រាជធានីភ្នំពេញ ៖ កីឡាការិនីសំ សំណាង ដែលជាជើងខ្លាំងម្នាក់ប្រចាំក្លិបពន្លឺសាមគ្គីខេត្តបាត់ដំបង បានវិលមកកាន់សង្វៀនប្រដាល់សាជាថ្មីវិញដូចការអះអាងមែន បន្ទាប់ពីបានសម្ងំលាក់មុខនៅជាយដែនប្រមាណជិតមួយឆ្នាំ ។ មុនពេលបាត់មុខ នាងកម្រឱ្យគេវាយផ្តួលងាយៗណាស់ ម៉្លោះហើយទើបនាងក្លាយជាកីឡាការិនីជើងចាស់១រូបដែលធ្លាក់ក្នុងសភាពវិលវល់មិនធ្លាប់
រាជធានីភ្នំពេញ ៖ កីឡាការិនីសំ សំណាង ដែលជាជើងខ្លាំងម្នាក់ប្រចាំក្លិបពន្លឺសាមគ្គីខេត្តបាត់ដំបង បានវិលមកកាន់សង្វៀនប្រដាល់សាជាថ្មីវិញដូចការអះអាងមែន បន្ទាប់ពីបានសម្ងំលាក់មុខនៅជាយដែនប្រមាណជិតមួយឆ្នាំ ។ មុនពេលបាត់មុខ នាងកម្រឱ្យគេវាយផ្តួលងាយៗណាស់ ម៉្លោះហើយទើបនាងក្លាយជាកីឡាការិនីជើងចាស់១រូបដែលធ្លាក់ក្នុងសភាពវិលវល់មិនធ្លាប់ឃើញនៅពេលវិលមកកាន់សង្វៀនកាលពីថ្ងៃសៅរ៍ទី១ កញ្ញា ដោយចាញ់ក្រោមដៃកីឡាការិនីវី អិុច ដែលទើបឡើងរេញបាន៤ដងនោះ។
សំ សំណាង ជាកីឡាការិនីជើងខ្លាំងមួយរូបដែលធ្លាប់ធ្វើឱ្យមជ្ឈដ្ឋាននានាមានការកោតសរសើរពីទេពកោសល្យក្បាច់ប្រដាល់របស់នាងនោះ បែរជាមិនអាចរក្សាភាពល្បីល្បាញឱ្យអ្នកគាំទ្រកោតសរសើរដូចមុន បន្ទាប់ពីនាងសម្រេចចិត្តវិលមកប្រឡូកលើសង្វៀនប្រដាល់វិញ ហើយទទួលបរាជ័យ ។ នាងធ្លាប់មានប្រវត្តិប្រកួតឈ្នះច្រើនជាងចាញ់ ហើយបានទាំងឈ្នះកីឡាការិនីមកពីបារាំង ក្នុងការប្រកួតថ្នាក់អន្តរជាតិធំមួយ នៅសង្វៀនទូរទស្សន៍បាយ័ន កាលពីមុនបាត់មុខថែមទៀតផង ។ អីុចឹងហើយទើបម្នាក់ៗលាន់មាត់នៅពេលឃើញនាងប្រែប្រួលក្បាច់គុន ហើយបណ្តោយឱ្យដៃគូដែលជាជើងថ្មី គឺកីឡាការិនីវី អិុច បំបាក់បានលើសង្វៀនបាយ័នបឹងស្នោ ធ្វើឱ្យប៉ះពាល់ដល់ភាពខ្លាំងរបស់នាង ។
អ្នកស្នេហាកីឡាប្រដាល់ជាច្រើនដែលអបអរចំពោះវត្តមានវិលចូលរេញរបស់នាងបានសម្តែងអារម្មណ៍ខកចិត្តនៅពេលដែលនាងមានឱកាសវាយបកលើគូប្រកួតបានតិចជាងក្នុងពេលនាងជួបប្រកួតបើកឆាកក្រោយពេលបាត់មុខនោះ ។ ពួកគេថែមទាំងយល់ថា នាងបាត់បង់ភាពខ្លាំង ហើយធ្លាក់បច្ចេកទេសប្រកួតដែលខុសពីសំ សំណាង កាលពីអតីតកាលនោះទៀតផង ។ឆ្លើយតបនឹងការយល់ឃើញនេះ សំ សំណាង ដែលមានប្រភពមកពីខេត្តបាត់ដំបង បានបញ្ជាក់ថា ការបើកឆាកប្រយុទ្ធសាជាថ្មីរបស់នាងដែលបានប៉ះជាមួយកីឡាការិនីវី អិុច មកពីក្លិបអេភូថងកីឡា លើកនេះគឺបានធ្វើឡើងក្នុងភាពមិនប្រក្រតីប៉ុន្មានទេ ដោយសារតែពេលប្រកួតមានលក្ខណៈខុសបច្ចេកទេសខ្លះចំពោះកីឡាការិនីវី អិុច ។
នាងបន្តថា តាមគម្រោងនាងប្រកួតក្នុងប្រភេទទម្ងន់៥៣គីឡូក្រាមទេ តែដល់ពេលមកឃើញដៃគូប្រកួត គឺកីឡាការិនីវី អិុច មានទម្ងន់ធ្ងន់ជាងនាងយ៉ាងតិច៣គីឡូក្រាម ហើយបើនិយាយពីកម្ពស់ក៏មិនដូចគ្នាទៀត ដែលបញ្ជាក់តាំងពីដំបូងថា នាងជាកីឡាការិនីចាញ់ប្រៀបដៃគូតាំងពីបើកឆាកឃើញមុខគ្នាម៉្លេះ ។ សំ សំណាង បានសម្តែងនូវអាការអន់ចិត្តថា នាងមិនសប្បាយចិត្តទេ ដែលខាងកីឡាការិនី វី អិុច ប្រើក្បាច់ទាត់ត្រូវប្រដាប់ការពាររបស់នាងម្តងជាពីរដង ដោយគ្មានអ្នកណាមើលឃើញដែលជាមូលហេតុធ្វើឱ្យនាងដួលក្លាយជាចំណុចខ្សោយធ្វើឱ្យគេចាប់ថ្នាក់កាត់ពិន្ទុបាន ។ នាងយល់ថា កីឡាការិនីវី អិុច គឺជាដៃគូមួយរូបដែលមានស្នៀតប្រដាល់មិនត្រឹមត្រូវ ដោយប្រើស្នៀតយូដូ និងបោកចំបាប់ដែលនាងចេះស្ទាត់តាំងពីមុនចូលប្រដាល់មកប្រើក្នុងពេលប្រកួតធ្វើឱ្យនាងពិបាកទប់ទល់ ។
កីឡាការិនីរូបនេះថ្លែងក្នុងអារម្មណ៍វិលវល់ថា «ខ្ញុំយល់ថាខ្លួនឯងចាញ់ប្រៀងវី អុិច តាំងពីឡើងរេញដំបូងម៉្លេះ ព្រោះទាំងកម្ពស់ ទាំងទម្ងន់ ទោះជាមើលយ៉ាងម៉េចក៏គាត់មិនមែនទម្ងន់៥៣គីឡូក្រាមដូចខ្ញុំដែរ ហើយគាត់ជាអតីតកីឡាការិនីផ្នែកយូដូ ពេលប្រកួតច្រើនប្រើបច្ចេកទេសវាយចំកន្លែងសម្ងាត់របស់ខ្ញុំច្រើនលើក និងមិនមានគណៈកម្មការណាមើលឃើញចំណុចនេះឡើយ» ។
ដោយឡែក លោកសៅ ប៊ុនធឿន គ្រូបង្ហាត់កីឡាការិនីសំ សំណាង ផ្ទាល់បានសម្តែងការសោកស្តាយមិនតិចឡើយ ដែលកូនសិស្សរបស់ខ្លួនវិលចូលសង្វៀនប្រដាល់ជាថ្មី បែរជាធ្លាក់ក្នុងភាពបរាជ័យ ។ លោកនិយាយថា បើកីឡាការិនីវី អុិច មិនប្រើស្នៀតវាយខុសបច្ចេកទេសបន្ថែមពីលើប្រៀបឈ្នះផ្នែកទម្ងន់ និងកម្ពស់ទេ ក៏សំ សំណាង មិនទទួលបរាជ័យបែបហ្នឹងដែរ ។
ទោះយ៉ាងណា ខាងគណៈកម្មការរៀបចំការប្រកួតប្រចាំស្ថានីយទូរទស្សន៍បាយ័នបានអះអាងថា បើកីឡាការិនីទាំងពីរលើសខ្វះគ្នាត្រឹម៣គីឡូក្រាម គឺគេនៅតែអាចផ្គូផ្គងឱ្យប្រកួតគ្នាបាន ប៉ុន្តែត្រង់កីឡាការិនីវី អុច ប្រើបច្ចេកទេសប្រកួតខុសពីក្បាច់ប្រដាល់ និងបានវាយចំកន្លែងសម្ងាត់របស់សំ សំណាង គឺខាងគណៈកម្មការទាំងមូលនៅមិនទាន់បានត្រួតពិនិត្យទេ ដែលនេះមកពីសំ សំណាង មិនធ្វើការតវ៉ា និងអាចថា កីឡាការិនីវី អុិច រហ័សដៃជើងដែលពិបាកឱ្យគណៈកម្មការចាប់កំហុសបាន ។ នៅពីក្រោយការបរាជ័យនេះ សំ សំណាង នៅតែប្រកាន់មហិច្ឆតាឡើងរេញ និងមិនខ្លាចជួបសងសឹកជាមួយវី អុិច ឡើយ បើទោះជានាងបើកឆាកប្រកួតភ្លាមធ្វើឱ្យអ្នកគាំទ្រខកចិត្តក្តី ៕
ចែករំលែកព័តមាននេះ