សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានបញ្ជាក់ នៅថ្ងៃទី២ ខែសីហា ឆ្នាំ២០២៤ថា ការទទួលយកក្រដាស់ប្រាក់ដុល្លារដែលមានសភាពចាស់ ឫរហែកនៅមិនទាន់អាចអនុវត្តទូទាំងប្រទេសបាននៅឡើយទេ គឺសូមត្រឹមខេត្តសៀមរាបសិន…
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានបញ្ជាក់ នៅថ្ងៃទី២ ខែសីហា ឆ្នាំ២០២៤ថា ការទទួលយកក្រដាស់ប្រាក់ដុល្លារដែលមានសភាពចាស់ ឫរហែកនៅមិនទាន់អាចអនុវត្តទូទាំងប្រទេសបាននៅឡើយទេ គឺសូមត្រឹមខេត្តសៀមរាបសិន ។
សម្តេចធិបតីបានបញ្ជាក់នៅលើបណ្តាញសង្គមផ្លូវការរបស់សម្តេចដោយអរគុណចំពោះបណ្តាធនាគារ អាជីវករ អ្នកប្ដូរប្រាក់ក៏ដូចជាប្រជាពលរដ្ឋនៅក្នុងខេត្តសៀមរាប ដែលបានចូលរួមអនុវត្តនូវគោលការណ៍ថ្មីរបស់ធនាគារជាតិនៃកម្ពុជា ពាក់ព័ន្ធនឹងការប្រើប្រាស់ក្រដាស់ប្រាក់ដុល្លារដែលមានសភាពចាស់ ឬរហែក ។
សម្តេចធិបតីបានលើកឡើងថា មានបងប្អូនជាច្រើនបានចោទសួរថា ហេតុអ្វីបានជាធនាគារជាតិមិនដាក់ឲ្យអនុវត្តនៅទូទាំងប្រទេសតែម្ដង? សម្តេចធិបតីបានបន្តថា តាមការឆ្លើយតបនឹងសំនួរនេះថា ដោយសារការទទួលយកក្រដាសប្រាក់ដុល្លារហែក ឬចាស់ដែលមិនអាចប្រើប្រាស់បាន ដើម្បីយកទៅដូរយកក្រដាសប្រាក់ថ្មីពីធនាគារកណ្តាលសហរដ្ឋអាមេរិក ជាកាតព្វកិច្ចរបស់ធនាគារជាតិ ដែលត្រូវការចំណាយថវិកាច្រើន ការដាក់អោយអនុវត្តនូវគោលការណ៍ថ្មីនេះ ត្រូវធ្វើទៅដោយប្រុងប្រយ័ត្ន និងជាជំហាន ។
សម្តេចធិបតីបានបញ្ជាក់យ៉ាងច្បាស់ថា «ហេតុដូច្នេះ ការដាក់អោយអនុវត្តន៍នៅខេត្តសៀមរាបនេះ ជាជំសាកល្បង (pilot) ដើម្បីធនាគារជាតិអាចធ្វើការវាយតម្លៃ និងយកជាមូលដ្ឋានសម្រាប់រៀបចំផែនការឱ្យបានជាក់លាក់ មុននឹងប្រកាសដាក់អោយអនុវត្តគោលការណ៍ថ្មីនេះនៅទូទាំងប្រទេសក្នុងពេលឆាប់ៗខាងមុខ» ។
នៅមុននេះ លោកស្រី ជា សិរី អគ្គទេសាភិបាលធនាគារជាតិនៃកម្ពុជាក៏បានពន្យល់សាធារណៈជនម្តងហើយ តាមបណ្តាញសង្គមរបស់លោកស្រីពាក់ព័ន្ធនឹងយន្តការទទួលប្រាក់ដុល្លារចាស់នេះ ។ លោកស្រីបានបញ្ជាក់ថា ធនាគារជាតិនៃកម្ពុជា មិនមែនជាអ្នកបោះពុម្ពក្រដាសប្រាក់ដុល្លាអាមេរិកទេ ហើយក៏មិនមានសិទ្ធក្នុងការកាត់ ដុតក្រដាសចាស់ ទក់ រហែក ដូចដែលបានធ្វើសម្រាប់ប្រាក់រៀលនោះដែរ ។ ធនាគារជាតិនៃកម្ពុជាត្រូវជួលក្រុមហ៊ុនដឹកជញ្ជូន បង់សេវាធានារ៉ាប់រង ដើម្បីដឹកឲ្យធនាគារដៃគូរដែលមានសិទ្ធិផ្ទាល់ ឬដោយប្រយោលជាមួយធនាគារកណ្តាលអាមេរិក ក្នុងការគ្រប់គ្រងក្រដាសប្រាក់នេះ ។
ដូច្នេះធនាគារដៃគូជាអ្នកកំណត់លក្ខណៈវិនិច្ឆ័យ លើក្រដាសប្រាក់ដែលគាត់ទទួលបានពីកម្ពុជា ។ ការដឹកក្រដាសប្រាក់ថ្មីដុល្លាអាមេរិកចូលវិញក៏ត្រូវមានបង់សេវាដឹកជញ្ជូនធានារ៉ាប់រងដូចគ្នា ដែលត្រូវរាប់រងដោយធនាគារជាតិ ។ ដូច្នេះការចាយវាយក្រដាសប្រាក់ដុល្លារ មានភាពងាយស្រួល មួយផ្នែក ប៉ុន្តែក៏មានផលខាតដល់សេដ្ឋកិច្ចមួយផ្នែកដែរ ។ ដូច្នេះត្រូវថ្លឹងថ្លែងវិធានការ ឲ្យបានម៉ត់ចត់ ។
លោកស្រីបានបន្តថា ជម្រើសល្អគឺបន្តប្រើប្រាស់ KHQR ក្នុងការទូទាត់ ជាដុល្លា ឬរៀល និងលើកទឹកចិត្តភ្ញៀវទេសចរឲ្យប្រើប្រាក់រៀលឲ្យបានច្រើន ៕
ចែករំលែកព័តមាននេះ