ADផ្ទាំងផ្សព្វផ្សាយពាណិជ្ជកម្ម

សារ៉ាប៉ូវ៉ានិងនាងស៊េរីណាឈានចូលដល់វគ្គពាក់កណ្តាលផ្តាច់ព្រ័ត្រប្រកួតវាយកូនបាល់ U.S. Open

12 ឆ្នាំ មុន

០៦ ខែ កញ្ញា ឆ្នាំ ២០១២ ម៉ោង ០១:៣០

កីឡាការិនីរុស្ស៊ីម៉ារីយ៉ា សារ៉ាប៉ូវ៉ាបានឈានចូលដល់វគ្គពាក់កណ្តាលផ្តាច់ព្រ័ត្រក្របខណ្ឌ U.S. Openជាលើកទី១របស់ខ្លួនចាប់តាំងពីឆ្នាំ២០០៦បន្ទាប់ពីបានបំបាក់កីឡាការិនីបារាំងMarion Bartoliនៅវគ្គ១/៤ផ្តាច់ព្រ័ត្រកាលពីថ្ងៃពុធទី៥កញ្ញាកន្លងមកនេះ ។ ស្របពេលជាមួយគ្នានោះ កីឡាការិនីម្ចាស់ផ្ទះស៊េរីណា វីលៀមក៏ទទួលបានភាពរីករាយឡើងទៅវគ្គបន្តផងដែរ ។

នៅលើទីលានប្រកួត USTA Billie Jean King National Tennis Centerស្ថិតក្នុងទីក្រុងញូវយ៉ក សារ៉ាប៉ូវ៉ាក្នុងនាមជាម្ចាស់ជើងឯកនេះកាលពីឆ្នាំ២០០៦បានយកឈ្នះនាង Bartoliក្នុងលទ្ធផល៣-៦,៦-៣និង៦-៤ឆ្លងផុតវគ្គ១/៤ផ្តាច់ព្រ័ត្រដោយក្តីរីករាយ។ នាងបានថ្លែងថា៖«ខ្ញុំបានព្យាយាមមិនគិតពីការពន្យាពេលការប្រកួតនោះទេ ។ ប៉ុន្តែវាជារឿងល្អមួយដែលយើងសម្រាកអស់មួយយប់ហើយវិលមកប្រកួតជាថ្មី »។

ជាមួយនឹងជ័យជម្នះលើកនេះ នាំឱ្យនាងសារ៉ាប៉ូវ៉ាកាន់តែខិតចូលទៅរកពានជើងឯកជាថ្មី ។ កាលពីខែមិថុនា នាងបានយកឈ្នះពានក្របខណ្ឌ French Open បន្ទាប់មកក្នុងខែសីហា នាងក៏បានយកឈ្នះមេដាយប្រាក់កីឡាអូឡាំពិកក្រុងឡុងនៅប្រទេសអង់គ្លេស ។ សមិទ្ធផលទាំងនេះបានធ្វើឱ្យប្រជាប្រិយភាពរបស់នាងឡើងមួយកម្រិតថែមទៀត ។ និយាយជារួម នៅឆ្នាំនេះ មិនមានអ្នកណាម្នាក់យកឈ្នះនាងក្នុងកម្មវិធីប្រកួតណាមួយនៅឡើយទេ ។ ប៉ុន្តែការប្រកួតក្នុងវគ្គនេះ នៅសិតដំបូងនាងធ្វើមិនបានល្អឡើយ ។ នាងបានថ្លែងថា ៖«ខ្ញុំមិនមានអារម្មណ៍ល្អនោះទេដែលបន្តប្រកួតជាថ្មីដោយខ្លួនឯងចាញ់សិតទី១នោះ ។ ទោះជាយ៉ាងណា ជាមួយនឹងសំណាងបន្តិចបន្តួច ខ្ញុំនៅតែអាចឆ្លងផុតវគ្គនេះ »។

នៅវគ្គបន្ទាប់ នាងនឹងប៉ះជាមួយកីឡាការិនីលំដាប់ទី១ពិភពលោកវិចតូរីយ៉ា អាហ្សារេនកា ។ បង្ហាញពីចំណាប់អារម្មណ៍របស់ខ្លួនក្នុងការជួបជាមួយអាហ្សារេនកាលើកនេះ សារ៉ាប៉ូវ៉ាបានបញ្ជាក់ថា ៖«កាលពីប្រកួតក្នុងក្របខណ្ឌ Australian Open អាហ្សារេនកាបានផ្តួលខ្ញុំដោយងាយស្រួល ។ ដូច្នេះ នេះជាពេលដែលខ្ញុំត្រូវសងសឹកនាងវិញ »។

ចំណែកនាងស៊េរីណា វីលៀមដែលជាម្ចាស់ជើងឯក U.S. Open៣ជំនាន់បានយកឈ្នះកីឡាការិនីស៊ែប៊ីអាណា អុីវ៉ាណូវិចក្នុងលទ្ធផល ៦-១និង៦-៣ដោយប្រើពេល ៥៨នាទី ។ នេះជាលើកទី៤ហើយដែលនាងឈានចូលដល់វគ្គពាក់កណ្តាលផ្តាច់ព្រ័ត្រក្របខណ្ឌ U.S. Openនិងជាលើកទី២២នៃក្របខណ្ឌធំទាំង៤ ។ នៅវគ្គបន្ទាប់ នាងនឹងប៉ះជាមួយកីឡាការិនីអុីតាលី Sara Erraniដែលបានយកឈ្នះកីឡាការិនីមិត្តរួមជាតិខ្លួន Roberta Vinciក្នុងលទ្ធផល ៦-២និង៦-៤ ។ សម្រាប់ Erraniនាងគឺជាកីឡាការិនីអុីតាលីដំបូងគេហើយដែលបានឈានចូលដល់វគ្គពាក់កណ្តាលផ្តាច់ព្រ័ត្រ U.S. Open ។ និយាយពីការជួបជាមួយនាង Errani ស៊េរីណាបានបញ្ជាក់ថា ៖«នេះជាការចាប់គូដ៏ល្អមួយ ។ នាង Erraniគឺជាជើងខ្លាំង មានបច្ចេកទេសប្រកួតល្អនិងរហ័សរហួន »។

ដោយឡែកលទ្ធផលនៃការប្រកួតឯកត្តជនផ្នែកបុរសវិញ អ៊ែនឌី មូរ៉េបំបាក់កីឡាករក្រូអាស៊ី Marin Cilicក្នុងលទ្ធផល ៣-៦,៧-៦៦-២និង៦-០ ។ កីឡាករអង់គ្លេសរូបនេះបានថ្លែងថា៖«ខ្ញុំធ្លាប់ឆ្លងកាត់ការប្រកួតពិបាកៗជាច្រើន ហើយគ្រប់ពេល ខ្ញុំតែងតែបានជោគជ័យ »។នៅវគ្គបន្ទាប់ មូរ៉េនឹងជួបប្រកួតជាមួយរ៉ូជើ ហ្វេដឺរ័រឬ Tomas Berdych ៕

ADផ្ទាំងផ្សព្វផ្សាយពាណិជ្ជកម្ម

អត្តបទផ្សេងៗទៀត