រាជធានីភ្នំពេញ ៖ សមត្ថកិច្ចនគរបាលផ្នែកព្រហ្មទណ្ឌខណ្ឌ៧មករា ដោយសហការជាមួយនគរបាលប៉ុស្តិ៍រដ្ឋបាលបឹងព្រលឹត កាលពីវេលាម៉ោងជិត២រសៀលថ្ងៃទី១ កញ្ញា បានឃាត់ខ្លួនឃាតករសម្លាប់យុវជនពិការនៅក្នុងផ្ទះ ដែលករណីនេះជាជំហានដំបូងសមត្ថកិច្ចសន្និដ្ឋានថា ជាអំពើប្លន់យកទ្រព្យសម្បត្តិ។ ឃាតករដែលសមត្ថកិច្ចចាប់ឃាត់ខ្លួននេះ ឈ្មោះម៉ុក វណ្ណធី ហៅស្រីនាង ភេទស្រី អាយុ៣២ឆ្នាំ (ជាស្ត្រីមេម៉ាយកូនខ្ចីទើបបាន១ខែត្រូវប្តីបោះបង់ចោល) មុខរបរលក់បបរ ស្នាក់នៅផ្ទះលេខ៣៣E2 ផ្លូវលេខ១៩៨ សង្កាត់បឹងព្រលឹត ខណ្ឌ៧មករា ក្បែរផ្ទះយុវជនពិការដែរ ។
ក្រោយពីត្រូវឃាត់ខ្លួន ស្ត្រីជាប់ចោទសារភាពថា នាងពិតជាបានសម្លាប់ឈ្មោះប៉ាត់ សុវណ្ណរ៉ា ជាជនពិការស្វិតជើងទាំងពីរនោះប្រាកដមែន ដោយសារតែជនពិការនោះមានគំនិតអាក្រក់ចាប់នាងរំលោភ តែមិនបានសម្រេច ។ នាងម៉ុក វណ្ណធី រៀបរាប់ថា នៅវេលាម៉ោងប្រមាណជាង១រសៀលថ្ងៃទី៣០ សីហា បានយកភួយទៅហាលនៅយ៉ខាងមុខផ្ទះ ពេលនោះឈ្មោះប៉ាត់ សុវណ្ណរ៉ា ក៏ដើរចេញពីផ្ទះរបស់ខ្លួនពឹងនាងឱ្យជួយចូលមើលតេឡេទូរទស្សន៍ដែលប្រើមិនកើត ។ ដោយមានការពឹងពាក់យ៉ាងនេះ ក្រោយពេលហាលភួយហើយនាងក៏ដើរចូលផ្ទះឈ្មោះសុវណ្ណរ៉ា ឯសុវណ្ណរ៉ា ដើរតាមពីក្រោយ ។ លុះពេលចូលផុតដល់ក្នុងផ្ទះស្រាប់តែឈ្មោះសុវណ្ណរ៉ា ទាញទ្វារបិទ ព្រមទាំងដាក់គន្លឹះទៀតផង ហើយបានរុញនាងឱ្យអង្គុយលើគ្រែ រួចទម្លាក់វាំងនន និងចាប់ផ្តើមធ្វើសកម្មភាពប៉ងរំលោភ ។
តាមស្ត្រីជាជនដៃដល់បន្តថា ខណៈពេលនោះបានស្រវេស្រវារើបម្រះប៉ះចំកាំបិតមុខស្រួចមួយនៅក្បាលដំណេកក៏ចាក់ឈ្មោះសុវណ្ណរ៉ាជាច្រើនកន្លែងក្នុងគោលបំណងឱ្យគេដោះលែង ។ ដំបូងនាងចាក់រាក់ៗទេ ប៉ុន្តែដោយសារការប៉ុនប៉ងមិនដកថយ នាងក៏បានចាក់ត្រង់កបណ្តាលឱ្យហូរឈាមយ៉ាងច្រើន និងប្រកាច់ធ្លាក់ពីលើគ្រែ ទើបនាងរួចខ្លួន ។ ស្ត្រីជាប់ចោទនិយាយទៀតថា ពេលឃើញជនរងគ្រោះហូរឈាមច្រើនពេក នាងបានយកក្រណាត់រុំកហើយរើកកាយខោអាវក្នុងទូទម្លាក់រាយប៉ាយដើម្បីបំភាន់ភ្នែកសមត្ថកិច្ចថាជាអំពើប្លន់ បន្ទាប់មកក៏បើកទ្វារចេញទៅផ្ទះនាងថែមទាំងចាក់សោផ្ទះជនរងគ្រោះពីក្រៅ។ ស្ត្រីដៃដល់បានបញ្ជាក់ថា ពេលរើកកាយខោអាវក្នុងទូឃើញចិញ្ចៀន១វង់ ក៏យកដែរ ប៉ុន្តែនៅពេលទៅលាងឈាមក្នុងបន្ទប់ទឹកស្រាប់តែរបូតដៃធ្លាក់ចូលលូបង្គន់បាត់ទៅ។
យោងតាមចម្លើយសារភាពរបស់ស្ត្រីត្រូវចោទថា ពិតជាបានចាក់សម្លាប់ជនរងគ្រោះដោយអះអាងថាជាការការពារខ្លួននៅពេលគេប៉ុនប៉ងរំលោភ។ ទោះជាយ៉ាងណាក៏ដោយ ការសារភាពថា យុវជនពិការប៉ុនប៉ងរំលោភនោះមិនដឹងថាជាការពិត ឬក៏យ៉ាងណានោះទេ ហើយ ក្រោយពីការចាប់ខ្លួនសមត្ថកិច្ចនគរបាលខណ្ឌ៧មករា ក៏បានរៀបចំសំណុំរឿងបញ្ជូនទៅកាន់សាលាដំបូងរាជធានីនៅរសៀលថ្ងៃទី២ កញ្ញា ។
គួរបញ្ជាក់ថា កាលពីវេលាម៉ោង៣រសៀលថ្ងៃទី៣០ សីហា មានការភ្ញាក់ផ្អើលមួយនៅផ្ទះលេខ១៥E2 ផ្លូវលេខ១២៥ សង្កាត់បឹងព្រលឹត ខណ្ឌ៧មករា ក្រោយពីយុវជនម្នាក់ជាជនពិការស្វិតជើងទាំង២ត្រូវជនមិនស្គាល់មុខអារ.កសម្លាប់នៅក្នុងថ្លុកឈាម ។ បន្ទាប់ពីមានករណីនេះកើតឡើង សមត្ថកិច្ចគ្រប់លំដាប់ថ្នាក់បានចុះទៅពិនិត្យ និងបានសន្និដ្ឋានជាជំហានដំបូងថាជាអំពើប្លន់ ។ ការសន្និដ្ឋានថាជាអំពើប្លន់នោះ ពីព្រោះនៅកន្លែងកើតហេតុបានបន្សល់ទុករបស់របររាយប៉ាយពេញផ្ទះ ជាងនេះទៀតក្រុមគ្រួសារជនរងគ្រោះបញ្ជាក់ថា មានបាត់បង់ទ្រព្យសម្បត្តិគឺចិញ្ចៀន១វង់ផង ។ ក្រោយពីការស្រាវជ្រាវយ៉ាងដុតដៃដុតជើងរបស់នគរបាលខណ្ឌ៧មករា រយៈពេល៣ថ្ងៃក្រោយមកឃាតករក៏ត្រូវបានវែកមុខ ៕
ចែករំលែកព័តមាននេះ