ADផ្ទាំងផ្សព្វផ្សាយពាណិជ្ជកម្ម

Picture

ក្រសួងបរិស្ថាន៖ ប្រជាជន​កម្ពុជា ជិត​ពាក់កណ្តាល​ប្រទេស ចូលរួម​កាត់​បន្ថយ​ការ​ប្រើប្រាស់​ប្លា​ស្ទិ​ក

3 ខែ មុន

រាជធានី​ភ្នំពេញ ៖ គិត​ត្រឹម​ថ្ងៃ​ទី​៣០ ខែតុលា ឆ្នាំ​២០២៣ ប្រជាពលរដ្ឋ​ជិត​ពាក់កណ្តាល់​ប្រទេស បាន​ចូលរួម​ក្នុង​យុទ្ធនាការ​កាត់​បន្ថយ​ការ​ប្រើប្រាស់​ប្លា​ស្ទិ​ក ដែល​ផ្តួចផ្តើម​ឡើង​ដោយ​ក្រសួងបរិស្ថាន អស់​រយៈពេល​២​ខែ កន្លង​មកនេះ…

រាជធានី​ភ្នំពេញ ៖ គិត​ត្រឹម​ថ្ងៃ​ទី​៣០ ខែតុលា ឆ្នាំ​២០២៣ ប្រជាពលរដ្ឋ​ជិត​ពាក់កណ្តាល់​ប្រទេស បាន​ចូលរួម​ក្នុង​យុទ្ធនាការ​កាត់​បន្ថយ​ការ​ប្រើប្រាស់​ប្លា​ស្ទិ​ក ដែល​ផ្តួចផ្តើម​ឡើង​ដោយ​ក្រសួងបរិស្ថាន អស់​រយៈពេល​២​ខែ កន្លង​មកនេះ ។

យោង​តាម​ទិន្នន័យ​ផ្តល់​ដោយ​មន្ទីរ​បរិស្ថាន​រាជធានី​ខេត្ត​ទាំងអស់ ចាប់ពី​ថ្ងៃ​ទី​០១ ខែកញ្ញា ឆ្នាំ​២០២៣ រហូត​មក​ដល់​ថ្ងៃ​ទី​៣០ ខែតុលា​នេះ សិស្សានុសិស្ស​សរុប​ចំនួន ១,៨៦១,២២៣​នាក់ រួម​ជាមួយ​លោកគ្រូ​អ្នកគ្រូ សរុប​ចំនួន ៦៦,៥០៣​នាក់ មក​ពី​គ្រឹះស្ថាន សិក្សា​សាធារណៈ និង​ឯកជន ចំនួន ៣,៩៦៩ សាលា ទូ​ទាំង​ប្រទេស បាន​ចូលរួម​ក្នុង​យុទ្ធនាការ កាត់​បន្ថយ​ការ​ប្រើប្រាស់​ប្លា​ស្ទិ​ក បាន​ចំនួន ៦,២០៨​ដង ។

ដោយឡែក កម្មករ​កម្មការិនី នៅ​តាម​រោងចក្រ​សហគ្រាស ចំនួន ៨៣​កន្លែង​ផ្សេង​ទៀត បាន​ស្ម័គ្រចិត្ត​ចូលរួម​យុទ្ធនាការ ១ កញ្ញា និង​បាន​ប្តេជ្ញា​ចិត្ត «​ថ្ងៃនេះ ខ្ញុំ​មិន​ប្រើ​ថង់​ប្លា​ស្ទិ​ក​ទេ​» ។

ឯកឧត្តម​បណ្ឌិត អ៊ា​ង សុ​ផល្លែ​ត រដ្ឋមន្ត្រី​ក្រសួងបរិស្ថាន បាន​លើក​ឡើង​ថា ប្រសិនបើ សិស្ស​ម្នាក់ ឬ​គ្រូ​ម្នាក់ ក៏​ដូច​ជា​ប្រជាពលរដ្ឋ​ម្នាក់ បាន​ចូលរួម​ក្នុង​យុទ្ធនាការ​នេះ នឹង​មាន​មនុស្ស​យ៉ាង​ហោច​ណាស់​៣​នាក់​ទៀត រួម​មាន​៖ ឪពុក ម្តាយ បង ឬ​ប្អូន បាន​ចូលរួម​កាត់​បន្ថយ​ការ​ប្រើប្រាស់​ប្លា​ស្ទិ​ក​នេះ ហើយ​ដែល​ធ្វើ​ឲ្យ​ប្រជាពលរដ្ឋ ជិត​ពាក់កណ្តាល នៃ​ចំនួន​ប្រជាជន​កម្ពុជា ។

ឯក​ឧត្ត​រដ្ឋមន្ត្រី​ក្រសួងបរិស្ថាន បាន​សង្កត់ធ្ងន់​ថា យុទ្ធនាការ​កាត់​បន្ថយ​ការ​ប្រើប្រាស់​ប្លា​ស្ទិ​ក បាន​គ្រប់​ដណ្តប់​លើ​ផ្ទៃ​ប្រទេស ដែល​បង្កើន​សកម្មភាព​ចូលរួម ឲ្យ​បរិស្ថាន​ស្អាត នៅ​តាម​មូលដ្ឋាន​នានា ក្រៅពី​នៅ​តាម​សាលារៀន រោងចក្រ សហគ្រាស​ថែម​ទៀត ។

ជាមួយ​គ្នា​នោះ​ដែរ ឯកឧត្តម​បណ្ឌិត អ៊ា​ង សុ​ផល្លែ​ត បាន​បន្ថែម​ថា ជោគជ័យ នៃ​យុទ្ធនាការ​នេះ មិន​អាច​កើតឡើង​បាន​ទេ ប្រសិនបើ​គ្មាន​ការ​គាំទ្រ និង​ការ​ចូលរួម​ពី​ភាគី​ពាក់ព័ន្ធ​នានា និង​កិច្ច​ខិតខំ​ប្រឹងប្រែង​រួម​គ្នា​របស់​យើង​ម្នាក់​ៗ ដែល​មាន​គោលដៅ ចូលរួម​កែប្រែ​ឥរិយាបថ​របស់​មនុស្ស​ទាំង​ក្នុង​ជំនាន់​នេះ និង​នា​ពេល​អនាគត​ផង​ដែរ ។

ជាមួយ​គ្នា​នេះ ឯកឧត្តម​រដ្ឋមន្ត្រី បាន​សម្ដែង នូវ​ក្តី​សង្ឃឹមថា យុទ្ធនាការ «​ថ្ងៃនេះ ខ្ញុំ​មិន​ប្រើ​ថង់​ប្លា​ស្ទិ​ក​ទេ​» នឹង​ដោះស្រាយ​បញ្ហា​សំណល់​ប្លា​ស្ទិ​ក ជាមួយនឹង​សារ​ដ៏​សាមញ្ញ ប៉ុន្តែ​មាន​លក្ខណៈ​ស៊ីជម្រៅ ដែល​បាន​លើកទឹកចិត្ត​ពួក​យើង​ម្នាក់​ៗ ឲ្យ​ពិចារណា​ឡើង​វិញ នូវ​ជម្រើស និង​ទម្លាប់​ការ​រស់នៅ​ប្រចាំ​ថ្ងៃ​របស់​យើង ដោយ​ការ​បោះ​ជំហាន​យ៉ាង​សំខាន់​មួយ​ឆ្ពោះទៅ​កម្ពុជា​ស្អាត នៅ​ពេល​ខាង​មុខ ៕

អត្ថបទសរសេរ ដោយ

កែសម្រួលដោយ