រាជធានីភ្នំពេញ ៖ មន្ត្រីប៉ូលិសម្នាក់បានរងរបួសធ្ងន់ ដោយសារអ្នកស្រវឹងធ្លាក់ភ្នែកម្នាក់ជិះម៉ូតូមួយគ្រឿងក្នុងល្បឿនលឿនគេចគោលដៅត្រួតពិនិត្យលើអ្នកជិះម៉ូតូអត់ពាក់មួកសុវត្ថិភាព ឬដាក់កញ្ចក់ និងជាតិស្រវឹង ជ្រុលទៅបុកពេញទំហឹង បណ្តាលឱ្យដួលបោកក្បាលទៅនឹងថ្នល់ហូរឈាម និងត្រូវបានដឹកទៅសង្គ្រោះបន្ទាន់នៅមន្ទីរពេទ្យកាល់ម៉ែត ចំណែកជនបង្ករងរបួសស្រាលរលាត់ដៃជើងប៉ុណ្ណោះ ត្រូវបានប៉ូលិសចាប់ខ្លួនកសាងសំណុំរឿងបញ្ជូនទៅតុលាការ ។
ឧប្បត្តិហេតុនោះបានកើតឡើងកាលពីល្ងាចថ្ងៃទី៣ កញ្ញា ២០១២ នៅលើកំណាត់ផ្លូវចោមចៅត្រង់ចំណុចគោលដៅ២៤ម៉ោង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះឈ្មោះរ័ត្ន ចិត្ត្រា អាយុ៣៧ឆ្នាំ ជាមន្ត្រីប៉ូលិសផ្នែកអន្តរាគមន៍ខណ្ឌពោធិ៍សែនជ័យ រងរបួសបែកក្បាលធ្ងន់ធ្ងរដែលរហូតមកដល់ពេលនេះមិនទាន់ដឹងខ្លួននៅឡើយទេ ។ ដោយឡែកជនស្រវឹងស្រាបើកលើកម៉ូតូបុកប៉ូលិសនោះឈ្មោះញ៉ ចាន់រិទ្ធ អាយុ២២ឆ្នាំ ជាកម្មករសំណង់មានទីលំនៅផ្ទះជួលក្នុងសង្កាត់កំបូល ខណ្ឌពោធិ៍សែនជ័យ និងមានស្រុកកំណើតភូមិបាខុងខាងលិច ឃុំសំរោង ស្រុកត្រាំកក់ ខេត្តតាកែវ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ