សុភក្តិ ធ្លាប់មានប្រាក់ខែ១០០០ដុល្លារ ក្នុងមួយខែ ដូច្នេះគាត់ចង់មានឡានជិះនឹងគេ ហើយបានចំណាយប្រាក់ខែរបស់គាត់ពាក់កណ្តាល ដើម្បីទិញឡានបង់រលោះ ។ ប៉ុន្តែវិបត្តិសេដ្ឋកិច្ចដែលផ្ទុះចេញដោយសារកូវីដ បានធ្វើអោយសុភក្តិបាត់បង់ការងារ ហើយមានបំណុល ធនាគារត្រូវសងរាល់ខែ ដោយធ្វើអោយជីវិតសុភក្តិប្រែក្លាយពីភាពហ៊ឺហាមកជាជីវិតជាប់ដោយបំណុល និងលំបាក ។
សុភក្តិ គ្រាន់តែជាឧទាហារណ៍មួយប៉ុណ្ណោះ ។ មានមនុស្សជាច្រើន នៅកម្ពុជាបច្ចុប្បន្នបានជួបប្រទះការលំបាក និងជាប់បំណុលដោយសារតែសម្ភារៈនិយម ដោយសារហ៊ានខ្ចីលុយធនាគារ ដើម្បីសេចក្តីត្រូវការបំពេញតាមចិត្តចង់របស់ក្រៅខ្លួន ។ សម្ភារៈនិយមច្រើន តែសំដៅទៅលើការងុបងល់ជាមួយនឹងទ្រព្យសម្បត្តិ និងការចង់បានរបស់ប្រណីត ដើម្បីបង្ហាញ និងអួតក្នុងសង្គម ។
![](https://kohsantepheapdaily.com.kh/wp-content/uploads/2024/07/bca30903d8f93f07270c474b9e0177bf.png)
គ្រោះថ្នាក់នៃសម្ភារៈនិយម អាចមានច្រើនយ៉ាង និងប៉ះពាល់ដល់បុគ្គល និងសង្គមតាមរបៀបផ្សេងៗ ៖
១ ធ្លាក់ខ្លួនក្នុងបំណុល
សម្ភារៈនិយមអាចធ្វើឱ្យបុគ្គលម្នាក់ៗងាយនឹងផុងខ្លួនចាញ់បោកការឃោសនាលក់សម្ភារៈទំនើបដូចជា ឡាន ម៉ូតូ និងទូរស័ព្ទ ។ ដូច្នេះពួកគេអាចនឹងធ្លាក់ក្នុងអន្ទាក់នៃបំណុល ។ រឿងនេះ គឺយើងកំពុងប្រឈមមុខបច្ចុប្បន្ន ។
![](https://kohsantepheapdaily.com.kh/wp-content/uploads/2024/07/b894ffbf93ff87f3f0fba4c5b10dbd03.jpg)
២ ការមិនពេញចិត្តផ្ទាល់ខ្លួន និងសុខភាពផ្លូវចិត្ត
ការស្រាវជ្រាវបានបង្ហាញថា សម្ភារៈនិយមខ្លាំង មិនផ្តល់សុភមង្គលដូចការគិតទេ ។ មនុស្សដែលផ្តល់អាទិភាពដល់ទ្រព្យសម្បត្តិអាចជួបប្រទះនឹងការថប់បារម្ភ និងការធ្លាក់ទឹកចិត្តកាន់តែខ្លាំង ។ ពួកគេក៏មិនមានភាពស្កប់ស្កល់ក្នុងជីវិតដែរ ។ ចូរចាំថា ទ្រព្យសម្បត្ដិកម្រនឹងនាំមកនូវសុភមង្គលយូរអង្វែង ។
៣ ទំនាក់ទំនងសង្គម
សម្ភារៈនិយមអាចធ្វើអោយប៉ះពាល់ដល់ទំនាក់ទំនងមនុស្ស ពីព្រោះមនុស្សសម្ភារៈនិយម ហួសហេតុអាចហ៊ានធ្វើអ្វីគ្រប់យ៉ាងអោយតែបានអ្វីដែលខ្លួនចង់ដោយមិនខ្វល់ពីផលប៉ះពាល់ដល់ទំនាក់ទំនងឡើយ ។
៤ វិសមភាពសេដ្ឋកិច្ច
សម្ភារៈនិយមអាចធ្វើឲ្យវិសមភាពសេដ្ឋកិច្ចកាន់តែធ្ងន់ធ្ងរឡើង ដោយសារតែភាពលោភលន់មិនចេះស្កប់ស្កល់របស់មនុស្ស ។ សង្គមដែលផ្តល់អាទិភាពដល់សម្ភារៈអាចមិនខ្វល់ដល់សុខុមាលភាពសង្គម និងការចែកចាយទ្រព្យសម្បត្តិដោយយុត្តិធម៌ ដែលនាំឱ្យមានការកើនឡើងនៃភាពក្រីក្រ និងចលាចលក្នុងសង្គម ។
៥ អតុល្យភាពរវាងការងារនិងជីវិត
ក្នុងការស្វែងរកទ្រព្យសម្បត្តិសម្ភារៈ បុគ្គលម្នាក់ៗអាចលះបង់ពេលវេលាផ្ទាល់ខ្លួន សុខុមាលភាព និងទំនាក់ទំនងសម្រាប់ម៉ោងធ្វើការ និងការរីកចម្រើនក្នុងអាជីព ។ នេះអាចនាំឱ្យមានការអស់កម្លាំង និងកង្វះតុល្យភាពការងារ និងជីវិត ។
៦ មនុស្សភ្លេចគិតដល់តម្លៃស្នូលនៃជីវិត
ការផ្តោតអារម្មណ៍ហួសហេតុទៅលើទ្រព្យសម្បត្តិសម្ភារៈអាចនាំឱ្យមនុស្សមិនគិតដល់ទិដ្ឋភាពដែលមិនមែនជាសម្ភារៈដូចជា ការចូលរួមក្នុងសហគមន៍ ការអភិវឌ្ឍន៍ផ្ទាល់ខ្លួន និងការបណ្តុះគុណធម៌ដូចជា មេត្តា និងការយល់ចិត្ត ។
៧ អាចធ្វើអោយមនុស្សគ្មានសីលធម៌ និងពុករលួយ
ការស្វែងរកភាពជោគជ័យផ្នែកសម្ភារៈអាចនាំឱ្យបុគ្គល ឬសាជីវកម្មចូលរួមក្នុងអាកប្បកិរិយាគ្មានសីលធម៌ ដូចជា អំពើពុករលួយ និងការកេងប្រវ័ញ្ច ។
ដើម្បីកាត់បន្ថយគ្រោះថ្នាក់នៃសម្ភារៈនិយម បុគ្គល និងសង្គមអាចខិតខំបង្កើតតុល្យភាពរវាងតម្រូវការសម្ភារៈ និងសុខុមាលភាពខាងវិញ្ញាណ និងអារម្មណ៍ ។ ការសង្កត់ធ្ងន់លើគុណតម្លៃដូចជា សហគមន៍ ភាពស្មោះត្រង់ និរន្តរភាព និងការរីកចម្រើនផ្ទាល់ខ្លួន អាចជួយទប់ទល់នឹងផលប៉ះពាល់អវិជ្ជមានដែលអាចកើតមានដោយសារសម្ភារៈនិយម ៕
ចែករំលែកព័តមាននេះ