រយៈពេលជាង៣ឆ្នាំ នគរបាលអន្តរាគមន៍គ្រោះអគ្គិភ័យបានជាង៣ពាន់ករណី និងបណ្តុះបណ្តាលមន្ត្រីជាង១ម៉ឺននាក់
- ភ្នំពេញ
រាជធានីភ្នំពេញ ៖ ក្នុងរយៈពេលជាង៣ឆ្នាំ គិតចាប់ពីឆ្នាំ២០២៣ ដល់ឆមាសទី១ ឆ្នាំ២០២៦ ហេតុការណ៍អគ្គិភ័យនៅទូទាំងប្រទេសបានកើតឡើងសរុប៣.១០៣លើក ។ នេះបើតាមការឱ្យដឹងពីអ្នកនាំពាក្យរងក្រសួងមហាផ្ទៃ ។
ថ្លែងក្នុងវីដេអូសង្ខេបព័ត៌មាន កាលពីពេលថ្មីៗនេះលោក ទូច សុឃៈ អ្នកនាំពាក្យរងក្រសួងមហាផ្ទៃក្នុងនោះ កម្លាំងជំនាញនៃក្រសួងមហាផ្ទៃ បានចេញអន្តរាគមន៍ទប់ស្កាត់មិនឱ្យឆេះរាលដាលក្លាយជាមហន្តរាយធ្ងន់ធ្ងរ បានចំនួន២.០៩៣លើក ខណៈ១.០១០លើកទៀត ត្រូវបានអាជ្ញាធរមូលដ្ឋាន និងក្រុមពន្លត់អគ្គិភ័យ សហការជាមួយប្រជាពលរដ្ឋរួមគ្នាពន្លត់អគ្គិភ័យបឋមបានទាន់ពេលវេលា ។
អ្នកនាំពាក្យរងបានបញ្ជាក់ថា ក្រៅពីការងារចេញអន្តរាគមន៍ពន្លត់អគ្គិភ័យ ក្នុងរយៈពេលជិត២ឆ្នាំ ពីឆ្នាំ២០២៤ រហូតដល់ឆមាសទី១ ឆ្នាំ២០២៦ ក្រសួងមហាផ្ទៃបានបង្វឹកជំនាញបង្ការពន្លត់អគ្គិភ័យ និងសង្គ្រោះ ព្រមទាំងចេញវិញ្ញាបនបត្រដល់ក្រុមបង្ការ ពន្លត់អគ្គិភ័យកាតព្វកិច្ចសរុប១០.១៥៦នាក់ ស្មើនឹង៧០១ក្រុម លើ៣៤៥គោលដៅ ។
ក្នុងរយៈពេលដូចគ្នានោះ សមត្ថកិច្ចជំនាញក៏បានចុះពិនិត្យបច្ចេកទេស និងចេញវិញ្ញាបនបត្របញ្ជាក់គុណភាពនៃប្រព័ន្ធបង្ការ ពន្លត់អគ្គិភ័យចំនួន៥៥៣គោលដៅ ព្រមទាំងបានបន្តចុះផ្សព្វផ្សាយខ្លឹមសារអនុក្រឹត្យ និងលិខិតបទដ្ឋានគតិយុត្តពាក់ព័ន្ធនឹងការបង្ការ និងពន្លត់អគ្គិភ័យសរុប៣.១០៨គោលដៅ។
បើតាមអ្នកនាំពាក្យក្រសួងមហាផ្ទៃតែងតែបន្តពង្រឹងសមត្ថភាពមន្ត្រី និងជំរុញការអប់រំលើកកម្ពស់ការប្រុងប្រយ័ត្ន ព្រមទាំងណែនាំអំពីវិធានការបង្ការ ទប់ស្កាត់ពន្លត់អគ្គិភ័យបឋមជូនប្រជាពលរដ្ឋឱ្យកាន់តែទូលំទូលាយ ។
សូមបញ្ជាក់ថា ទន្ទឹមនឹងការងារគ្រប់គ្រងរដ្ឋបាលដែនដី ក្រសួងមហាផ្ទៃមានអគ្គស្នងការដ្ឋាននគរបាលជាតិ ជាសេនាធិការស្នូល លើការងារថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។
លើការងារអគ្គិភ័យអគ្គស្នងការមាននាយកដ្ឋានបង្ការ និងពន្លត់អគ្គិភ័យជាសេនាធិការ និងមានធនធានកម្លាំងនគរបាលជំនាញ និងរថយន្តពន្លត់អគ្គិភ័យ នៅគ្រប់ស្នងការ និងអធិ ការដ្ឋាន ។ រាល់ពេលមានករណីអគ្គិភ័យកើតឡើង កម្លាំងពន្លត់អគ្គិភ័យបានតស៊ូប្រយុទ្ធនឹងករណីនេះ ប្រកបដោយភាពអង់អាច ដើម្បីធានាសង្គ្រោះ និងការពារជនរងគ្រោះ ព្រមទាំងទប់ស្កាត់អគ្គិភ័យមិនឱ្យឆេះរាលដាលដែលបង្កមហន្តរាយធ្ងន់ធ្ងរ ៕
ចែករំលែកព័តមាននេះ