កីឡាករអៀរឡង់ខាងជើងរ៉ូរី ម៉ាកអុីលរ៉យបានក្លាយជាម្ចាស់ពានជើងឯកកម្មវិធី Deutsche Bank Championshipប្រចាំឆ្នាំ២០១២បន្ទាប់ពីរូបគេធ្វើបានពិន្ទុ៤អាន់ឌ័រ ប៉ា ៦៧នៅជុំផ្តាច់ព្រ័ត្រកាលពីថ្ងៃចន្ទទី៣កញ្ញាកន្លងមកនេះ ។ ព្រឹត្តិការណ៍ប្រកួតដែលមានទឹកប្រាក់រង្វាន់សរុប៨លានដុល្លារអាមេរិកនេះត្រូវបានរៀបចំធ្វើនៅទីលានវាយកូនហ្គោល TPC Bostonស្ថិតក្នុងទីក្រុង Nortonរដ្ឋ Massachusettsសហរដ្ឋអាមេរិក ។
ម៉ាកអុីលរ៉យដែលបាននាំមុខ២ថ្ងៃបន្តបន្ទាប់គ្នាក្នុងជុំទី១និងទី២បានក្លាយជាម្ចាស់ពានកម្មវិធីរបស់សមាគម PGA Tourខាងលើជាមួយនឹងលទ្ធផលសរុប២០អាន់ឌ័រ ២៦៤ ។ សូមបញ្ជាក់ថា កីឡាករម៉ាកអុីលរ៉យទើបតែដណ្តើមបានពានជើងឯកក្របខណ្ឌធំ PGA Tourចំនួន២លើកប៉ុណ្ណោះក្នុងអាជីព ។ ជ័យជម្នះលើកទី២របស់គេកើតមាននៅក្នុងកម្មវិធី PGA Championshipកាលពីខែសីហា ។ គេបានថ្លែងថា ៖«ឥឡូវនេះ ខ្ញុំបានយកឈ្នះជើងឯកកម្មវិធីនេះហើយ ។ អ្វីដែលខ្ញុំប្រាថ្នាគឺលេងឱ្យបានល្អតាមដែលអាចធ្វើទៅបានសម្រាប់លើកក្រោយៗទៀត ។
ខ្ញុំប្រហែលជាអាចធ្វើការវាយតម្លៃអ្វីៗសាជាថ្មីមុននឹងចូលប្រកួតក្នុងកម្មវិធីធំៗលើកក្រោយ ។ តែយ៉ាងណា ខ្ញុំសប្បាយចិត្តជាខ្លាំងចំពោះលទ្ធផលនៅថ្ងៃនេះ ។ ខ្ញុំដឹងថា ចាំបាច់ត្រូវតែធ្វើឱ្យបានល្អជាងនេះទៀតនៅថ្ងៃខាងមុខទើបធានាបានថា អ្វីៗមិនងាយប្រែប្រួល »។តាមពីក្រោយ១ស្ត្រូកគឺកីឡាករអាហ្វ្រិកខាងត្បូង Louis Oosthuizenដែលបញ្ចប់៤ជុំប្រកួតធ្វើបានលទ្ធផលសរុប ១៩អាន់ឌ័រ ២៦៥ស្ថិតនៅលំដាប់ទី២ ។ ឯអ្នកដែលតាមពីក្រោយ២ស្ត្រូកគឺកីឡាករអាមេរិកថៃហ្គ័រ វូដ ។ អតីតកីឡាករលំដាប់ទី១ពិភពលោករូបនេះឆ្លងកាត់៤ជុំប្រកួតធ្វើបានលទ្ធផលសរុប ១៨អាន់ឌ័រ ២៦៦ស្ថិតនៅចំណាត់ថ្នាក់លេខ៣និងនាំមុខក្នុងគម្លាតពិន្ទុ៤សត់លើកីឡាករមិត្តរួមជាតិខ្លួនគឺ Phil Mickelsonនិង Dustin Johnson។ ឆ្លងកាត់ការប្រកួត៤ជុំ ពួកគេទាំង២នាក់ធ្វើបានលទ្ធផលសរុប ១៤ អាន់ឌ័រ ២៧០ស្ថិតនៅចំណាត់ថ្នាក់លេខ៤ស្ទួន ។
ដោយឡែក លើការបែងចែកទឹកប្រាក់រង្វាន់សម្រាប់បណ្តាកីឡាករជ័យលាភីវិញ ម៉ាកអុីលរ៉យម្ចាស់ពានជើងឯកទទួលបាន ១លាននិង៤៤ម៉ឺនដុល្លារអាមេរិកខណៈជ័យលាភីលេខ២កីឡាករ Louis Oosthuizenទទួលបាន ៨៦ម៉ឹននិង៤ពាន់ដុល្លារ ។ ចំណែកថៃហ្គ័រ វូដទទួលបានទឹកប្រាក់ ៥៤ម៉ឺននិង៤ពាន់ដុល្លារ ៕
ចែករំលែកព័តមាននេះ