រាជធានីភ្នំពេញ ៖ ស្ត្រីម្នាក់ និងប្រុសដែលជាសហាយស្មន់ត្រូវបានបុរសជាប្តីតាមទាន់ ខណៈកំពុងដេកនៅក្នុងបន្ទប់ផ្ទះជួលមួយកន្លែងជាមួយគ្នាយ៉ាងផ្អែមល្ហែម និងបានក្រេបទឹកឃ្មុំជាមួយគ្នាអស់ពេញមួយរាត្រីមកហើយ លុះព្រឹកឡើងត្រូវបុរសជាប្តីតាមទាន់ឃាត់ខ្លួនទាំង២នាក់ប្រគល់ឱ្យប៉ូលិសដើម្បីសួរនាំ និងកសាងសំណុំរឿង មិនតែប៉ុណ្ណោះបុរសជាប្តីបានទាមទារសំណងបណ្ណាការពីប្រពន្ធ និងប្រុសសាហាយជាទឹកប្រាក់ចំនួន២០លានរៀលទៀតផង ។
ហេតុការណ៍នោះបានកើតឡើងកាលពីវេលាម៉ោង៦និង១០នាទីព្រឹកថ្ងៃទី៥ កញ្ញា ២០១២ នៅចំណុចបន្ទប់ផ្ទះជួលក្រុមទី១១ ភូមិប៉ប្រកខាងត្បូងសង្កាត់កាកាប ខណ្ឌពោធិ៍សែនជ័យ ។ បុរសជាប្តីឈ្មោះយឹម ប៊ុនឈឿន អាយុ៣២ឆ្នាំ មានទីលំនៅភូមិសារិកាកែវ ឃុំជើងរាស់ ស្រុកឧដុង្គ ខេត្តកំពង់ស្ពឺ ចំណែកស្ត្រីជាប្រពន្ធដែលលួចលាក់មានសហាយស្មន់ក្បត់ចិត្តប្តីនោះឈ្មោះផន ផល្លា អាយុ២៩ឆ្នាំ មានស្រុកកំណើតភូមិជ្រលង សង្កាត់ទឹកល្អក់ ខណ្ឌព្រៃនប់ ខេត្តព្រះសីហនុ សព្វថ្ងៃរស់នៅស្រុកកំណើតខាងប្តីក្នុងខេត្តកំពង់ស្ពឺ ។ ដោយឡែកជនជាប់ចោទជាប្រុសសាហាយស្មន់ត្រូវបានគេស្គាល់ឈ្មោះទូច សុធី អាយុ៤២ឆ្នាំ ជាទាហានជើងទឹក មានទីលំនៅក្នុងសង្កាត់ជ្រោយចង្វា ខណ្ឌឫស្សីកែវ ។
ប្រភពព័ត៌មានពីសមត្ថកិច្ចឱ្យដឹងថា ប្តីប្រពន្ធមួយគូនេះបានរៀបការត្រឹមត្រូវតាមច្បាប់ និងបានកូនប្រុស២នាក់ទៅហើយ នៅរយៈពេលជាង៥ខែចុងក្រោយនេះស្ត្រីប្រពន្ធបានទៅធ្វើការងារជាកម្មការិនីរោងចក្រ រីឯបុរសជាប្តីបចេញទៅរកស៊ីនៅប្រទេសថៃ ។ នៅក្នុងអំឡុងពេលដែលប្តីចាកចេញទៅបាត់ នាងជាប្រពន្ធបានមានគំនិតមិនស្មោះត្រង់ផិតក្បត់លួចលាក់មានសហាយស្មន់ជាមួយនឹងបុរសឈ្មោះទូច សុធី ដែលជាទាហានជើងទឹក ហើយបាននាំគ្នាជួលផ្ទះស្នាក់នៅជាមួយគ្នាយ៉ាងល្អូកល្អិនបំផុតចោលកូនប្រុស២នាក់ និងប្តី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ