រាជធានីភ្នំពេញ ៖ គណៈកម្មាធិកាអនុសាខាកាកបាទក្រហមកម្ពុជា ខណ្ឌឫស្សីកែវ រួមជាមួយសហគមន៍មូលនិធិនគរកាយវត្តព្រះពុទ្ធសាសនាកម្ពុជាកាលពីព្រឹកថ្ងៃទី៣ សីហា ឆ្នាំ២០១២ បាននាំអំណោយជាគ្រឿងឧបភោគបរិភោគ និងបច្ច័យមួយចំនួនទៅចែកជូនប្រជាពលរដ្ឋងាយរងគ្រោះដោយ
រាជធានីភ្នំពេញ ៖ គណៈកម្មាធិកាអនុសាខាកាកបាទក្រហមកម្ពុជា ខណ្ឌឫស្សីកែវ រួមជាមួយសហគមន៍មូលនិធិនគរកាយវត្តព្រះពុទ្ធសាសនាកម្ពុជាកាលពីព្រឹកថ្ងៃទី៣ សីហា ឆ្នាំ២០១២ បាននាំអំណោយជាគ្រឿងឧបភោគបរិភោគ និងបច្ច័យមួយចំនួនទៅចែកជូនប្រជាពលរដ្ឋងាយរងគ្រោះដោយផ្ទុកមេរោគអេដស៍ចំនួន១០គ្រួសាររស់នៅក្នុងមូលដ្ឋានសង្កាត់ច្រាំងចំរេះទី២ ខណ្ឌឫស្សីកែវ។ នៅក្នុងឱកាសនោះក៏មានការនិមន្ត និងអញ្ជើញចូលរួមចែកដោយផ្ទាល់ដៃពីសំណាក់ព្រះតេជគុណ សុវណ្ណ ជោតិ ឃឹម សម្បត្តិ ជាប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សីនិងលោកជា ពិសី ប្រធានគណៈកម្មាធិការកាកបាទក្រហមកម្ពុជាខណ្ឌឫស្សីកែវ ព្រមទាំងព្រះសង្ឃ និងសមាជិក សមាជិកាកាកបាទក្រហមកម្ពុជាខណ្ឌឬស្សីកែវយ៉ាងច្រើនកុះករ។
អំណោយចែកជូននាឱកាសនោះក្នុងមួយគ្រួសារទទួលបានអង្ករ២៥គីឡូក្រាម គ្រឿងឧបភោគបរិភោគ និងវត្ថុប្រើប្រាស់សរុប២២មុខព្រមទាំងថវិកា៧ម៉ឺនរៀល។ អំណោយទាំងនេះជាអំណោយរបស់កាកបាទក្រហមខណ្ឌឫស្សីកែវ។ ដោយឡែកសហគមន៍មូលនិធិនគរកាយវត្តព្រះពុទ្ធសាសនាកម្ពុជាបានជួយឧបត្ថម្ភក្នុងមួយគ្រួសារថវិកា៥ម៉ឺនរៀល អង្ករ២៥គីឡូក្រាម និងគ្រឿងឧបភោគបរិភោគមួយចំនួនទៀត។
លោកវ៉ាន ផន ចៅសង្កាត់ច្រាំងចំរេះទី២ បានឱ្យដឹងថា កន្លងមកអនុសាខាកាកបាទក្រហមខណ្ឌឫស្សីកែវ បានយកចិត្តទុកដាក់យ៉ាងខ្លាំងចំពោះប្រជាពលរដ្ឋក្រីក្រងាយរងគ្រោះក្នុងមូលដ្ឋាន ហើយបានណែនាំដល់មន្ត្រីកាកបាទក្រហមសង្កាត់ចុះស្រាវជ្រាវរកប្រជាពលរដ្ឋក្រីក្រ និងផ្ទុកមេរោគអេដស៍ដើម្បីនាំអំណោយមកចែកជូនជាបន្តបន្ទាប់ហើយលើកនេះចែកជូនដល់ប្រជាពលរដ្ឋផ្ទុកមេរោគអេដស៍ចំនួន១០គ្រួសារ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ