រាជធានីភ្នំពេញ ៖ នៅទីបំផុតកីឡាករ ឯម លីថូ ដែលបានបោះជំហានក្នុងទីលានប្រដាល់មុនសិស្សប្អូន ទី ពន្លែត នៅតែរក្សាបានភាពខ្លាំងរបស់ខ្លួនដូចការគ្រោងទុក ដោយមិនបានធ្វើឲ្យរលកក្រោយតាមផ្តួលហើយរុញឲ្យរងភាពអាម៉ាស់នោះឡើយ ។ទោះជាយ៉ាងណា គេចាប់អារម្មណ៍ថា ក្នុងជំនួបបើកឆាករវាងពួកគេ គឺ ទី ពន្លែត នៅតែមានឱកាសធ្វើឲ្យ ឯម លីថូ បុកពោះម្ដងៗ
រាជធានីភ្នំពេញ ៖ នៅទីបំផុតកីឡាករ ឯម លីថូ ដែលបានបោះជំហានក្នុងទីលានប្រដាល់មុនសិស្សប្អូន ទី ពន្លែត នៅតែរក្សាបានភាពខ្លាំងរបស់ខ្លួនដូចការគ្រោងទុក ដោយមិនបានធ្វើឲ្យរលកក្រោយតាមផ្តួលហើយរុញឲ្យរងភាពអាម៉ាស់នោះឡើយ ។ទោះជាយ៉ាងណា គេចាប់អារម្មណ៍ថា ក្នុងជំនួបបើកឆាករវាងពួកគេ គឺ ទី ពន្លែត នៅតែមានឱកាសធ្វើឲ្យ ឯម លីថូ បុកពោះម្ដងៗ ជាមួយក្បាច់ប្រដាល់របស់គេ ដោយមិនអាចមើលស្រាលបានឡើយ ។
ការជួបគ្នាលើកទីមួយរវាងកីឡាករ ឯម លីថូ មកពីក្លិបគ្រុឌមានជ័យ និងសិស្សប្អូន ទី ពន្លែត មកពីក្លិបសឹករងខេត្តសៀមរាប កាលពីថ្ងៃអាទិត្យ ទី២ កញ្ញា បានធ្វើឲ្យសង្វៀនកោះពេជ្រមានការទាក់ទាញច្រើនគួរសម បើទោះជាកីឡាករទាំងពីររូបមិនមែនជាគូសងសឹកក៏ដោយ។ ចាប់តាំងពីទឹកទី២រហូតមក កីឡាករទាំងពីររូបបានធ្វើការវាយសម្រុកគ្នាមិនដកដៃឡើយ បើទោះជាក្បាច់វាយលុករបស់កីឡាករឯម លីថូ ត្រូវគេមើលឃើញថា មានប្រៀបជាងសិស្សប្អូន ទី ពន្លែតយ៉ាងណាក្តី ។
ប៉ុន្តែកីឡាករជើងថ្មី ទី ពន្លែត ក៏សម្បូរក្បាច់ប្រដាល់ដែលធ្វើឲ្យអ្នកទស្សនាកោតសរសើរថា គឺជាជើងខ្លាំងស្រករក្រោយ ក្នុងពេលវាយលុកលើ ឯម លីថូ ដែរ ។ នេះបញ្ជាក់ថា ទី ពន្លែត ដែលមានប្រវត្តិប្រកួតត្រឹមតែ៤២ដង បានធ្វើឲ្យដៃគូ ឯម លីថូ ដែលជាជើងចាស់មានបទពិសោធន៍ប្រកួតជិត១០០ដង បះសក់នៅគ្រប់ទឹក ដែលពួកគេបានធ្វើការវាយសម្រុកគ្នា ។
ទោះជាយ៉ាងណា ការវាយបកខ្លាំងៗរបស់ ទី ពន្លែត នៅតែមិនអាចធ្វើអី្វជើងចាស់ ឯម លីថូ បានឡើយ ហើយនៅចុងបញ្ចប់នៃការប្រកាសលទ្ធផល គឺឯម លីថូ នៅតែទទួលពិន្ទុឈ្នះទី ពន្លែត ដោយមិនអាចប្រកែកបាន ។ ទី ពន្លែត អះអាងថា ថ្វីដ្បិតតែការប្រកួតលើកទី១នេះ ខ្លួនបានទទួលបរាជ័យ ប៉ុន្តែនៅឱកាសលើកក្រោយ គឺលោកនឹងឡើងសងសឹក ដោយមានជំនឿចិត្តថា ការប្រកួតលើកទី២នោះនឹងមិនអាចឲ្យជើងចាស់ ឯម លីថូ យកប្រៀបលើខ្លួនបានទៀតនោះទេ។ កីឡាករវ័យ២០ឆ្នាំរូបនេះ បន្លុយពាក្យថា តាមរយៈការស៊ីមិនដាច់ក្នុងជំនួបនៅកោះពេជ្ររបស់ ឯម លីថូ គឺមិនមែនជារឿងលំបាកឡើយ សម្រាប់ឲ្យខ្លួនទទួលជ័យជម្នះក្នុងវគ្គប្រកួតសងសឹក ដែលនឹងគ្រោងឡើងសង្វៀនម្ដងទៀតក្នុងពេលឆាប់ៗខាងមុខ ។
ដោយឡែក ចំពោះលទ្ធផលគូផ្សេងទៀតនៅលើសង្វៀនដដែលនោះដែរ កីឡាករ ធន់ ស្រួច មកពីក្លិបយុវជនកម្ពុជាមានជ័យ បានចាញ់ពិន្ទុកីឡាករ ទូច សុភាព មកពីក្លិបបក្សីស្លាបដែក។ កីឡាករ ពេជ្រ ម្ទេសខ្មាំង មកពីក្លិបអរុណរះ បានធ្វើឲ្យកីឡាករ សាញ់ ណាគីន មកពីក្លិបរស្មីភូមិគាបខេត្តបន្ទាយមានជ័យសន្លប់ក្នុងទឹកទី៣ ។ កីឡាករ ជន សាវុធ មកពីក្លិបអូដឹមកីឡា ឈ្នះកីឡាករ ចាន់ មុន្នី មកពីក្លិបនិរោធមានជ័យដោយពិន្ទុ និងគូពិសេសទី៤ គឺកីឡាករ ឈាន ហុង មកពីក្លិបអាជ្ញាធរជាតិអាវុធគីមី បានធ្វើឲ្យកីឡាករ កែវ វីរៈ មកពីក្លិបគជសារកីឡាសន្លប់ក្នុងទឹកទី៤ ដោយសារតែកីឡាករ ឈានហុង បានធ្វើការវាយសម្រុកយ៉ាងអស់ពីសមត្ថភាពទៅលើគូប្រកួតរបស់ខ្លួន ។
គូប្រកួតនេះហើយ ដែលត្រូវគេកត់សម្គាល់ថា ជាគូជក់ចិត្តបំផុតប្រចាំនៅសង្វៀនកោះពេជ្រ កាលពីល្ងាចថ្ងៃអាទិត្យនោះ ខណៈដែលមុនឈានដល់សន្លប់ កីឡាករ កែវ វីរៈ ក៏បានធ្វើការវាយលុកតបទៅតបមកទៅលើគូប្រកួតរបស់ខ្លួនដែរនោះ ៕
ចែករំលែកព័តមាននេះ