ខេត្តស្វាយរៀង ៖ ភាពរាំងស្ងួតបានអូសបន្លាយជិត៣ខែនាដើមរដូវវស្សានេះបណ្តាលឱ្យសំណាប ស្រូវពង្រោះ និងសន្ទូងរងការប៉ះពាល់យ៉ាងខ្លាំង ក្រៀមស្វិតស្រពោន និងងាប់អស់រាប់ពាន់ហិកតា ហើយភ្លៀងធ្លាក់មិនគ្រប់គ្រាន់រហូតដល់៦ស្រុក-ក្រុង ៣៣ឃុំស្មើនឹង១៨៥ភូមិ ដែលគួរឱ្យព្រួយបារម្ភ ប៉ុន្តែត្រូវបានអាជ្ញាធរគ្រប់លំដាប់ថ្នាក់មន្ត្រីមន្ទីរកសិកម្មខេត្ត មន្ទីរធនធានទឹក និងឧតុនិយមខេត្តបើកយុទ្ធនាការសង្គ្រោះបូមទឹក និងផ្តល់ស្រូវពូជ និងជួយភ្ជួររាស់ ប្រជាកសិករដើម្បីធ្វើឱ្យសម្រេចផែនការផលិតកម្មកសិកម្ម២០១២ ឱ្យទាន់តាមរដូវកាល ។
ទាក់ទិននឹងស្ថានភាពទឹកភ្លៀង និងការងារនៃយុទ្ធនាការនេះលោកថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបានមានប្រសាសន៍ថា មកដល់ថ្ងៃទី៤ កញ្ញា ២០១២ ស្ថានភាពទឹកភ្លៀងធ្លាក់គ្រប់គ្រាន់មានតែ២ស្រុកប៉ុណ្ណោះ គឺស្រុករមាសហែក និងក្រុងស្វាយរៀង ហើយចំនួន៦ស្រុក-ក្រុងទៀត គឺពុំមានភ្លៀងធ្លាក់គ្រប់គ្រាន់ទេ ក្នុងនោះជួបភាពរាំងស្ងួតធ្ងន់ធ្ងរចំនួន២ស្រុក ១ក្រុង គឺស្រុកស្វាយទាប ស្រុកកំពង់រោទិ៍ និងក្រុងបាវិត ។ លោកថាច់ រតនា បន្តទៀតថា កសិកម្មសរុបភ្ជួរដាស់ដីបាន១៥៧.៦៦៣ហិកតា ដោយមានគ្រឿងយន្តកសិកម្មភ្ជួររាស់ចំនួន៧៥.៩៤៧គ្រឿង សាបបានចំនួន១០.២៩៧ហិកតា ស្ទូងបានចំនួន១១២.៧៣៤ហិកតា និងស្រូវពង្រោះបានចំនួន៥១.៧៤៤ហិកតា ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ