូនអ្នកគ្រប់គ្នាដែលគាំទ្រខ្ញុំ »។
ជ័យជម្នះរបស់កីឡាករកុងតាឌ័រក្នុងដំណាក់នេះ ពិតជាមានន័យខ្លាំងណាស់ដ្បិតវាអាចជួយឱ្យរូបគេយកឈ្នះការនាំមុខនៅលើតារាងថិរវេលាសរុបទៀតផង ។
ឆ្លងកាត់ការប្រណាំងចំនួន១៧ដំណាក់មកនេះកុងតាឌ័របានប្រើអស់ថិរវេលាតិចជាងគេបំផុតគឺ៦៨ម៉ោង០៧នាទីនិង៥៤វិនាទីនាំមុខកីឡាករមិត្តរួមជាតិ Alejandro Valverde ដែលបានប្រើថិរវេលាច្រើនជាង១នាទីនិង៥២វិនាទី។ ស្ថិតនៅលំដាប់ទី៣គឺជាកីឡាករអេស្ប៉ាញដដែល ។ Joaquim Rodriguezដែលជិះកង់ឱ្យក្រុម Katusha Teamប្រើថិរវេលាច្រើនជាងកីឡាករកុងតាឌ័រ ២នាទីនិង២៨វិនាទី ។
សូមបញ្ជាក់ថាការប្រណាំងកម្មវិធី Tour of Spainឆ្នាំនេះចែកចេញជា២១ដំណាក់និងមានចម្ងាយផ្លូវសរុប៣៣៦០គីឡូម៉ែត្រ។ ដោយឡែកដំណាក់ទី១៨ដែលជាដំណាក់បន្តមានចម្ងាយផ្លូវ២០៤.៥គីឡូម៉ែត្រចេញដំណើរពីទីក្រុង Aguilar de Campooឆ្ពោះទៅកាន់ទីក្រុង Valladolid ប្រទេសអេស្ប៉ាញ ៕
ចែករំលែកព័តមាននេះ