ADផ្ទាំងផ្សព្វផ្សាយពាណិជ្ជកម្ម

ស៊េរីណា វីលៀម សារ៉ាប៉ូវ៉ានិងរ៉ូជើ ហ្វេដឺរ័រឈានចូលដល់វគ្គ១/៤ផ្តាច់ព្រ័ត្រប្រកួតវាយកូនបាល់ក្របខណ្ឌ US Openនៅអាមេរិក

12 ឆ្នាំ មុន

០៤ ខែ កញ្ញា ឆ្នាំ ២០១២ ម៉ោង ០១:១០

កីឡាការិនីអាមេរិកស៊េរីណា វីលៀមនិងកីឡាករលំដាប់ទី១ពិភពលោករ៉ូជើ ហ្វេដឺរ័រព្រមទាំងកីឡាការិនីរុស្ស៊ីម៉ារីយ៉ា សារ៉ាប៉ូវ៉ាបានសសៀរខិតចូលកាន់តែជិតពានរង្វាន់ជើងឯកក្របខណ្ឌធំ US Openឆ្នាំ២០១២នៅអាមេរិកហើយខណៈកាលពីថ្ងៃចន្ទទី៣កញ្ញាកន្លងមកនេះពួកគេទាំង៣នាក់បានយកឈ្នះគូប្រកួតរៀងៗខ្លួនក្នុងជុំទី៤ឈានចូលដល់វគ្គ១/៤ផ្តាច់ព្រ័ត្រ។

នៅលើទីលានប្រកួត USTA Billie Jean King National Tennis Centerក្នុងពហុកីឡដ្ឋាន Arthur Ashe Stadiumទីក្រុងញូវយ៉ក នាងស៊េរីណាបានយកឈ្នះកីឡាការិនីឆែក Andrea Hlavackovaក្នុងលទ្ធផលពីរសិតជាប់ៗគ្នា៦-០និង៦-០។ នាងបាននិយាយថា៖«ខ្ញុំគ្រាន់តែព្យាយាមធ្វើយ៉ាងណាឱ្យការប្រកួតដំណើរការទៅបានចប់សព្វគ្រប់ដ្បិតនៅទីនេះមានខ្យល់បក់ខ្លាំងហើយការប្រកួតពិតជាពិបាកខ្លាំង»។

សម្រាប់នាងស៊េរីណា ជ័យជម្នះ១លើកៗនៅFlushing Meadowsគឺនាងសុទ្ធតែបានបង្ហាញពីភាពខ្លាំងរបស់ខ្លួនហើយលេខ៣០ដែលជាចំនួនអាយុរបស់នាងគឺគ្រាន់តែជាតួលេខមួយប៉ុណ្ណោះ។ នាងអាចក្លាយជាកីឡាការិនីដែលពូកែលើសគេក្នុងលោកល្គឹកណានាងមានសុខភាពល្អពេញបរិបូណ៌។ នាងបាននិយាយថា៖«ខ្ញុំពិតជាមិនដឹងថា ខ្លួនខ្ញុំពូកែឬយ៉ាងណានោះទេ។ ប៉ុន្តែតាមខ្ញុំគិតប្រហែលជាពូកែដូចគេថាមែន ។ យ៉ាងណាក៍ដោយនៅមានកីឡាការិនីជាច្រើនទៀតដែលខ្ញុំគិតថាសុទ្ធតែពូកែដូចខ្ញុំ។ ប៉ុន្តែទោះជាបែបនេះក្តី ខ្ញុំមិនគិតថាពួកគេទាំងអស់នោះចេញដើរស្រែកថាខ្លួនឯងពូកែនោះទេ»។

ស៊េរីណាដែលកំពុងតែប្រឹងប្រែងដណ្តើមយកពានUS Open ជាលើកទី៤នោះ ក្នុងការប្រកួតលើកនេះនាងបានប្រើពេលអស់តែ៥៧នាទីប៉ុណ្ណោះ ។ នៅវគ្គ១/៤ផ្តាច់ព្រ័ត្រនាងនឹងប៉ះជាមួយកីឡាការិនីស៊ែប៊ីអាណា អុីវ៉ាណូវិចដែលបានយកឈ្នះកីឡាការិនីប៊ុលហ្គារី Tsvetana Pironkovaក្នុងលទ្ធផល ៦-០និង៦-៤ ។ សូមរំលឹកថា គឺនាងអុីវ៉ាណូវិចនេះហើយដែលស៊េរីណា វីលៀមបានយកឈ្នះក្នុងជុំទី៤នៅទីនេះកាលពីឆ្នាំទៅមិញក្នុងលទ្ធផល ៦-៣និង៦-៤ ។ នៅក្នុងការជួបគ្នា៣លើកកន្លងមក អុីវ៉ាណូវិចចាញ់ក្រោមថ្វីដៃនាងស៊េរីណាគ្រប់លើក ។ ការបរាជ័យ២លើកចុងក្រោយគឺក្នុងក្របខណ្ឌ U.S Openនេះកាលឆ្នាំ ២០០៦និង២០១១ ។ ដោយឡែក ការឈានចូលដល់វគ្គ១/៤ផ្តាច់ព្រ័ត្រលើកនេះពិតជាធ្វើឱ្យនាងរំភើបចិត្តជាខ្លាំង ។ កីឡាការិនីវ័យ២៤ឆ្នាំរូបនេះបានថ្លែងថា៖«ការវាយសឺវីសរបស់ខ្ញុំហាក់បានល្អជាងពេលមុនបន្តិច។ ក្នុងពេលប្រកួតខ្ញុំមានឱកាសច្រើនតែមិនអាចធ្វើបាន។ ខ្ញុំគិតថានោះគឺជាការខុសគ្នាយ៉ាងធំសម្បើមរវាងខ្ញុំនិងនាងក្នុងការប្រកួតនៅថ្ងៃនេះ ។ តែយ៉ាងណា វាពិតជារឿងគួរឱ្យភ្ញាក់ផ្អើលបំផុតសម្រាប់ការឈានចូលដល់វគ្គ១/៤ផ្តាច់ព្រ័ត្រលើកដំបូងក្នុងក្របខណ្ឌ U.S Open នេះ »។
ចំណែកកីឡាករលំដាប់ទី១ពិភពលោករ៉ូជើ ហ្វេដឺរ័របានឈានចូលដល់វគ្គ១/៤ផ្តាច់ព្រ័ត្រដោយមិនបញ្ចេញញើសមួយតំណក់ខណៈគូប្រកួតកីឡាករអាមេរិក Mardy Fishបានដកខ្លួនមុនការប្រកួតចាប់ផ្តើម ។
ហ្វេដឺរ័របានសម្តែងការសោកស្តាយយ៉ាងខ្លាំងចំពោះការដកខ្លួនរបស់កីឡាករ Fish ។ គេបានថ្លែងថា ៖«ខ្ញុំសូមជូនពរឱ្យគេឆាប់ជាសះស្បើយឡើងវិញ ។ យើងទាំងអស់គ្នាពិតជាចង់ឱ្យរូបគេវិលត្រឡប់មកប្រកួតឱ្យបានឆាប់ »។ សូមបញ្ជាក់ថា ការដកខ្លួនរបស់ Mardy Fishធ្វើឡើងបន្ទាប់ពីមានដំបូន្មានពីវេជ្ជបណ្ឌិតប្រកួត។ កីឡាកររូបនេះត្រូវគេដឹងថា ធ្លាប់បានវះកាត់បេះដូង ។
នៅវគ្គបន្ទាប់ ហ្វេដឺរ័រនឹងប៉ះជាមួយកីឡាករ Tomas Berdychដែលបានបំបាក់កីឡាករអេស្ប៉ាញ Nicolas Almagroក្នុងលទ្ធផល ៧-៦,៦-៤និង៦-១ ។
លទ្ធផលដែលគួរឱ្យចាប់អារម្មណ៍នៃការប្រកួតគូផ្សេងទៀតមានដូចជា នាងសារ៉ាប៉ូវ៉ាបានយកឈ្នះកីឡាការិនីមិត្តរួមជាតិ Nadia Petrovaក្នុងលទ្ធផល៦-១, ៤-៦និង ៦-៤ ។ បើគិតពីឆ្នាំ២០០៦មក នេះគឺជាលើកទី១ហើយដែលកីឡាការិនីរុស្ស៊ីរូបនេះឆ្លងផុតជុំទី៤ក្របខណ្ឌ U.S Open ។
ថ្លែងក្រោយពីបញ្ចប់ការប្រកួតដែលចំណាយពេលអស់៧៣នាទី សារ៉ាប៉ូវ៉ាបានថ្លែងថា៖«ខ្ញុំសប្បាយចិត្តខ្លាំងណាស់ដែលបានឈានចូលដល់វគ្គ១/៤ផ្តាច់ព្រ័ត្រ ។ វាបានខកខានអស់ជាច្រើនឆ្នាំមកហើយ ។ នេះពិតជាដំណាក់កាលដ៏ពិសេសមួយ »។
នៅវគ្គបន្ទាប់ នាងនឹងជួបប្រកួតជាមួយកីឡាការិនីបារាំង Marion Bartoliដែលបានបំបាក់កីឡាការិនីឆែកប៉េត្រា គ្វីតូវ៉ាក្នុងលទ្ធផល ១-៦,៦-២,និង៦-០ ។
ដូចគ្នានេះដែរ កីឡាការិនីលំដាប់ទី១ពិភពលោកសញ្ជាតិបេឡារុសវិចតូរីយ៉ា អាហ្សារេនកាក៏បានឆ្លងផុតជុំទី៤ឈានចូលដល់វគ្គ១/៤ផ្តាច់ព្រ័ត្រជាលើកដំបូងផងដែរបន្ទាប់ពីបានយកឈ្នះកីឡាការិនីហ្សកហ្ស៊ី Anna Tatishvili ក្នុងលទ្ធផល៦-២និង៦-២ ។ នៅវគ្គបន្ទាប់ នាងនឹងប៉ះជាមួយកីឡាការិនីការពារជើងឯកជាតិអូស្ត្រាលីសាម៉ាន់ថា ស្តូសួ ។
អាហ្សារេនកាបានថ្លែងថា ៖«ក្នុងនាមជាអ្នកការពារជើងឯក នាងពិតជាមានការលើកទឹកចិត្តច្រើន ។ ទោះជាយ៉ាងណា ខ្ញុំក៏មិនខុសពីនាងដែរ ។ នេះជាលើកទី១ហើយដែលខ្ញុំបានឈានចូលដល់វគ្គ១/៤ផ្តាច់ព្រ័ត្រ U.S Open» ៕

ADផ្ទាំងផ្សព្វផ្សាយពាណិជ្ជកម្ម

អត្តបទផ្សេងៗទៀត