ADផ្ទាំងផ្សព្វផ្សាយពាណិជ្ជកម្ម

នាងអាហ្សារេនកាបំបាក់នាងស្តូសួឈានចូលដល់វគ្គពាក់កណ្តាលផ្តាច់ព្រ័ត្រប្រកួតវាយកូនបាល់ U.S. Open នៅអាមេរិក

12 ឆ្នាំ មុន

០៥ ខែ កញ្ញា ឆ្នាំ ២០១២ ម៉ោង ១០:៣០

កីឡាការិនីបេឡារុសវិចតូរីយ៉ា អាហ្សារេនកាបានឈានចូលដល់វគ្គពាក់កណ្តាលផ្តាច់ព្រ័ត្រក្របខណ្ឌ U.S. Openជាលើកទី១របស់ខ្លួនបន្ទាប់ពីបានបំបាក់កីឡាការិនីការពារជើងឯកសញ្ជាតិអូស្ត្រាលីសាម៉ាន់ថា ស្តូសួនៅវគ្គ១/៤ផ្តាច់ព្រ័ត្រកាលពីថ្ងៃអង្គារទី៤កញ្ញាកន្លងមកនេះ ។ នៅលើទីលានប្រកួត USTA Billie Jean King National Tennis Centerស្ថិតក្នុងទីក្រុងញូវយ៉ក អាហ្សារេនកាក្នុងនាមជាកីឡាការិនីលំដាប់ទី១ពិភពលោកបានយកឈ្នះនាងស្តូសួក្នុងលទ្ធផល៦-១,៤-៦និង៧-៦ឆ្លងផុតវគ្គ១/៤ផ្តាច់ព្រ័ត្រដោយក្តីរីករាយ ។

សូមបញ្ជាក់ថា ការប្រកួតនេះប្រើពេលដល់ទៅ៧៥នាទីបន្ទាប់ពីរំខានដោយសាភ្លៀង ។ ភ្លៀងចាប់ផ្តើមធ្លាក់នៅពេលដែលអាហ្សារេនកាបានយកឈ្នះពិន្ទុ២លើកក្នុងសិតទី១ ប៉ុន្តែនៅពេលត្រឡប់មកបន្តការប្រកួតជាថ្មី នាងគ្មានសំណាងអាចបន្តជ័យជម្នះបែបនេះទៀតទេ ។ ទោះជាយ៉ាងណា ស្តូសួដែលធ្លាប់បំបាក់ជើងខ្លាំងស៊េរីណា វីលៀមក្នុងវគ្គផ្តាច់ព្រ័ត្រកាលពីឆ្នាំទៅមិញមិនបានបាក់ទឹកចិត្តខ្លបខ្លាចអាហ្សារេនកានោះទេ ។ ផ្ទុយទៅវិញ នាងបានប្រើបច្ចេកទេសដ៏អស្ចារ្យរបស់ខ្លួនវាយបកយកឈ្នះពិន្ទុនៅដើមសិតទី២ភ្លាមៗ ។ ឯអាហ្សារេនកាវិញ បើទោះណាជានាងបានវាយបកទៅវិញ តែមិនបានផលនោះឡើយ ។ នេះជាការបរាជ័យ១សិតដំបូងក្នុងក្របខណ្ឌនេះ ។

ទីបំផុត ការប្រកួតបន្តក្នុងសិតផ្តាច់ព្រ័ត្រ ការព្យាយាមរបស់នាងអាហ្សារេនកាបានសម្រេចដូចបំណង ។ ថ្លែងបន្ទាប់ពីឈ្នះការប្រកួត អាហ្សារេនកាបានបញ្ជាក់ថា ៖«យើងទាំង២នាក់បានបង្ហាញឱ្យឃើញនូវការប្រកួតដ៏ល្អមួយ ។ អ្នកអាចមានអារម្មណ៍ថា ទទួលរងសម្ពាធគ្រប់ពេល ។ យើងទាំង២នាក់ពិតជាបានរំលាយចូលនូវសម្ពាធនោះអស់ហើយតាមការរយៈការប្រកួតយ៉ាងស្វិតស្វាញនេះ »។ នៅវគ្គពាក់កណ្តាលផ្តាច់ព្រ័ត្រ នាងនឹងប៉ះជាមួយម៉ារីយ៉ា សារ៉ាប៉ូវ៉ាឬនាង Marion Bartoliដែលការប្រកួតរបស់ពួកគេត្រូវបានពន្យាពេលបន្ទាប់ពីមានភ្លៀងធ្លាក់ ៕

ADផ្ទាំងផ្សព្វផ្សាយពាណិជ្ជកម្ម

អត្តបទផ្សេងៗទៀត