ស្លែដុះលើប្រាសាទ និងចម្លាក់ បង្កើតជាទស្សនីយភាពគាប់នេត្រា
- សៀមរាប
ខេត្តសៀមរាប ៖ ភាពអស្ចារ្យនៃ«ស្លែ» ដុះនៅលើថ្មប្រាសាទបុរាណ ធ្វើឱ្យរូបចម្លាក់ថ្មហាក់ដូចមានជីវិត ។ លក្ខណៈបែបនេះជាទស្សនីយភាពប្រណីតមួយបែបទាក់អ្នកទេសចរឱ្យទៅទស្សនាគយគន់ និងថតផ្ដិតរូបភាព ។
កាលពីថ្ងៃទី១៧ កញ្ញា ឆ្នាំ២០២៦ អាជ្ញាធរជាតិអប្សរា ពណ៌នាថា ក្នុងរដូវវស្សាដែលមាន «ស្លែ» ដុះនៅលើថ្មនៃប្រាសាទបុរាណនានា បង្កើតឱ្យឃើញពណ៌បៃតង ហាក់បីដូចជាត្បូងមរកត បានធ្វើឱ្យសម្រស់របស់ប្រាសាទស្អាតប្លែកម្យ៉ាង ក្នុងការទាក់ទាញអារម្មណ៍ និងភ្នែកអ្នកទេសចរ ដ៏គួរឱ្យចាប់ចិត្តមួយផ្នែក ។
ជារៀងរាល់ថ្ងៃ មានអ្នកទេសចរខ្លះ បានចាប់អារម្មណ៍ និងចំណាយពេលទៅទស្សនារូបចម្លាក់មួយចំនួន ដែលស្លែបានដុះរុំជិត បង្កើតឱ្យមានពណ៌បៃតង ដោយពួកគេបានថតរូបភាពយ៉ាងច្រើនទុកជាអនុស្សាវរីយ៍ ។
«ស្លែ» ដែលដុះរុំលើផ្ទាំងថ្មប្រាសាទបុរាណ មិនត្រឹមតែបង្កើតជាទស្សនីយភាពថ្មី ឱ្យមានការទាក់ទាញ និងចាប់អារម្មណ៍ប៉ុណ្ណោះទេ គឺវាថែមទាំងមានប្រយោជន៍ជាច្រើនផងដែរ ។
អ្នកជំនាញផ្នែកអភិរក្សថ្មបុរាណ បានពន្យល់ថា ស្លែធម្មជាតិ ដុះនៅលើថ្មប្រាសាទបុរាណ គឺជាប្រភពនៃភាពអស្ចារ្យ និងការពារពីកម្តៅ និងជួយបន្សុទ្ធខ្យល់ក្នុងអាកាស ។
បច្ចុប្បន្ននេះក្រុងធំៗលើពិភពលោកកំពុងបណ្ដុះស្លែដាក់ឱ្យជួយបរិស្ថានក្នុងក្រុង ។ តែយើងមានសំណាងដែលវាបានដុះរស់នៅលើថ្ម មិនថា ខែវស្សា ឬប្រាំង បើទោះរដូវប្រាំង ក៏វានៅតែដើរតួនាទីជាស្រទាប់កាត់បន្ថយកម្តៅមកលើថ្មដែរ ។
ភ្ញៀវជាតិ និងអន្តរជាតិអាចទៅទស្សនាស្លែពណ៌បៃតងខ្ចី ដុះនៅលើថ្មកំពុងជួយឱ្យរមណីយដ្ឋានអង្គរ ដែលសម្បូរដោយប្រាសាទបុរាណមានភាពទាក់ទាញ បង្កើតជាទេសភាពស្រស់បំព្រង និងមានភាពរស់រវើកក្នុងរដូវភ្លៀងនេះ ៕
ចែករំលែកព័តមាននេះ