ផ្លោះរបងរត់ចេញពីតុលាការខេត្តកំពង់ស្ពឺម្សិលមិញ ឥឡូវចាប់បានវិញម្នាក់ហើយ
- កំពង់ស្ពឺ
ខេត្តកំពង់ស្ពឺ ៖ ជនសង្ស័យក្នុងសំណុំរឿងព្រហ្មទណ្ឌចំនួន២នាក់ដែលបានលួចរត់គេចខ្លួនផ្លោះរបងចេញពីសាលាដំបូងខេត្តកំពង់ស្ពឺ កាលពីវេលាម៉ោងប្រមាណជា១០ព្រឹកថ្ងៃទី១៧ ខែកញ្ញា ឆ្នាំ២០២៦ ម្សិលមិញនោះ ត្រូវបានចាប់ខ្លួនម្នាក់វិញហើយ មានឈ្មោះ វ៉ាន់ វុទ្ធី ភេទប្រុស អាយុ៣១ឆ្នាំ ពាក់ព័ន្ធបទប៉ុនប៉ងលួចទ្រព្យសម្បត្តិ ។
សមត្ថកិច្ចបាននិយាយឱ្យដឹងថា កាលពីល្ងាចថ្ងៃទី១៧ ខែកញ្ញា ឆ្នាំ២០២៦ ត្រូវបានកម្លាំងសមត្ថកិច្ចនគរបាល សហការនិងតាមប្រមាញ់ចាប់បានម្នាក់មានឈ្មោះ វ៉ាន់ វុទ្ធី ភេទប្រុស អាយុ៣១ឆ្នាំ ពាក់ព័ន្ធបទប៉ុនប៉ងលួចទ្រព្យសម្បត្តិ រីឯឈ្មោះ ឡេង កែវ ភេទប្រុស អាយុ ២៧ឆ្នាំ ពាក់ព័ន្ធបទលួចសមត្ថកិច្ចកំពុងតែបន្តស្រាវជ្រាវតាមចាប់ ។
យោងតាមសេចក្តីបំភ្លឺព័ត៌មានក្រុមការងារប្រតិកម្មរហ័សនៃស្នងការដ្ឋាននគរបាលខេត្តកំពង់ស្ពឺ សូមជម្រាបសាធារណជនមេត្តាជ្រាបថា៖ ពាក់ព័ន្ធករណីជនសង្ស័យ២នាក់ ដែលបានលួចរត់ចេញពីក្នុងបរិវេណសាលាដំបូងខេត្តកំពង់ស្ពឺ នាថ្ងៃទី១៧ ខែកញ្ញា ឆ្នាំ២០២៦ ពេលសមត្ថកិច្ចនគរបាលបញ្ជូនខ្លួនទៅអយ្យការ ដើម្បីសាកសួរតាមនីតិវិធី ។
ជនសង្ស័យក្នុងសំណុំរឿងព្រហ្មទណ្ឌ២នាក់ ដែលបានរួចរត់គេចខ្លួនផ្លោះរបងចេញពីសាលាដំបូងខេត្តកំពង់ស្ពឺ កាលពីវេលាម៉ោងប្រមាណជា១០ និង០០នាទីព្រឹកថ្ងៃទី១៧ ខែកញ្ញា ឆ្នាំ២០២៦ នោះ ត្រូវបានកម្លាំងសមត្ថកិច្ចនគរបាលបានសហការ និងតាមប្រមាញ់ចាប់បានម្នាក់ក្នុងចំណោម២នាក់ ឈ្មោះ វ៉ាន់ វុទ្ធី ភេទប្រុស អាយុ៣១ឆ្នាំ ពាក់ព័ន្ធបទប៉ុនប៉ង លួចទ្រព្យសម្បត្តិ រីឯឈ្មោះ ឡេង កែវ ភេទប្រុស អាយុ២៧ឆ្នាំ ពាក់ព័ន្ធបទលួច សមត្ថកិច្ចកំពុងតែបន្តស្រាវជ្រាវតាមចាប់ ។
ជនសង្ស័យដែលបានលួចផ្លោះរបងចេញមកខាងក្រៅសាលាដំបូងខេត្ត ដោយមូលហេតុបានសុំសមត្ថកិច្ចទៅបន្ទប់ទឹក រួចបានរត់គេចខ្លួនតែម្តង ។ ជុំវិញករណីខាងលើនេះ កម្លាំងស្នងការដ្ឋាននគរបាលខេត្តកំពង់ស្ពឺ បានបើកការស្រាវជ្រាវបន្ទាន់ ដោយបានការដឹកនាំសម្របសម្រួលនីតិវិធីពីតំណាងអយ្យការ ដើម្បីពិនិត្យលើករណីនេះ ។
ជាក់ស្តែង ជនសង្ស័យដែលសមត្ថកិច្ចតាមចាប់បាន (ឈ្មោះ វ៉ាន់ វុទ្ធី) និងបញ្ជូនមកស្នងការដ្ឋាននគរបាលខេត្ត ចាត់ការបន្តតាមនីតិវិធី ។ អាស្រ័យហេតុនេះ សូមសាធារណជន និងអ្នកសារព័ត៌មាន មេត្តាទទួលជ្រាប និងជួយសហការក្នុងការផ្តល់ ព័ត៌មានជូនសមត្ថកិច្ចឈានទៅឃាត់ខ្លួន ជនសង្ស័យម្នាក់ទៀតដែលកំពុងរត់គេចខ្លួននោះយកមកផ្តន្ទាទោសតាមច្បាប់៕
ចែករំលែកព័តមាននេះ