ទីក្រុងប្រ៊ុចសែល៖ យុទ្ធសាស្ត្រសង្គ្រាមពាណិជ្ជកម្មដែលលោកដូណាល់ត្រាំធ្លាប់ប្រើប្រាស់កាលលោកកាន់តំណែងនៅអាណត្តិទី១នោះ ឥឡូវនេះត្រូវសហភាពអឺរ៉ុបចាប់ផ្ដើមយកមកប្រើប្រាស់ដែរ។ លើកនេះ អឺរ៉ុបសម្រេចដំឡើងពន្ធគយជាង៣០%ទៅលើរថយន្តអគ្គិសនីដែលនាំចូលពីប្រទេសចិន។ ដូច្នេះ ពាណិជ្ជកម្មសេរីមានតែឈ្មោះប៉ុណ្ណោះ។ ប៉ុន្តែជាក់ស្ដែង ប្រទេសនីមួយៗប្រជែងគ្នាដណ្ដើមផលប្រយោជន៍។
![](https://kohsantepheapdaily.com.kh/wp-content/uploads/2024/06/5efa1a8f3b80e6478522b9fa0164b7f8.jpg)
ប្រទេសមួយដែលសម្លឹងឃើញថាទំនិញពីខាងក្រៅច្រើនពេកប៉ះពាល់វិស័យឯកជនរបស់គេ និងផលប្រយោជន៍ជាតិរបស់គេ គេនឹងរកវិធីចាត់វិធានការទប់ទល់ និងដាក់របាំងពាណិជ្ជកម្ម។ ឆ្លើយតបនឹងចំណាត់ការនេះ ប្រទេសចិនតាមរយៈអ្នកនាំពាក្យរបស់ខ្លួនបានបញ្ចេញប្រតិកម្មជំទាស់យ៉ាងខ្លាំងក្លា និងសច្ចាថាខ្លួនត្រូវតែចាត់វិធានការវាយបកវិញ។
![](https://kohsantepheapdaily.com.kh/wp-content/uploads/2024/06/02c529ac8ab247af199b6317c215ce2a-1.jpg)
ថ្ងៃនេះ គណៈកម្មការអឺរ៉ុបប្រកាសប្រាប់ក្រុមហ៊ុនផលិតរថយន្តរបស់ខ្លួនពីការដំឡើងពន្ធគយរហូតដល់៣៨,១%ទៅលើរថយន្តអគ្គិសនីដែលនាំចូលពីប្រទេសចិន។ វិធានការនេះនឹងអនុវត្តចាប់ពីដើមខែកក្កដាតទៅ។ នេះជាផ្នែក១នៃយុទ្ធសាស្ត្រគាំពារនិយមសេដ្ឋកិច្ចដើម្បីជួយទ្រទ្រង់វិស័យឯកជនក្នុងស្រុក។ ប្រទេសខ្លះដូចជាអាល្លឺម៉ង់ដែលទីផ្សាររថយន្តរបស់ខ្លួនធ្លាប់តែមានប្រៀបខ្លាំងនៅលើពិភពលោកកំពុងតែបារម្ភនឹងការហូរចូលដូចទឹកបាក់ទំនប់នៃរថយន្តអគ្គិសនីរបស់ចិនដែលលក់ធូរថ្លៃ។
![](https://kohsantepheapdaily.com.kh/wp-content/uploads/2024/06/39bc364715e69f8b538e23a5459f9a19-1.jpg)
គណៈកម្មការអឺរ៉ុបថ្លែងថារថយន្តអគ្គិសនីរបស់ចិនកំពុងតែរកស៊ីដើរខ្សែលើ ហើយកំពុងគំរាមកំហែងរោងចក្រផលិតរថយន្តនៅអឺរ៉ុប។ ដូចនេះ អឺរ៉ុបបានទាក់ទងទៅរដ្ឋាភិបាលចិនដើម្បីពិគ្រោះគ្នាអំពីបញ្ហានេះ និងស្វែងរកដំណោះស្រាយដែលអាចទៅរួច។ អឺរ៉ុបនឹងដំឡើងពន្ធគយលើរថយន្តនាំចូលពីចិនចាប់ពីថ្ងៃទី៤ ខែកក្កដាតទៅ។
![](https://kohsantepheapdaily.com.kh/wp-content/uploads/2024/06/dd6faf916f92d85bf6cb583b79f55f29.jpg)
អឺរ៉ុបស៊ើបអង្កេតឃើញថាទីផ្សាររបស់អឺរ៉ុបពិបាកប្រកួតឈ្នះចិនព្រោះរោងចក្រចិនទទួលលុយជំនួយពីរដ្ឋាភិបាល។ រីឯនៅអឺរ៉ុប រដ្ឋមិនអាចផ្ដល់លុយ ឬមានភាគហ៊ុននៅក្នុងវិស័យឯកជនទេ។ ម៉្លោះហើយចាញ់ប្រៀបចិនតែម្ដង។ ឥឡូវនេះ អឺរ៉ុបត្រៀមដំឡើងពន្ធចាប់ពីថ្ងៃទី៤ ខែកក្កដាតទៅ។ ចាប់ពីពេលរហូតដល់ថ្ងៃទី២ ខែវិច្ឆិកា អឺរ៉ុបនឹងបន្តស៊ើបអង្កេតករណីរោងចក្រខ្លះទទួលលុយពីរដ្ឋាភិបាលចិន។ ទម្រាំដល់ពេលនោះ (២ វិច្ឆិកា) អឺរ៉ុបនឹងកំណត់ពន្ធរយៈពេលវែងអាចដល់៥ឆ្នាំ។
![](https://kohsantepheapdaily.com.kh/wp-content/uploads/2024/06/797bd7594f30064fcea1120647ca0fa6.jpg)
ក្រោយការប្រកាសនេះ ប្រទេសចិនថ្លែងថាខ្លួននឹងបន្តតាមដានសភាពការណ៍នេះដោយយកចិត្តទុកដាក់ ហើយនឹងត្រៀមដាក់ចេញវិធានការចាំបាច់គ្រប់យ៉ាងដើម្បីការពារសិទ្ធិស្របច្បាប់របស់ក្រុមហ៊ុនចិន។ ប្រទេសចិនរិះគន់ខ្លាំងៗចំពោះគម្រោងស៊ើបអង្កេតរបស់អឺរ៉ុបទៅលើករណីដែលរដ្ឋាភិបាលចិនលួចផ្ដល់លុយទៅឱ្យក្រុមហ៊ុនឯកជន។ ប្រទេសចិនជំរុញឱ្យមានកិច្ចសហការ និងបញ្ចុះបញ្ចូលប្រទេសសមាជិកអឺរ៉ុបឱ្យបោះបង់ផែនការនេះចោល៕
![](https://kohsantepheapdaily.com.kh/wp-content/uploads/2024/06/4336d7a83f4aec0a5cdc19a3fb820fb3-1.jpg)
![](https://kohsantepheapdaily.com.kh/wp-content/uploads/2024/06/307a6d2ce3ecefa5be6a062678a996c3.jpg)
ចែករំលែកព័តមាននេះ