រាជធានីភ្នំពេញ ៖ ការប្រើស្នៀតកណ្តាប់ដៃវាយចូលមុខមួយដៃយ៉ាងពេញទំហឹងរបស់កីឡាករ ឯម ចាន់រស្មី មកពីក្លិបគ្រុឌមានជ័យ លើកីឡាករ ឆាំ រ៉ែម មកពីក្លិបសិង្ហកីឡា និងការបញ្ជូនស្នៀតកែងវាយចំថ្ងាសបន្ថែមទៀតនោះ បានធ្វើឱ្យ ឯម ចាន់រស្មី ឈ្នះពិន្ទុ ឆាំ រ៉ែម ទាំងវេទនាបំផុត សម្រាប់ការប្រកួតនៅលើសង្វៀនទូរទស្សន៍ CTN វគ្គជម្រុះវិលជុំ ដើម្បីឈានទៅដណ្តើមខ្សែក្រវាត់ K-cement ទម្ងន់៥៤គីឡូក្រាម កាលពីរសៀលថ្ងៃអាទិត្យ ទី២ កញ្ញា ។
រស្មី មានប្រៀបជាង ឆាំ រ៉ែម ត្រឹមតែទឹកទី១បន្តិចប៉ុណ្ណោះ ខណៈពេលដែលគេបានបញ្ជូនស្នៀតកណ្តាប់ដៃវាយចូលមុខ ឆាំ រ៉ែម មួយដៃយ៉ាងពេញទំហឹង រហូតដល់អាជ្ញាកណ្តាលលោក រាម កុសល រាប់៨ដង ទើបអាចប្រកួតវិញបាន។ ប៉ុន្តែនៅទឹកទី២ និងទឹកទី៣ រស្មី ត្រូវ ឆាំ រ៉ែម វាយបកសងវិញយ៉ាងសាហាវបំផុត ជាពិសេសស្បៀតជើងរបស់គេបានទាត់ចូលកណ្តៀតក្អម រស្មី ពេញៗតែម្តង ។ រស្មី ដែលបានបាត់បង់កម្លាំងស្ទើរតែទាំងស្រុងនៅទឹកទី៣នោះ បានព្យាយាមសម្រុកចូលកៀកវាយកែងបកសងវិញ ដើម្បីស្រោចស្រង់ស្ថានការណ៍របស់គេឡើងវិញ។ ការព្យាយាមរបស់ រស្មី ពិតជាមិនឥតប្រយោជន៍ទេ ស្នៀតកែងរបស់គេបានបុកចំថ្ងាស ឆាំ រ៉ែម យ៉ាងពេញទំហឹង បណ្តាលឱ្យបែករយះមានឈាមហូរស្រោចមុខ ។ ចូលដល់ទឹកទី៥ រស្មី មើលទៅដូចជាចាញ់ប្រៀប ឆាំ រ៉ែម បន្តិចវិញ ប៉ុន្តែពេលប្រកាសលទ្ធផល ស្រាប់តែឱ្យ រស្មី ឈ្នះពិន្ទុទៅវិញ ។
លោកមាស សុខគ្រី បានបង្ហាញនូវការខកចិត្តយ៉ាងខ្លាំង ព្រោះថា ការផ្តល់ពិន្ទុឱ្យ ឯម ចាន់រស្មី ឈ្នះគឺជារឿងមិនយុត្តិធម៌ឡើយ ។ រស្មី ប្រកួតបាន២លើក ឈ្នះ១លើក ចាញ់១លើក មាន៤ពិន្ទុ រីឯឆាំ រ៉ែម ប្រកួតបាន២លើកចាញ់ទាំង២លើក ទើបតែរកបាន២ពិន្ទុប៉ុណ្ណោះ ។ ទោះជាយ៉ាងណា លទ្ធផលនេះ មិនទាន់ប្រាកដថា អាចធ្វើឱ្យ ឯម ចាន់រស្មី គេចផុតពីការហាលខោ ឬអត់នោះទេ។
ឯគូប្រកួតមិត្តភាពវិញ ឡេះ តើក មកពីក្លិបពុទ្ធសេរីវង្សកីឡា ប្រកួតស្មើពិន្ទុ ផាវ ភឿត មកពីក្លិបកងពលធំអន្តរាគមន៍លេខ៣ព្រះវិហារ ។ នេន វណ្ណា មកពីក្លិបកងពលធំអន្តរាគមន៍លេខ៣ព្រះវិហារ ផ្តួល ធី តុងហីុ មកពីក្លិបសាលវ័ន្តកីឡា ឱ្យសន្លប់នៅទឹកទី៣ និងម៉ាប់ ឆាយា មកពីក្លិបខ្លារខិនមានប្ញទ្ធិ ផ្តួល ចាន់ សុខហួន មកពីក្លិបនិរោធមានជ័យឱ្យសន្លប់នៅក្នុងទឹកទី៤ ៕
ចែករំលែកព័តមាននេះ