កីឡាករលំដាប់ទី១ពិភពលោករ៉ូជើ ហ្វេដឺរ័រនិងកីឡាការិនីអាមេរិកស៊េរីណា វីលៀមទាំងពីរនាក់បានឈានចូលដល់ជុំទី៤បន្តទៀតបន្ទាប់ពីបានយកឈ្នះគូប្រកួតរៀងៗខ្លួនក្នុងជុំទី៣កាលពីថ្ងៃសៅរ៍ទី១កញ្ញានៅក្រុងញូវយ៉កសហរដ្ឋអាមេរិក។ ប៉ុន្តែអ្វីដែលជាការសោកស្តាយក្នុងពេលជាមួយគ្នានោះ នាងជេឡេណា ជែនកូវិចដែលជាអតីតកីឡាការិនីលំដាប់ទី១ពិភពលោកត្រូវធ្លាក់ចេញពីកម្មវិធីប្រកួតជាស្ថាពរ ។
រ៉ូជើ ហ្វេរដឺរ័រដែលកំពុងតែព្យាយាមយកឈ្នះពានជើងឯក US Openជាលើកទី៦នោះបានយកឈ្នះកីឡាករអេស្ប៉ាញ Fernando Verdasco ក្នុងលទ្ធផល៦-៣,៦-៤ និង៦-៤ ។ ថ្លែងបន្ទាប់ពីឈ្នះការប្រកួតកីឡាករស្វ៊ីសរូបនេះបានបញ្ជាក់ថា៖«ជារឿងល្អខ្លាំងណាស់ដែលបានឆ្លងផុតជុំនេះ។ ខ្ញុំបានព្យាយាមវាយបកយ៉ាងខ្លាំង។ នៅទីនេះមានខ្យល់ខ្លាំង ដូច្នេះវាពិបាកប្រកួតបន្តិចដែរ»។
នៅជុំបន្ទាប់គេនឹងជួបប្រកួតជាមួយកីឡាករអាមេរិក Mardy Fishឬកីឡាករបារាំង Gilles Simonដែលមិនទាន់បានបញ្ចប់ការប្រកួតនៅឡើយ ។ សូមបញ្ជាក់ថា ហ្វេដឺរ័រធ្លាប់បានយកឈ្នះពានជើងឯកក្របខណ្ឌនេះចំនួន៥លើករួចមកហើយគឺនៅឆ្នាំ ២០០៤, ២០០៥, ២០០៦, ២០០៧និង២០០៨ ។
នាងស៊េរីណា វីលៀមដែលធ្លាប់បានយកឈ្នះពានជើងឯកក្របខណ្ឌធំនេះ៣លើករួចមកហើយនោះ យកឈ្នះកីឡាការិនីរុស្ស៊ី Ekaterina Makarovaក្នុងលទ្ធផល៦-៤និង៦-០។ នាងបាននិយាយថា៖«ខ្ញុំគ្រាន់តែចង់បន្តក្តីរីករាយថាតើខ្ញុំឈ្នះឬចាញ់»។
នៅជុំបន្ទាប់ស៊េរីណានឹងជួបប្រកួតជាមួយកីឡាការិនីឆែក Andrea Hlavackovaដែលបានយកឈ្នះកីឡាការិនីរុស្ស៊ី Maria Kirilenkoក្នុងលទ្ធផល៥-៧,៦-៤និង៦-៤ ។
កីឡាការិនីលំដាប់ទី២ក្នុងកម្មវិធី អានីយ៉េស្កា រែដវ៉ាន់ស្កាបានតស៊ូជម្នះនឹងកំដៅរហូតបំបាក់កីឡាការិនីស៊ែប៊ីជេឡេណា ជែនកូវិចក្នុងលទ្ធផល ៦-៣និង៧-៥ ។ ថ្លែងបន្ទាប់ពីដណ្តើមបានជ័យជម្នះ កីឡាការិនីប៉ូឡូញរូបនេះបានបញ្ជាក់ថា ៖«ខ្ញុំមានអារម្មណ៍ដូចជាត្រូវរលាយខ្លួនក្នុងពេលស្ថិតនៅលើទីលានប្រកួត ។ តែទោះជាក្តៅខ្លាំងយ៉ាងណា ខ្ញុំនៅតែសង្គ្រោះការប្រកួតបាន» ។
ឈានចូលជុំទី៤នោះផងដែរមានកីឡាការិនីស៊ែប៊ីអាណា អុីវ៉ាណូវិច កីឡាការនីអុីតាលីRoberta Vinci កីឡាការិនីអាល្លឺម៉ង់ Angelique Kerber កីឡាការិនីឆែក Andrea Hlavackova និងកីឡាការិនីប៊ុលហ្គារី Svetana Pironkova ៕
ចែករំលែកព័តមាននេះ