ខេត្តក្រចេះ ៖ មកទល់នឹងពេលនេះអាជ្ញាធរខេត្ត និងក្រុងក្រចេះនៅតែមិនទាន់មានចំណាត់ការណាមួយលើសណ្តាប់ធ្នាប់ ផ្សារអូរឫស្សី ដែលមានទីតាំងនៅសង្កាត់អូរឫស្សីក្រុងក្រចេះនោះឡើយ បើទោះបីជាបច្ចុប្បន្ននេះក្នុងបរិវេណផ្សារត្រូវបានអាជីវករមួយចំនួនធំកំពុងតែបង្កើតសំណង់អនាធិបតេយ្យធ្វើជាផ្ទះផ្សារកំពុងតែដុះដាល ហើយរឿងជម្លោះដីធ្លីរបស់ពលរដ្ឋក្នុងផ្សារក៏កាន់តែខ្លាំងឡើងៗយ៉ាងពេញបន្ទុកផងនោះ ។
ផ្សារអូរឫស្សីមានទីតាំងនៅសង្កាត់អូរឫស្សី ក្រុងក្រចេះ មានចម្ងាយជាង២គីឡូម៉ែត្រពីទីប្រជុំជនខេត្តក្រចេះ។ ផ្សារមួយនេះត្រូវបានពលរដ្ឋចាត់ទុកថា ជាផ្សារធំទីពីរបន្ទាប់ពីផ្សារសាមគ្គីក្រុងក្រចេះ។ ប្រជាពលរដ្ឋនិយាយថា ការគ្មានសណ្តាប់ធ្នាប់របស់អ្នកលក់ដូរក្នុងផ្សារអូរឫស្សីនេះ គឺកើតមានជាងមួយទសវត្សរ៍មកហើយ តាំងពីមន្ត្រីថ្នាក់អភិបាលស្រុករហូតកែប្រែជាអភិបាលក្រុងជាច្រើនជំនាន់ក៏នៅតែមិនមានវិធានការលុបបំបាត់ និងរៀបចំការដាក់តាំងលក់របស់ក្រុមអាជីវករជាផ្ទះផ្សារទាំងនេះឱ្យមានរបៀបរៀបរយនៅឡើយទេ ។
ពលរដ្ឋជាអាជីវករឱ្យដឹងថា កន្លងមករយៈពេលថ្មីៗនេះ ក្រោយពីមានអ្នកមករៀបចំដេញផាស៊ី ផ្សារនេះក៏បានកែប្រែភាពអនាធិបតេយ្យសម្រាប់ក្នុងផ្សារ បានមួយចំណែកធំ ហើយទោះបីជាយ៉ាងណាក៏នៅតែគ្មានសោភ័ណភាព ខណៈពេលដែលក្រុមអ្នកសង់ផ្ទះជាផ្សារនៅតែមិនសហការជាមួយអាជ្ញាធរ បន្តសាងសង់ផ្ទះពេញក្នុងផ្សារស្ទើរតែកែប្រែជាតំបន់ផ្សារអនាធិបតេយ្យទៅហើយនោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ