រាជធានីភ្នំពេញ ៖ កំពូលអ្នកប្រើស្នៀតជើងពុទ្ធ ឆាយរិទ្ធី មកពីក្លិបពុទ្ធសេរីវង្សកីឡា ចិត្តធំចង់សាកកម្លាំងជាមួយអ្នកប្រដាល់ចាស់វស្សានួន ភិរក្ស មកពីសមាគមកីឡាប្រដាល់ក្រសួងមហាផ្ទៃ នៅលើសង្វៀនទូរទស្សន៍ប៉ុស្តិ៍លេខ៣ នាថ្ងៃសៅរ៍ទី៨ កញ្ញា ខាងមុខនេះ ខណៈហ៊ឹម សារ៉ាន់ មកពីសមាគមកីឡាប្រដាល់ក្រសួងការពារជាតិ ណាត់ជួបលួន សុខខេង មកពីក្លិបសិង្ហកីឡា ។
ពុទ្ធ ឆាយរិទ្ធី ពិតជាមានថ្លើមធំបន្តិចហើយដែលចង់សាកកម្លាំងនួន ភិរក្សនោះ ។ តាមពិតគេគ្រាន់តែជាអ្នកប្រដាល់ជើងថ្មីម្នាក់ប៉ុណ្ណោះ ប៉ុន្តែភាពល្បីល្បាញរបស់គេបានកើតឡើងយ៉ាងឆាប់រហ័សបំផុតតាមរយៈការវាយផ្តួលកីឡាករជើងចាស់ឱ្យចុះចាញ់នៅក្រោមកណ្តាប់ដៃរបស់គេអស់ជាច្រើននាក់ នាពេលកន្លងមក ។ បើទោះជាគេមិនសូវមានភាពប៉ិនប្រសប់ខាងប្រើស្នៀតកែង និងជង្គង់ក៏ពិតមែន ប៉ុន្តែស្នៀតជើង និងស្នៀតកណ្តាប់ដៃរបស់គេវិញនោះ គឺល្អគ្រាន់បើ ។
ទោះបីយ៉ាងណា គេមិនទាន់ដឹងថា តើពុទ្ធ ឆាយរិទ្ធី អាចតស៊ូប្រកួតជាមួយអ្នកប្រដាល់ជើងចាស់នួន ភិរក្ស បានដោយរបៀបណា ខណៈភិរក្ស មានស្នៀតកែង និងជង្គង់អាចប្រើការបានយ៉ាងល្អបំផុត ។ ម្យា៉ងវិញទៀត បើនិយាយអំពីល្បិចប្រយុទ្ធនៅសង្វៀនវិញ គឺល្អជាងពុទ្ធ ឆាយរិទ្ធី ឆ្ងាយណាស់ ប៉ុន្តែបើនិយាយពីកម្លាំងអាចចាញ់រិទ្ធី វិញ ដូច្នេះចាំមើលរវាងជើងចាស់ និងជើងថ្មីមួយណាខ្លាំងជាង ។
រីឯ ហ៊ឹម សារ៉ាន់ និងលួន សុខខេង វិញ ពួកគេទាំង២នាក់សុទ្ធតែជាអ្នកប្រដាល់ចាស់វស្សា និងមានល្បិចប្រយុទ្ធនៅលើសង្វៀនក្រាស់ដូចគ្នាធ្វើឱ្យគេពិបាកវាយតម្លៃពីលទ្ធផលចាញ់-ឈ្នះណាស់ ។ សារ៉ាន់ មានស្នៀតជើងល្អ រីឯស្នៀតកែង និងជង្គង់មិនត្រឹមតែអាចវាយចេញបានរហ័សប៉ុណ្ណោះទេ ភាគច្រើនគឺមិនសូវខុសទិសដៅ និងមានចិត្តសឿងទៀតផង ។ ឯលួន សុខខេង ទោះបីមានស្នៀតកែង និងជង្គង់ល្អ ប៉ុន្តែចិត្តរបស់គេរាងតូចបន្តិច ចលនាវាយចេញក៏មានសភាពយឺតយ៉ាវដែរ តែបើនិយាយពីកម្លាំងគឺខ្លាំងគួរសមអាចប្រកួតបាន៥ទឹកពេញមិនលំបាកឡើយ ។
នៅថ្ងៃដដែលនោះដែរ កីឡាករហេង វិឆ័យ មកពីក្លិបកងពលតូចលេខ៧០ ត្រូវបានផ្គូផ្គងឱ្យជួបប្រកួតជាមួយកីឡាករខុន ស៊ីចាន់ មកពីក្លិបកងពលធំអន្តរាគមន៍លេខ៣ព្រះវិហារ ។ កីឡាករឈិន ក្វាន់ង៉ុយ មកពីក្លិបមកុដរាជសីហ៍ ជួបប្រកួតជាមួយកីឡាករដេវីត មកពីក្លិបតាព្រហ្មមានជ័យបង្ក្រាបគ្រឿងញៀន និងកីឡាកររ៉ូ វិចិត្រ មកពីក្លិបកងពលតូចឆត្រយោង៩១១ ជួបប្រកួតជាមួយកីឡាករឈិត រដ្ឋា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ