ខេត្តស្វាយរៀង ៖ ក្រុមអាជីវករជាច្រើននាក់ដែលលក់ដូរនៅផ្សារស្វាយជ្រំ ស្រុកស្វាយជ្រំ និយាយថា ក្នុង១ថ្ងៃៗផ្សារនេះមានសំរាមមិនជាច្រើនប៉ុន្មានទេ ដោយសារតែអាជីវករលក់ដូរនៅផ្សារនេះមានចំនួនតិច ហើយបើគេកើបសំរាមទាំងនោះយកទៅចោលជារៀងរាល់ថ្ងៃ ក៏ប្រាកដជាគ្មានបញ្ហាចោទដែរ ។ ប៉ុន្តែដោយសារតែក្រុមអនាម័យរបស់អ្នកម៉ៅការផ្សារមិនព្រមកើបរាល់ថ្ងៃ គឺទុកទាល់តែ៧ថ្ងៃទៅ១០ថ្ងៃទើបនាំគ្នាមកកើបម្តង ហេតុនេះហើយទើបសំរាមទាំងនោះចេះតែកើនច្រើនឡើងៗរហូតគរដូចភ្នំ ហើយគាប់ជួនពេលនេះជារដូវវស្សាធ្លាក់ភ្លៀងផងនោះ គំនរសំរាមរលួយ និងប៉ះពាល់ដល់សុខភាពយ៉ាងធ្ងន់ធ្ងរ ។
ដោយសារតែភ្នាក់ងារអនាម័យផ្សារមានការយឺតយ៉ាវក្នុងការកើបប្រមូលសំរាមបែបនេះ ទើបក្លិនស្អុយអសោចិ៍នៃសំរាមទាំងនោះសាយភាយពាសពេញផ្សារ ធ្វើឱ្យក្រុមអាជីវករ ព្រមទាំងប្រជាពលរដ្ឋដែលចូលមកទិញម្ហូបអាហារពិបាកទ្រាំជាខ្លាំង រហូតមានអ្នកខ្លះកើតជាឈឺក្បាលវិលមុខរកកល់ចង់ក្អួតក៏មាន ។ ជាពិសេសសត្វរុយរាប់ពាន់ក្បាលដែលរោមសំរាមទាំងនោះបានហើរទៅទំលើបន្លែ ត្រីសាច់ និងទំនិញផ្សេងៗរបស់អាជីវករ ធ្វើឱ្យក្រុមអាជីវករលក់លែងដាច់ ព្រោះប្រជាពលរដ្ឋខ្ពើមរអើមលែងហ៊ានទិញយកទៅទទួលទាន ។
ស្ត្រីម្នាក់ដែលជាអាជីវករលក់ដូរនៅក្នុងផ្សារនេះនិយាយថា រាល់ថ្ងៃនេះពួកគាត់មានការលំបាកណាស់ ដោយសារតែសំរាមទាំងអស់នៅក្នុងផ្សារត្រូវបានគេកើបយកមកគរទុកនៅចំកណ្តាលផ្សារខាងក្រោយតូបលក់របស់គាត់ ដូច្នេះរូបគាត់ត្រូវអង្គុយហិតក្លិនស្អុយរបស់សំរាមទាំងនេះជារៀងរាល់ថ្ងៃធ្វើឱ្យប៉ះពាល់ដល់សុខភាពរបស់គាត់ជាខ្លាំង ។ រូបគាត់បានព្យាយាមប្រាប់ក្រុមអ្នកម៉ៅការផ្សារជាច្រើនដងមកហើយឱ្យឆាប់កើបសំរាមទាំងនេះយកទៅចោល ប៉ុន្តែក្រុមអ្នកម៉ៅការផ្សារនេះមិនព្រមធ្វើតាមការស្នើសុំរបស់ក្រុមអាជីវករសោះ ។
អាជីវករជាច្រើននាក់នៅផ្សារស្វាយជ្រំនេះបានលើកឡើងថា ពួកគាត់ចង់ឱ្យមន្ត្រីធំៗនៅថ្នាក់ស្រុកក៏ដូចជាខេត្តចុះមកមើលផ្សារស្វាយជ្រំនេះខ្លាំងណាស់ ព្រោះពេលណាដែលមានមន្ត្រី ធំៗចង់ចុះមកមើលម្តងៗ ក្រុមអ្នកម៉ៅការផ្សារតែងតែនាំគ្នាមកប្រមូលកើបសំរាមយកទៅចោល និងសម្អាតបរិស្ថានក្នុងផ្សារជាមុន១ថ្ងៃយ៉ាងស្អាត មិនឱ្យមន្ត្រីធំៗទាំងនោះបានឃើញគំនរសំរាម និងក្លិនស្អុយនៃសំរាមទាំងនោះឡើយ ដូច្នេះក្រុមអាជីវករក៏បានស្រូបយកខ្យល់អាកាសល្អនៅពេលនោះដែរ ។
ឆ្លើយតបចំពោះការរអ៊ូរទាំនេះ មន្ត្រីយោធាម្នាក់ឈ្មោះមន ជាតំណាងអ្នកម៉ៅការផ្សារស្វាយជ្រំ នេះបានឱ្យដឹងតាមទូរស័ព្ទថា រឿងសំរាមនេះក្រុមអនាម័យគេបានចុះកើបប្រមូលជាប្រចាំ គឺ២ ឬ៣ថ្ងៃម្តង តែឱ្យស្អាតគ្មានសំរាមសោះ គឺមិនអាចទេ ផ្សារណាក៏ដូចផ្សារណាដែរ តែងតែមានសំរាម ដូច្នេះលោកសុំមិនបកស្រាយទេ ព្រោះរវល់ខ្លាំងណាស់ ៕
ចែករំលែកព័តមាននេះ