ខេត្តប៉ៃលិន ៖ ក្នុងរយៈពេល២ថ្ងៃបន្តបន្ទាប់គ្នាមានបុរស២នាក់បានរងរបួសដោយសារផ្ទុះមីន ដែលម្នាក់ដើរបា.ញ់ថ្នាំស្មៅជាន់មីនផ្ទុះដាច់កែងជើង និងម្នាក់ទៀតជ្រុះកាំបិតលើដីធ្លាក់ចំគ្រាប់មីនកប់ដីបណ្តាលឱ្យផ្ទុះ ។ ក្រោយពេលកើតហេតុបុរសទាំង២នាក់ត្រូវបាននាំទៅកាន់មន្ទីរពេទ្យ ។
ខេត្តប៉ៃលិន ៖ ក្នុងរយៈពេល២ថ្ងៃបន្តបន្ទាប់គ្នាមានបុរស២នាក់បានរងរបួសដោយសារផ្ទុះមីន ដែលម្នាក់ដើរបាញ់ថ្នាំស្មៅជាន់មីនផ្ទុះដាច់កែងជើង និងម្នាក់ទៀតជ្រុះកាំបិតលើដីធ្លាក់ចំគ្រាប់មីនកប់ដីបណ្តាលឱ្យផ្ទុះ ។ ក្រោយពេលកើតហេតុបុរសទាំង២នាក់ត្រូវបាននាំទៅកាន់មន្ទីរពេទ្យ ។
ករណីទី១-កសិករម្នាក់បានរងរបួសដាច់កែងជើងខាងស្តាំ និងរបួសជើងខាងឆ្វេងស្រាលខណៈដើរបាញ់ថ្នាំស្មៅក្នុងចម្ការពោតរបស់ខ្លួន ហើយជាន់មីនប្រភេទគូទពិលមួយគ្រាប់ដែលកប់ក្នុងដីសេសសល់តាំងពីសម័យសង្គ្រាមបណ្តាលឱ្យផ្ទុះកាលពីវេលាម៉ោង៣និង១០នាទីរសៀលថ្ងៃទី១៧ សីហា នៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ។ ជនរងគ្រោះឈ្មោះស្វាយ បូវ អាយុ៤៤ឆ្នាំ ។
តាមប្រភពព័ត៌មានឱ្យដឹងថា នៅថ្ងៃកើតហេតុវេលាម៉ោង២រសៀល ជនរងគ្រោះបានយកថ្នាំបាញ់ស្មៅទៅលាយទឹកបាញ់ក្នុងចម្ការពោតចំនួន២ហិកតា ជាមួយប្រពន្ធនិងកូនប្រុសម្នាក់នៅក្បែរមាត់អូរដែលជាកន្លែងកើតហេតុ ។ លុះដល់ម៉ោងជាង៣រសៀល ខណៈកំពុងដើរបាញ់ថ្នាំនៅប្របមាត់អូរក្នុងចម្ការពោត ក៏ជាន់ទៅលើគ្រាប់មីនប្រភេទគូទពិលដែលផុសចេញពីក្នុងដី បណ្តាលឱ្យផ្ទុះឡើងដាច់កែងជើងខាងស្តាំ ។ ពេលផ្ទុះនោះប្រពន្ធនិងកូនដែលឈរនៅក្បែរមិនរងរបួសទេ និងបានហៅបងប្អូននិងអ្នកជិតខាងឱ្យមកជួយដឹកយកទៅសង្គ្រោះនៅមន្ទីរពេទ្យបង្អែកខេត្ត ។ គ្រូពេទ្យបានវះកាត់និងដេរភ្ជិតសាច់ទៅវិញ ហើយប្រាប់ថា មិនមានគ្រោះថ្នាក់ដល់អាយុជីវិតទេ តែបានដាច់និងបែកឆ្អឹងកែងជើងខាងស្តាំជា២ដែលត្រូវសម្រាកព្យាបាលរយៈពេលយូរទើបជាសះស្បើយ ។
ស្ត្រីឈ្មោះចិន ថេង អាយុ៤២ឆ្នាំ ជាប្រពន្ធជនរងគ្រោះឱ្យដឹងថា ដីចម្ការរបស់គាត់នេះ បានភ្ជួរដាំពោតអស់រយៈពេលជាច្រើនឆ្នាំមកហើយមិនដែលមានគ្រោះថ្នាក់ដោយសារគ្រាប់មីននោះទេ ។ ចំណែកប្រភពព័ត៌មានពីប្រជាពលរដ្ឋនៅក្នុងភូមិប៉ាងរលឹមឱ្យដឹងថា នៅត្រង់ម្តុំដែលជនរងគ្រោះផ្ទុះមីនដាច់ជើងនេះអាចនៅសល់គ្រាប់មីនកប់ក្នុងដីជាច្រើនគ្រាប់ទៀត ពីព្រោះជារៀងរាល់ឆ្នាំ គេតែងតែប្រទះឃើញគ្រាប់មីនមួយចំនួនផុសចេញពីក្នុងដី ខណៈដែលមានភ្លៀងខ្លាំងហូរច្រោះដីទៅក្នុងអូរ ។ ជារៀងរាល់ថ្ងៃ ពួកគាត់ដែលមានចម្ការនៅក្បែរតំបន់់នោះតែងតែព្រួយបារម្ភក្រែងមានគ្រោះថ្នាក់ដោយសារមីន ។
ករណីទី២-កសិករម្នាក់ទៀតឈ្មោះស្រែង ម៉ុន អាយុ៣៥ឆ្នាំ បានរងរបួសដោយសារគ្រាប់មីនសេសសល់ក្នុងដីចម្ការបានផ្ទុះ ខណៈគាត់នាំប្រពន្ធនិងប្អូនចំនួន៤នាក់ទៅកាប់ព្រៃចម្ការ ហើយរបូតដៃធ្លាក់កាំបិតខ្វែវទៅចំលើដីចំមីនស្គរ១គ្រាប់បណ្តាលឱ្យខ្ទាតអំបែងត្រូវរបួសមួយកំណាត់ខ្លួនផ្នែកខាងមុខឡើងលើ កាលពីវេលាម៉ោង៨និង៤០នាទីព្រឹកថ្ងៃទី១៨ សីហា នៅចម្ការក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីប្រពន្ធជនរងគ្រោះឈ្មោះតុង ណាំ អាយុ៤៧ឆ្នាំ បានឱ្យដឹងថា ដោយខ្វះដីដំាដំណាំទើបនៅមុនថ្ងៃកើតហេតុប្អូនប្រុសម្នាក់របស់គាត់បានទៅសុំឱ្យពួកគាត់មកជួយកាប់ព្រៃក្នុងចម្ការ ហើយដោយសារប្អូនរកជួលមនុស្សមិនបាននិងចង់ជួយកាប់ព្រៃឱ្យប្អូនផង ទើបនៅថ្ងៃកើតហេតុវេលាម៉ោង៧ព្រឹកពួកគាត់ទាំងពីរនាក់ប្តីប្រពន្ធ និងបងប្អូនចំនួន៤នាក់ទៀតនាំគ្នាទៅជួយកាប់ព្រៃក្នុងចម្ការប្អូនប្រុសឈ្មោះចក់ អាយុ៤១ឆ្នាំ ដែលបានទិញតពីគេតាំងពីយូរមកហើយ ។ ប្រភពបន្តទៀតថា ពួកគាត់ឈរកាប់ព្រៃនៅក្បែរៗគ្នាចម្ងាយប្រហែលជា៥ម៉ែត្រពីប្តីរបស់គាត់ លុះកាប់បានប្រហែលជាង១ម៉ោង ស្រាប់តែប្តីរបស់គាត់បានរបូតដៃធ្លាក់កាំបិតខ្វែវទៅខាងមុខ បណ្តាលឱ្យចុងកាំបិតធ្លាក់ប៉ះចំគ្រាប់មីនបណ្តាលឱ្យផ្ទុះលាន់ឮយ៉ាងខ្លាំង ។ គ្រាន់តែឮសូរផ្ទុះភ្លាម ប្អូនៗទាំង៤នាក់របស់គាត់ដែលកំពុងតែឈរកាប់ ក៏បានទម្លាក់កាំបិតចោល រួចនាំគ្នារត់ទៅមើលប្តីគាត់ដែលកំពុងតែឈរភាំងស្មារតីដោយរងរបួសផ្នែកខាងមុខចាប់ពីពាក់កណ្តាលខ្លួនឡើងទៅខាងលើ ។
គ្រូពេទ្យបានឱ្យដឹងថា ជនរងគ្រោះត្រូវបានអំបែងមីនស្គរនិងកម្ទេចដីខ្ទាតត្រូវដើមទ្រូង និងមុខរបួសធ្ងន់ ចំណែកភ្នែករបស់គាត់វិញមើលច្បាស់ស្ទុង ៗ ហើយក៏មានកម្ទេចដីតូចៗនៅជាប់នៅនឹងកែវភ្នែកផងដែរ ។ ទោះបីជាយ៉ាងនេះក្តី គ្រូពេទ្យនិងខិតខំលាងភ្នែករបស់គាត់នឹងដាក់បន្តក់ថ្នាំសាកល្បងមើល ដើម្បីពិនិត្យឱ្យដឹងថា តើអាចជាសះស្បើយមើលឃើញដូចដើមឬយ៉ាងណា ៕
ចែករំលែកព័តមាននេះ