រាជធានី​ភ្នំពេញ ៖ នាយកដ្ឋាន​ប្រឆាំង​បទល្មើស​បច្ចេកវិទ្យា ៖ បង្ក្រាប​ករណី​លួច​ចូល​គ្រប់គ្រង​គណនី​ហ្វេ​ស​ប៊ុ​ក និង​កែ​បន្លំ​ឈ្មោះ​គណនី​ធនាគារ ដើម្បី​ឆបោក​ប្រាក់​ពី​ប្រជាពលរដ្ឋ ។ នេះ​បើ​យោង​តាម​ផេ​ក នាយកដ្ឋាន​ប្រឆាំង​បទល្មើស​បច្ចេកវិទ្យា បាន​ប្រកាស​នា​ថ្ងៃ​ទី​១៧ ខែកញ្ញា​នេះ ។

នាយកដ្ឋាន​ប្រឆាំង​បទល្មើស​បច្ចេកវិទ្យា បាន​បន្ត​ថា អនុវត្ត​តាម​បទបញ្ជា​ដឹកនាំ​ដ៏​ខ្ពង់ខ្ពស់​របស់ ឯកឧត្តម នាយ​ឧត្តមសេនីយ៍ ស ថេ​ត អគ្គស្នងការ​នគរបាល​ជាតិ និង​មានការ​ចង្អុលបង្ហាញ​ផ្ទាល់​ពី ឯកឧត្តម ឧត្តមសេនីយ៍ឯក អគ្គស្នងការ​រង​នគរបាល​ជាតិ ជាមួយនឹង​ការ​ចូលរួម​សម្របសម្រួល​នីតិវិធី​ពី ឯកឧត្តម ព្រះរាជអាជ្ញា​នៃ​អយ្យការ​អម​សាលាដំបូង​រាជធានី​ភ្នំពេញ កាលពី​ថ្ងៃ​ទី​១៥ ខែកញ្ញា ឆ្នាំ​២០២៦ កម្លាំង​ជំនាញ​នៃ​នាយកដ្ឋាន​ប្រឆាំង​បទល្មើស​បច្ចេកវិទ្យា បាន​បើក​ប្រតិបត្តិការ​ស្រាវជ្រាវ និង​ឈាន​ដល់​ការ​ឃាត់ខ្លួន​ជនសង្ស័យ​ម្នាក់ ឈ្មោះ ឈ ស ម ភេទ​ប្រុស ជនជាតិ​ខ្មែរ ពាក់ព័ន្ធ​ករណី​លួច​ចូល​គ្រប់គ្រង​គណនី​ហ្វេ​ស​ប៊ុ​ក និង​កែ​បន្លំ​ឈ្មោះ​គណនី​ធនាគារ​ដើម្បី​ឆបោក​ប្រាក់ ។

តាម​ការ​ស៊ើបអង្កេត​រក​ឃើញ​ថា ជនសង្ស័យ​បាន​ប្រគល់​គណនី​ធនាគារ​ផ្ទាល់ខ្លួន ដែល​មានឈ្មោះ CHHEAN SOKMENG ឱ្យទៅ​ជនអនាមិក​ជា​ថ្នូរ​នឹង​ផលប្រយោជន៍​មួយ​ចំនួន ។ ក្រោយ​ពី​ទទួល​បាន​គណនី​ធនាគារ​របស់​ជនសង្ស័យ​ខាងលើ​មក​កាន់កាប់ ជនអនាមិក​បាន​កែ​ឈ្មោះ​គណនី​ធនាគារ​នេះ​ទៅ​ជា KORN MENGKEA by S.C លេខ 125 072 409 074 195​។ បន្ទាប់​ពី​ជនអនាមិក​បាន​ធ្វើ​សកម្មភាព​លួច​ចូល​គ្រប់គ្រង​គណនី​ហ្វេ​ស​ប៊ុ​ក​របស់​អ្នក​ដទៃ រួច​ទាក់ទង​បោក​បញ្ឆោត​យក​ប្រាក់​ពី​ជន​រង​គ្រោះជា​ច្រើន​នាក់ ដោយ​ប្រើប្រាស់​គណនី​ធន​គារ​ខាងលើ​នេះ ដើម្បី​ជា​មធ្យោបាយ​ទទួលផល​នៃ​បទល្មើស ។

នាយកដ្ឋាន​ប្រឆាំង​បទល្មើស​បច្ចេកវិទ្យា សូម​ក្រើនរំលឹក និង​អំពាវនាវ​យ៉ាង​ទទូច​ដល់​សាធារណជន​ទាំងអស់ ឱ្យ​មានការ​ប្រុង​ប្រយ័ត្ន​ខ្ពស់​ចំពោះ​ការ​លួងលោម​សន្យា​ផ្តល់​ប្រាក់​កម្រៃ ឬ​ផលប្រយោជន៍​ផ្សេង​ៗ​ពី​ជន​មិន​ស្គាល់​មុខ ដើម្បី​ជា​ថ្នូរ​នឹង​ការ​លក់​ឬ​ឱ្យ​ខ្ចី​គណនី​ធនាគារ ដោយ​អំពើ​នេះ គឺជា​ការ​សមគំនិត​ក្នុង​បទល្មើស​ឧក្រិដ្ឋ ដែល​នាំ​ឱ្យ​លោក​អ្នក​ត្រូវ​ប្រឈម​មុខ​នឹង​ការ​ផ្តន្ទាទោស​តាម​ផ្លូវច្បាប់​ជា​ធរមាន ៕