ខេត្តតាកែវ ៖ នៅជើងភ្នំដងរែក ស្ថិតក្នុងខេត្តតាកែវ ស្រុកគិរីវង់ មានសកម្មភាពប្រជាពលរដ្ឋខិតខំតស៊ូកាត់ថ្មបាយក្រៀមជាដុំ ទម្រង់ដូចជាឥដ្ឋសម្រាប់យកទៅលក់យកប្រាក់កម្រៃផ្គត់ផ្គង់ជីវិតរស់នៅប្រចាំថ្ងៃ ។បុរសឈ្មោះ នួន ថេត ក្នុងវ័យ៦៥ឆ្នាំ រស់នៅភូមិព្រៃលាប ឃុំព្រៃអំពក ស្រុកគិរីវង់ រៀបរាប់ប្រាប់កាលពីពេលថ្មីៗនេះថា គាត់តែងតែកាត់ថ្មបាយក្រៀមនៅជើងភ្នំនេះជារៀង
ខេត្តតាកែវ ៖ នៅជើងភ្នំដងរែក ស្ថិតក្នុងខេត្តតាកែវ ស្រុកគិរីវង់ មានសកម្មភាពប្រជាពលរដ្ឋខិតខំតស៊ូកាត់ថ្មបាយក្រៀមជាដុំ ទម្រង់ដូចជាឥដ្ឋសម្រាប់យកទៅលក់យកប្រាក់កម្រៃផ្គត់ផ្គង់ជីវិតរស់នៅប្រចាំថ្ងៃ ។បុរសឈ្មោះ នួន ថេត ក្នុងវ័យ៦៥ឆ្នាំ រស់នៅភូមិព្រៃលាប ឃុំព្រៃអំពក ស្រុកគិរីវង់ រៀបរាប់ប្រាប់កាលពីពេលថ្មីៗនេះថា គាត់តែងតែកាត់ថ្មបាយក្រៀមនៅជើងភ្នំនេះជារៀងរាល់ថ្ងៃ ដោយក្នុងមួយថ្ងៃបានតែពី១២ទៅ១៥ដុំ ។ ការកាត់ថ្មបាយក្រៀមនេះ បើទោះជាក្នុងរដូវវស្សាក៏ដោយក៏អាចធ្វើបានដែរ ព្រោះទឹកភ្លៀងមិនដល់នៅកន្លែងមានថ្មបាយក្រៀមយូរទេ គឺតែងតែហូរច្រោះទៅកន្លែងផ្សេងទៀត ដូច្នេះមានភាពងាយស្រួលក្នុងការផលិតថ្មបាយក្រៀម ។
លោកតា អ៊ុង ប៉ាង វ័យ៧០ឆ្នាំ រស់ក្នុងភូមិព្រៃលាប ដែរនោះរៀបរាប់ប្រាប់ឱ្យដឹងថា ក្នុងមួយថ្ងៃគាត់កាត់ថ្មបាយក្រៀមបានប្រហែលពី១៥ទៅ១៧ដុំដោយក្នុងមួយដុំលក់បានពី១.២០០រៀលទៅ១.៥០០រៀល ។ចំពោះការកាត់ថ្មនេះ គឺត្រូវជីកទៅក្នុងដីមានជម្រៅប្រហែលកន្លះម៉ែត្រ ព្រោះនៅផ្នែកខាងលើគឺមានភាពរឹង មិនអាចកាត់បានទេ ។ ចំណែកឧបករណ៍ដែលប្រើសម្រាប់កាត់នេះគឺត្រសេះ ព្រោះមានតែឧបករណ៍នេះទេអាចជីកថ្ម ឬក៏កាត់ផ្តាច់ថ្មបាយក្រៀមបាន ។
អ្នកប្រមូលទិញថ្មបាយក្រៀមឈ្មោះ ជូវ ថុន ប្រាប់ឱ្យនដឹងថា គាត់តែងតែប្រមូលទិញថ្មបាយក្រៀម និងស្តុកទុកលក់បន្តទៀតដោយមានឈ្មួញមកពីបណ្តាខេត្តផ្សេងៗ រួមទាំងមានឈ្មោះពីរាជធានីភ្នំពេញផងដែរ ។ ចំពោះតម្លៃថ្មមួយដុំគឺ១.២០០រៀល និងអាចមានតម្លៃថោកជាងនេះទៀតប្រសិនបើមានការបញ្ជាទិញក្នុង ទំហំធំជាងនេះទៅទៀត ។ស្ត្រីឈ្មោះ ស៊ុត ហៀត អាយុ៥៥ឆ្នាំ មានទីលំនៅភូមិព្រៃលាប ឱ្យដឹងថា គាត់ក៏បានទិញថ្មបាយក្រៀមនេះសម្រាប់ធ្វើជាអាងទឹក ។
ចំពោះផ្ទះរបស់គាត់ទាំងមូលបានសាងសង់ឡើងដោយថ្មបាយក្រៀមដែរ ព្រោះមានតម្លៃថោក និងមានសោភ័ណភាពស្អាតទៀតផង គឺនៅពេលសាងសង់រួចមើលទៅផ្ទះហាក់បីដូចជាប្រាង្គប្រាសាទបុរាណ ។យោងតាមអ្នកភូមិផ្សេងទៀតដែលសាងសង់ផ្ទះពីថ្មបាយក្រៀមនិយាយថា ការសាងសង់ផ្ទះពីឥដ្ឋថ្មបាយក្រៀមមានគុណភាពជាប់ដូចជាឥដ្ឋដែលផលិតចេញពីស៊ីម៉ងត៍ដែរ ៕
ចែករំលែកព័តមាននេះ