រាជធានីភ្នំពេញ ៖ បើទោះបីជាសាលាខណ្ឌដូនពេញ ក៏ដូចជាអាជ្ញាធរសង្កាត់ ធ្វើការផ្សព្វផ្សាយឲ្យប្រជាពលរដ្ឋដែលមកកម្សាន្តតាមមាត់ទន្លេនិងរមណីយដ្ឋានត្រូវតែបោះសំរាម ក្នុងធុងសំរាមនិងការបន្ទោបង់ត្រូវចូលបន្ទប់អនាម័យក្តី ក៏នៅតែមានជនខ្វះសីលធម៌មួយចំនួនតូចលួចបន្ទោបង់តាមច្រាំងទន្លេ និងបោះចោលសំរាមពាសវាលពាសកាលធ្វើឲ្យបាត់បង់សណ្នាប់ធ្នាប់និងប៉ះពាល់
រាជធានីភ្នំពេញ ៖ បើទោះបីជាសាលាខណ្ឌដូនពេញ ក៏ដូចជាអាជ្ញាធរសង្កាត់ ធ្វើការផ្សព្វផ្សាយឲ្យប្រជាពលរដ្ឋដែលមកកម្សាន្តតាមមាត់ទន្លេនិងរមណីយដ្ឋានត្រូវតែបោះសំរាម ក្នុងធុងសំរាមនិងការបន្ទោបង់ត្រូវចូលបន្ទប់អនាម័យក្តី ក៏នៅតែមានជនខ្វះសីលធម៌មួយចំនួនតូចលួចបន្ទោបង់តាមច្រាំងទន្លេ និងបោះចោលសំរាមពាសវាលពាសកាលធ្វើឲ្យបាត់បង់សណ្នាប់ធ្នាប់និងប៉ះពាល់ដល់បរិស្ថាន។ នៅព្រឹកថ្ងៃទី១៦ សីហា លោកសុខ សម្បត្តិ អភិបាលខណ្ឌដូនពេញ ដោយមានការចូលរួមពីអភិបាលរងខណ្ឌ ចៅសង្កាត់ទាំង១១ ព្រមទាំងកម្លាំងសណ្នាប់ធ្នាប់ខណ្ឌសរុបជាង១០០នាក់ បានធ្វើអនាម័យ និងបាញ់ទឹកលាងសម្អាតច្រាំងទន្លេចាប់ពីសួនច្បារផ្សារកណ្តាលរហូតដល់វេទិកាបុណ្យអុំទូកមុខព្រះបរមរាជវាំង ។
លោកអភិបាលខណ្ឌដូនពេញមានប្រសាសន៍ថា ក្នុងមួួយសប្តាហ៍យា៉ងហោចណាស់យើងត្រូវធ្វើអនាម័យនិងបោសសម្អាតតាមមាត់ទន្លេនិងបាញ់ទឹកលាងច្រាំងទន្លេឲ្យបានមួយដងដែរ ដោយមានសង្កាត់ទាំង១១និងផ្សារ ព្រមទាំងមន្រ្តីការិយាល័យចំណុះខណ្ឌចូលរួម។ ទីក្រុងស្អាតត្រូវតែមានការរួមចំណែកពីប្រជាពលរដ្ឋ មន្រ្តីរាជការដោយមិនអាចខ្វះបាន ហើយនេះគឺជាការពញ្ញាក់មួយដើម្បីឲ្យប្រជាពលរដ្ឋមើលឃើញពីការយកចិត្តទុកដាក់របស់អាជ្ញាធរខណ្ឌនិងរាជធានីក្នុងការថែរក្សាអនាម័យបរិស្ថាន។ បន្ទាប់ពីមានគោលនយោបាយប្រឡងប្រណាំងឃើញថា មានការចូលរួមច្រើនពីប្រជាពលរដ្ឋ ក៏បុ៉ន្តែនៅមានប្រជាពលរដ្ឋមួយចំនួនតូចមិនទាន់មានការភ្ញាក់រលឹក នៅតែបោះចោលសំរាមផ្តេសផ្តាស និងមិនទាន់ញែកសំរាមឲ្យបានត្រឹមត្រូវ។
ដូច្នេះក្នុងនាមអាជ្ញាធរ លោកសូមសំណូមពរដល់ប្រជាពលរដ្ឋដែលមកដើរកម្សាន្តតាមមាត់ទន្លេក៏ដូចជារមណីយដ្ឋានទាំងអស់ មេត្តាយកសំរាមទៅដាក់ក្នុងធុងសំរាម ព្រោះបច្ចុប្បន្នធុងសំរាមបានដាក់គ្រប់ទីកន្លែង ។ បើសិនជាមិនមានការចូលរួមពីបងប្អូនប្រជាពលរដ្ឋទេ នោះទីក្រុងយើងពិតជាគ្មានអនាម័យនិងធ្វើឲ្យប៉ះពាល់ដល់បរិស្ថាន ម្យា៉ងវិញទៀតក៏ដើម្បីអបអរសាទរកិច្ចប្រជុំកំពូលអាសា៊នដែលនឹងប្រព្រឹត្តទៅនៅកំឡុងខែវិច្ឆិកា ខាងមុខដែលត្រូវតែនាំគ្នាថែរក្សាអនាម័យសណ្តាប់ធ្នាប់ឲ្យបានល្អប្រសើរ ។
លោកគឹម វុត្ថា ប្រធានផ្នែកសណ្តាប់ធ្នាប់ខណ្ឌដូនពេញនិយាយថា ជាគោលការណ៍របស់សាលារាជធានីភ្នំពេញក៏ដូចជាតាមការចង្អុលបង្ហាញរបស់លោកអភិបាលខណ្ឌដូនពេញដែរ។ លោកតែងតែដឹកនាំកម្លាំងសណ្តាប់ធ្នាប់ចុះរៀបចំសណ្តាប់ធ្នាប់តាមដងផ្លូវដែលមានម្ចាស់ហាងយកចិញ្ចើមផ្លូវដាក់តាំងទំនិញធ្វើឲ្យមានការពិបាកដល់ប្រជាពលធ្វើដំណើរ។
ជាពិសេសនោះកម្លាំងសណ្តាប់ធ្នាប់ត្រូវតែយកចិត្តទុកដាក់ក្នុងការណែនាំដល់ប្រជាពលរដ្ឋដែលមកដើរកម្សាន្តតាមរមណីយដ្ឋាននិងមុខព្រះបរមរាជវាំង កុំឲ្យចោលសំរាមលើផ្លូវសាធារណៈ ត្រូវយកសំរាមដាក់ចូលក្នុងធុងសំរាម ។ ជាមួយគ្នានេះ ផ្នែកសណ្តាប់ធ្នាប់ខណ្ឌធ្វើការបាញ់ទឹកលាងសម្អាតតាមច្រាំងទន្លេជាប្រចាំ ព្រោះមានជនខ្វះសីលធម៌មួយចំនួនតូចនៅតែលួចបន្ទោបង់តាមមាត់ច្រាំងទន្លេ បណ្តាលឲ្យមានក្លិនមិនល្អប៉ះពាល់ដល់ការដើរកម្សាន្តរបស់ភ្ញៀវអន្តរជាតិ ៕
ចែករំលែកព័តមាននេះ