រាជធានីភ្នំពេញ ៖ ដើម្បីចូលរួមចំណែក ក្នុងគោលនយោបាយសង្គមកិច្ចរបស់រាជរដ្ឋាភិបាលកម្ពុជា អង្គការផ្ទះបាយកុមារបាននិងកំពុងយកចិត្តទុកដាក់ចំពោះកុមារកំព្រា និងកុមារអនាថាគ្មានទីពឹង ដែលកំពុងរស់នៅក្នុងស្ថានភាពលំបាក ។
រាជធានីភ្នំពេញ ៖ ដើម្បីចូលរួមចំណែក ក្នុងគោលនយោបាយសង្គមកិច្ចរបស់រាជរដ្ឋាភិបាលកម្ពុជា អង្គការផ្ទះបាយកុមារបាននិងកំពុងយកចិត្តទុកដាក់ចំពោះកុមារកំព្រា និងកុមារអនាថាគ្មានទីពឹង ដែលកំពុងរស់នៅក្នុងស្ថានភាពលំបាក ។
ទាក់ទងនឹងគោលបំណងសកម្មភាពប្រចាំថ្ងៃរបស់អង្គការផ្ទះបាយកុមារ លោក ង៉ូវ ឈីវ ប្រធានអង្គការនេះបានឲ្យដឹងថា ជាបន្តបន្ទាប់អង្គការបានជួយផ្តល់អាហារ ជួយការពារកុមារដែលកំពុងរស់នៅតាមចិញ្ចើមថ្នល់ ឬកុមារដើររើសអេតចាយចិញ្ចឹមជីវិតនិងគ្រួសារ រួមទាំងកុមារដើរសុំទានគ្មានទីពឹង ដើម្បីឲ្យពួកគេមានអាហារហូប មានពេលសម្រាក និងមានសុវត្ថិភាពទាំងផ្នែករាងកាយ និងសុខភាព ។ ដូច្នេះហើយ ទើបយើងបង្កើតអង្គការផ្ទះបាយកុមារដើម្បីទទួលយកកុមារឲ្យមកសម្រាកនៅទីនេះក្នុងមួយថ្ងៃ២ម៉ោង និងទទួលបានការហូបចុកគ្រប់គ្រាន់ផងដែរ ។
លោក ង៉ូវ ឈីវ មានប្រសាសន៍ថា តាមរយៈអង្គការផ្ទះបាយកុមារនេះ កុមារនឹងទទួលបានផលប្រយោជន៍ជាច្រើនទៀតដូចជា សុវត្ថិភាពផ្ទាល់ខ្លួន ការរួចផុតពីការកេងប្រវ័ញ្ច គាបសង្កត់លើកម្លាំងពលកម្ម រួមទាំងទទួលបាននូវការអប់រំ ការបំពាក់បំប៉នអំពីការការពារសុខភាព និងសីលធម៌ថែមទៀត ។ ជាក់ស្តែង នៅពេលដែលកុមារមកសម្រាកក្នុងអង្គការផ្ទះបាយកុមារ ពួកគេមិនត្រឹមតែទទួលបានការហូបចុកប៉ុណ្ណោះទេ ថែមទាំងទទួលបាននូវការសម្អាតខ្លួនប្រាណដូចជាងូតទឹក កាត់ក្រចក កាត់សក់ កក់សក់ជាដើម ។ ទន្ទឹមនោះ យើងក៏បានរៀបចំកន្លែងដេកប្រកបដោយអនាម័យ កន្លែងជួបជុំ និងជជែកគ្នាលេង កន្លែងកម្សាន្ត កន្លែងអានសៀវភៅ ។ លោកបញ្ជាក់ថា ក្នុងរយៈពេលដែលកុមារបានមកសម្រាកនៅទីនេះ គឺពួកគេសុទ្ធតែទទួលនូវអារម្មណ៍ថា ទីនេះជាផ្ទះដ៏សុខសាន្តរបស់ពួកគេ ។
លោកប្រធានអង្គការបានអះអាងថា អង្គការផ្ទះបាយកុមារមិនគ្រាន់តែផ្គត់ផ្គង់ ឬផ្តល់ចំណីអាហារដល់កុមារប៉ុណ្ណោះទេ តែអង្គការនេះបានប្រមូលកុមារឱ្យចូលរួមជាសមាជិក ឬជាមហាគ្រួសារកុមារមួយប្រកបដោយសុវត្ថិភាព សុខភាព និងការអប់រំ ។ មិនតែប៉ុណ្ណោះ អង្គការផ្ទះបាយកុមារ ក៏បានរៀបចំជាកម្មវិធីដើម្បីនាំកុមារដើរទៅកម្សាន្តនៅរមណីយដ្ឋានមួយចំនួនផងដែរ ។ ការនាំដើរកម្សាន្តនោះ មិនគ្រាន់តែធ្វើឲ្យពួកគេទទួលបាននូវការសប្បាយរីករាយប៉ុណ្ណោះទេ តែអ្វីដែលពួកគេទទួលបានជាសំខាន់នោះ គឺការផ្តល់ទំនុកចិត្ត និងការកសាងជីវភាពជាបងប្អូនក្នុងមហាគ្រួសារតែមួយ ដូចកុមារដែលរស់នៅក្នុងគ្រួសារមានឪពុកម្តាយដែរ ។
អង្គការផ្ទះបាយកុមារ ត្រូវបានបង្កើតឡើងនៅថ្ងៃទី១ កុម្ភៈ ឆ្នាំ២០១០ ហើយរហូតមកដល់ពេលនេះបើគិតជាចំនួនចានអាហារដែលផ្តល់ឲ្យ
កុមារគឺមានប្រមាណ១២ម៉ឺនចានអាហារ ។ អង្គការទទួលបានកុមារក្នុងមួយថ្ងៃៗប្រមាណពី ១៥០ ទៅ២០០នាក់ចូលហូបអាហារជា
ប្រចាំ ។ ប៉ុន្តែកាលពីឆមាសទី១ ឆ្នាំ២០១២ កន្លងទៅនេះ អង្គការទទួលបានកុមារពី២៥០ ទៅ៣០០នាក់ក្នុងមួយថ្ងៃចូលហូបអាហារ និងសម្រាកក្នុងផ្ទះបាយកុមារ ។
លោកង៉ូវ ឈីវ ប្រធានអង្គការផ្ទះបាយកុមារ អះអាងថា ចាប់តាំងពីបង្កើតរហូតមកដល់ពេលនេះ អង្គការទទួលបាននូវការគាំទ្រយ៉ាងខ្លាំងពីសំណាក់ឪពុកម្តាយ និងអាណាព្យាបាលកុមារ រួមទាំងសាធារណជន និងមន្រ្តីរាជការផងដែរ។ លោកបញ្ជាក់បន្ថែមថា មូលនិធិសម្រាប់ទ្រទ្រង់សកម្មភាពអង្គការផ្ទះបាយកុមារ គឺទទួលបានពីសប្បុរសជនទាំងក្នុងស្រុក និងក្រៅស្រុក ។ ទន្ទឹមនោះ អង្គការផ្ទះបាយកុមារជាបន្តបន្ទាប់ទទួលបានការជួយឧបត្ថម្ភជាសម្ភារ ថវិកា និងស្មារតីពីលោក ឧកញ៉ា ថុង អ៊ុយប៉ាង និងលោកជំទាវ យិន ផានី្ន ផងដែរ ៕
ចែករំលែកព័តមាននេះ