ស្របពេលដែលស្ថានភាពសេដ្ឋកិច្ចមិនទាន់ល្អប្រសើរ ក្នុងត្រីមាសទី២ ឆ្នាំ២០២៤នេះ អ្នកខ្ចីលុយពីស្ថាប័នមីក្រូហិរញ្ញវត្ថុធ្លាក់ចុះ តែចំណែកអ្នកដាក់លុយផ្ញើនៅគ្រឹះស្ថានទាំងនោះ មានការកើនឡើងគួរអោយកត់សម្គាល់ ។ លោក កាំង តុងងី…
ស្របពេលដែលស្ថានភាពសេដ្ឋកិច្ចមិនទាន់ល្អប្រសើរ ក្នុងត្រីមាសទី២ ឆ្នាំ២០២៤នេះ អ្នកខ្ចីលុយពីស្ថាប័នមីក្រូហិរញ្ញវត្ថុធ្លាក់ចុះ តែចំណែកអ្នកដាក់លុយផ្ញើនៅគ្រឹះស្ថានទាំងនោះ មានការកើនឡើងគួរអោយកត់សម្គាល់ ។
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានអោយដឹងថា ក្នុងត្រីមាសទី២ ឆ្នាំនេះចំនួនអ្នកដាក់ប្រាក់បញ្ញើក្នុងវិស័យមីក្រូហិរញ្ញវត្ថុមានចំនួនកើនឡើង ប្រមាណជាជិត១ភាគរយ កើនឡើងរហូតដល់២.១១០លានដុល្លារអាមេរិក ដែលមានអតិថិជនប្រមាណជាជាង ១,៩៩លាននាក់បានដាក់ប្រាក់បញ្ញើក្នុងនោះមានប្រមាណជា៦៧ភាគរយជាស្ត្រី ។
លោក កាំង តុងងី បានអោយកម្មវិធីលុយនៃសារព័ត៌មានកោះសន្តិភាពដឹងថា «នេះវាជាសញ្ញាបង្ហាញដែរថា ប្រជាពលរដ្ឋយើងនៅពេលដែលស្ថានភាពសេដ្ឋកិច្ចមិនច្បាស់លាស់ គាត់មិនធ្វើការវិនិយោគដោយប្រថុយប្រថាននោះទេ គាត់ចាំមើលស្ថានភាព នៅពេលដែលគាត់មានលុយនៅសល់ គឺគាត់យកមកដាក់ប្រាក់បញ្ញើ នៅតាមគ្រឹះស្ថានផ្លូវការដោយសារតែទី១ មានសុវត្ថិភាពខ្ពស់ ទី២បានអត្រាការប្រាក់ធ្វើអោយប្រាក់គាត់រីកចម្រើន ។ កត្តាដែលប្រាក់បញ្ញើកើនឡើង តម្រូវការឥណនទានថយចុះនេះជាកត្តាបង្ហាញពីភាពរឹងមាំរបស់គ្រឹះស្ថាន នៅពេលដែលសេដ្ឋកិច្ចមិនទាន់ច្បាស់លាស់» ។
អ្នកនាំពាក្យសមាគម បន្ថែមថា ក្នុងត្រីមាសទី២ឆ្នាំនេះវិស័យមីក្រូហិរញ្ញាវត្ថុបានបញ្ចេញឥណនទានចំនួន៥.១១០លានដុល្លារទៅកាន់អតិថិជនចំនួនជាង ១,៥៥លាននាក់ ។ ក្នុងនោះមានស្ត្រីប្រមាណជា៥៤ភាគរយ ហើយឥណនទាននេះ គឺមានការធ្លាក់ចុះប្រមាណជាជាង១ភាគរយ ។
លោក កាំង តុងងី បន្តថា «យ៉ាងណាក៏ដោយយើងឃើញថា ឥណនទានដែលអតិថិជនបង់សងយឺត លើសពី៣០ថ្ងៃ មានការកើនឡើងរហូតដល់៩ភាគរយ ដែលកម្រិតនេះ កម្ពុជាយើងមិនធា្លប់ជួបប្រទះទេ ក៏ប៉ុន្តែកម្រិត៩ភាគរយនេះ បើយើងប្រៀបធៀបជាមួយប្រទេសជុំវិញយើង ឬក៏ប្រទេសលើពិភពលោក៩ភាគរយនេះ គឺស្ថិតនៅក្នុងកម្រិតទាបជាងគេច្រើន ។ ហើយឥណទាននេះ មានការកើនឡើងដែលយើងដឹងហើយនេះ បន្ទាប់ពីកូវីដ១៩នេះមកវាប៉ះពាល់ដល់សង្គ្រាមរុស្សី និងអ៊ុយក្រែន ការប្រឈមមុខគ្នា ហើយប្រទេសមហាអំណាចនេះទៀតមានផលប៉ះពាល់ដល់ប្រទេសកម្ពុជា និងប្រទេសផ្សេងៗលើពិភពលោក »។
លោក កាំង តុងងី បន្ថែមថា សមាគមមីក្រូហិរញ្ញាវត្ថុ និងសមាគមធនាគារ បានចេញសេចក្តីជូនដំណឹងស្តីពីការពង្រឹងការផ្តល់ឥណនទាន ប្រកបដោយគុណភាព និងការទទួលខុសត្រូវ រួមទាំងការការពារអតិថិជន ដែលជាការពង្រឹង និងពង្រីកវិសាលភាពដែលបង្ហាញថាវិស័យមីក្រូហិរញ្ញាវត្ថុ និងវិស័យធនាគារ បានធ្វើការជិតស្និតជាមួយនឹងគ្នា ដែលនេះជាការរួមគ្នាអនុវត្ត៕
ចែករំលែកព័តមាននេះ