មហារីកដោះជាមហារីកដែលកើតនៅក្នុងបណ្តាកោសិកាដោះ ។ មហារីកដោះមានច្រើនប្រភេទ តែប្រភេទដែលកើតញឹកញាប់បំផុតគឺមហារីកក្នុងបំពង់ទឹកដោះ ។ ជាធម្មតាមហារីកនេះតែងកើតមានលើស្ត្រី ចំណែកលើបុរសមានតិចតួចបំផុត ។
*រោគសញ្ញា៧ចំណុច ៖
ប្រសិនជាអស់លោកអ្នកប្រទះនូវរោគសញ្ញាណាមួយដូចខាងក្រោម សូមប្រញាប់ទៅជួបជាមួយវេជ្ជបណ្ឌិតជាបន្ទាន់ ។ វាជាការសំខាន់ខ្លាំងណាស់ដែលត្រូវអនុញ្ញាតឱ្យវេជ្ជបណ្ឌិតវាយតម្លៃពីរោគសញ្ញារបស់អ្នក ។ រោគសញ្ញាដែលអ្នកអាចជួបប្រទះមានដូចជា ៖
១-មានដុំពកលើដោះដែលមានសភាពខុសប្លែកពីសាច់នៅជុំវិញ ។
២-ចេញឈាមតាមក្បាលដោះ ។
៣-ទំហំ ឬរាងរៅដោះមានការផ្លាស់ប្តូរ ។
៤-ស្បែកលើដោះផ្លាស់ប្តូរ តួយ៉ាងដូចជាខួចជាដើម។
៥-ក្បាលដោះមានការប្រែប្រួល(រួញស្វិតចូលក្នុងដោះ) ។
៦-របកក្បាលដោះ ឬស្បែកដោះ ។
៧-ស្បែកដោះឡើងពណ៌ក្រហមដូចជាសំបកក្រូច ។
* មូលហេតុបង្ក ៖
វាមិនច្បាស់ទេថា តើអ្វីដែលបង្កឱ្យកើតមហារីកដោះនោះ ។ វេជ្ជបណ្ឌិតគ្រាន់តែដឹងថា មហារីកដោះកើតមាននៅពេលកោសិកាដោះមួយចំនួនចាប់ផ្តើមរីកលូតលាស់ប្លែកពីធម្មតា ។ កោសិកាទាំងនេះបំបែកខ្លួនរហ័សជាងកោសិកាសុខភាព ។ ការប្រមូលផ្តុំកោសិកាបង្កើតបាននូវដុំសាច់ ហើយបន្ទាប់មកវាបានឆ្លងរាលដាលដល់ដោះ កូនកណ្តុរនិងផ្នែកផ្សេងទៀតនៃរាងកាយរបស់អ្នក ។
មហារីកដោះភាគច្រើនបំផុតកើតមាននៅក្នុងបំពង់ផលិតទឹកដោះ ប៉ុន្តែវាក៏អាចកើតមាននៅក្នុងក្រពេញទឹកដោះផងដែរ ។ វេជ្ជបណ្ឌិតបានប៉ាន់ស្មានថា មហារីកដោះ មានតែ៥ទៅ១០ភាគរយប៉ុណ្ណោះដែលទាក់ទិនជាមួយហ្សែន(Gene)ឆ្លងពីម្តាយទៅកូន និងពីកូនទៅចៅ ។
*កត្តាប្រឈមទាំងឡាយ ៖
មានកត្តាមួយចំនួនដែលធ្វើឱ្យអ្នកប្រឈមនឹងជំងឺនេះ ប៉ុន្តែកត្តាខ្លះពិតជាមិនមានន័យថា អ្នកត្រូវតែកើតជំងឺនេះទេ ។ ស្ត្រីភាគច្រើនដែលបានកើតជំងឺនេះនៅតែមិនទាន់យល់ដឹងច្រើននូវកត្តាប្រឈមជាងស្ត្រីដែលមិនទាន់កើតនោះទេ។
កត្តាដែលងាយធ្វើឱ្យអ្នកប្រឈមនឹងមហារីកដោះរួមមាន ៖
– មានភេទជាស្ត្រី
– ឈានចូលវ័យចំណាស់ ៖ អ្នកកាន់តែចាស់ការប្រឈមកាន់តែមានខ្ពស់ ។ ស្ត្រីដែលចូលដល់វ័យចាប់ពី៥៥ឆ្នាំឡើងទៅប្រឈមនឹងជំងឺនេះខ្លាំងជាងស្ត្រីវ័យក្មេង ។
- ធ្លាប់កើតជំងឺនេះម្តងរួចមកហើយ ៖ ប្រសិនជាអ្នកធ្លាប់កើតជំងឺនេះលើដោះម្ខាងពីមុនមក នោះវាអាចកើតមានលើដោះម្ខាងទៀត។
– មានម្តាយ ឬបងស្រីធ្លាប់កើតជំងឺនេះ ។
– ធ្លាប់ថតឆ្លុះដោយកាំរស្មី ៖ ប្រសិនជាអ្នកធ្លាប់ទទួលការព្យាបាលទ្រូងដោយកាំរស្មីកាលពីនៅក្មេង អ្នកអាចប្រឈមនឹងជំងឺនេះពេលក្រោយក្នុងជីវិត ។
-ធាត់លើសទម្ងន់ ៖ ជាលិកាខ្លាញ់ដែលផលិត estrogenអាចនឹងជួយបង្កើនល្បឿនមហារីក ។
* ឆាប់មានរដូវ ៖ ស្ត្រីមានរដូវមុនអាយុ១២ឆ្នាំប្រឈមនឹងជំងឺមហារីកដោះខ្ពស់ ។
– អស់រដូវក្នុងអាយុចាស់ពេក ៖ ប្រសិនជាអ្នកអស់រដូវចាប់ពីវ័យ៥៥ឆ្នាំ អ្នកពិតជាប្រឈមនឹងជំងឺនេះ ។
– មានកូនទី១ក្នុងវ័យចាប់ពី៣៥ឆ្នាំ ។
– ទទួលទានគ្រឿងស្រវឹង ។
*វិធីទប់ស្កាត់ ៖
ការផ្លាស់ប្តូរបែបបទនៃការរស់នៅប្រចាំថ្ងៃអាចជាវិធីល្អមួយកាត់បន្ថយមហារីកដោះ។ នេះជាវិធីដែលអ្នកអាចធ្វើបានដោយខ្លួនឯង៖
– ប្រសិនជាជៀសមិនរួចនូវគ្រឿងស្រវឹង អ្នកអាចទទួលវាត្រឹមកម្រិតមធ្យម ។
-ធ្វើលំហាត់ប្រាណយ៉ាងហោចណាស់ឱ្យបាន៣០នាទី ៥ទៅ៦ថ្ងៃក្នុងមួយសប្តាហ៍ ។ ប្រសិនជាមិនអាចទៅរួច អ្នកអាចចាប់ផ្តើមសន្សឹមៗ។
-កំណត់លើការព្យាបាលអ័រម៉ូនក្រោយពីអស់រដូវ ។
-រក្សាទម្ងន់ខ្លួនឱ្យនៅថេរក្នុងកម្រិតនៃសុខភាព៕
ចែករំលែកព័តមាននេះ