រាជធានីភ្នំពេញ ៖ ក្រោយពីទទួលបានអំណោយជាសម្ភារខារ៉ាអូខេមួយឈុតពីសប្បុរសជនមក សមាគមសិល្បករខ្មែរបានប្រកាសបើកបង្រៀនច្រៀង និងសម្តែងដោយឥតគិតថ្លៃជូនយុវវ័យជំនាន់ក្រោយដែលមានបំណងចង់ក្លាយជាអ្នកសិល្បៈ ។ ពិធីទទួលសម្ភារសម្រាប់បង្រៀនច្រៀងនេះ កាលពីថ្ងៃទី២៥ សីហា ឆ្នាំ២០១២ នៅសមាគមសិល្បករខ្មែរ ។
នាឱកាសនោះលោកសុះ ម៉ាច ប្រធានសមាគមសិល្បករខ្មែរនិយាយថា នេះជាជំហានថ្មីមួយទៀតរបស់សមាគមក្នុងការចូលរួមចំណែកលើកស្ទួយវិស័យសិល្បៈក្នុងប្រទេសកម្ពុជា ឱ្យកាន់តែមានភាពរីចំរើន ។ ការបណ្តុះបណ្តាលនេះ នឹងផ្តល់ឱកាសដល់អ្នកជំនាន់ក្រោយដែលមានបំណងចង់ចាប់យកអាជីពជាអ្នកចម្រៀង និងសម្តែង ។ ការចុះឈ្មោះចូលរៀនមិនតម្រូវឱ្យបង់ប្រាក់ឡើយ គឺគ្រាន់តែចុះឈ្មោះចូលជាសមាជិករបស់សមាគម និងបង់វិភាគទានបន្តិចបន្តួចប្រចាំឆ្នាំ គឺអាចចូលរៀនបាន ។
ក្នុងនាមជាប្រធានសមាគម លោកអំពាវនាវដល់អ្នកមានបំណងចង់ចូលជាសមាជិករបស់សមាគមសូមប្រញាប់រួសរាន់ទៅចុះឈ្មោះដើម្បីមានឱកាសទទួលការបណ្តុះបណ្តាឱ្យក្លាយជាអ្នកសិល្បៈទៅថ្ងៃអនាគត ។ លោក និងតារាសម្តែងជើងចាស់មួយចំនួនទៀត កំពុងតែត្រៀមខ្លួនផ្តល់ចំណេះដឹង និងបទពិសោធន៍ដល់អ្នកជំនាន់ក្រោយ ដើម្បីចាប់អាជីពសិល្បៈមួយច្បាស់លាស់ ។
លោកសុះ មា៉ច អះអាងថា ទៅថ្ងៃមុខប្រសិនបើមានសម្ភារគ្រប់គ្រាន់នោះ សមាគមមានបំណងបើកការបង្ហាត់បង្រៀនខាងផ្នែកតន្ត្រី និងនិពន្ធបទចម្រៀង ព្រោះបច្ចុប្បន្នមានសិល្បករចាស់ៗរង់ចាំជួយដល់សមាគម ។
ដោយឡែកកាលពីថ្ងៃទី២៨ សីហា សមាគមសិល្បករខ្មែរបាននាំថវិកាមួយចំនួនដែលបានមកពីសប្បុរសជននៅក្នុងសមាគមយកទៅជូនលោកតា ចាប លាង អតីតអ្នកសម្តែង និងគ្រូបង្ហាត់ល្ខោនបាសាក់ តាំងពីទសវត្សឆ្នាំ៦០ ដែលកំពុងសម្រាកព្យាបាលជំងឺសួតនៅមន្ទីរពេទ្យកាលម៉ែត ។ លោកសុះ ម៉ាច និយាយថា ក្រោយពីទទួលដំណឹងថាលោកចាប លាងចូលសម្រាកព្យាបាលជំងឺនៅក្នុងមន្ទីរពេទ្យមក សមាគម និងក្រុមប្រឹក្សាភិបាលរបស់សមាគមបានទៅសាកសួរសុខទុក្ខ និងនាំយកប្រាក់ចំនួន២២ម៉ឺនរៀល ដែលបានមកពីសមាជិករបស់សមាគម មានលោកឱក ប៊ុន្នី អ្នកស្រីត្រឡុង កាណារ៉ូ នាយវីតាមីនសេ អ្នកស្រីរតនៈ លោកបារ៉ាឌី និងរូបលោកផ្ទាល់ ។ បើទោះបីជាប្រាក់នេះមានចំនួនតិចតួច តែជាការបង្ហាញឱ្យឃើញនូវការចូលរួមរំលែកទុក្ខលំបាកពីសមាគម ចំពោះក្រុមគ្រួសាររបស់លោកចាប លាង ។
ក្នុងនាមជាប្រធានសមាគមសិល្បករខ្មែរ លោកសុះ ម៉ាច អំពាវនាវដល់សប្បុរសជននានា ជាពិសេសសិល្បករឱ្យចូលរួមផ្តល់ជាថវិកាទោះតិចក្តីច្រើនក្តី ដើម្បីជួយព្យាបាលជំងឺដល់លោកគ្រូ ចាប លាង ក្នុងន័យជួយជាកម្លាំងចិត្តដល់គាត់ ដើម្បីបានជាសះស្បើយពីជំងឺ និងមានកម្លាំងបន្តបង្ហាត់បង្រៀនជំនាញល្ខោនបាសាក់ជូនដល់អ្នកជំនាន់ក្រោយ ។
ភរិយារបស់លោកតាចាប លាង ឱ្យដឹងថា ស្វាមីរបស់អ្នកស្រីបានចូលសម្រាកព្យាបាលនៅមន្ទីរពេទ្យចំនួនបីលើកហើយ ដោយសារជំងឺសួតរាំុុរ៉ៃ ។ ក្រោយពីសម្រាកព្យាបាលនៅក្នុងមន្ទីរពេទ្យចំនួន៤ថ្ងៃមក ជំងឺស្វាមីអ្នកស្រីហាក់បានគ្រាន់បើបន្តិច តែស្ថិតនៅក្នុងការតាមដានពីក្រុមគ្រូពេទ្យនៅឡើយ ។
អ្នកស្រីដដែលបានថ្លែងអំណរគុណសមាគមសិល្បករខ្មែរដែលបាននាំយកថវិកាជួយឧបត្ថម្ភដល់គ្រួសាររបស់អ្នកស្រី និងអំពាវនាវដល់សប្បុរសជននានាឱ្យជួយឧបត្ថម្ភដល់ក្រុមគ្រួសាររបស់អ្នកស្រីផង ព្រោះពេលនេះគ្រួសារអ្នកស្រីកំពុងតែជួបការខ្វះខាតក្នុងការព្យាបាលជំងឺដល់លោក ចាប លាង ៕
ចែករំលែកព័តមាននេះ