រាជធានីភ្នំពេញ ៖ គណៈកម្មាធិការបក្សប្រជាជនកម្ពុជា ខណ្ឌឫស្សីកែវ កាលពីរសៀលថ្ងៃទី២៦ កក្កដា ២០១២ បាននាំអំណោយទៅចែកជូនដល់ប្រជាពលរដ្ឋរងគ្រោះដោយសារអគ្គិភ័យចំនួន១៣៩គ្រួសារ ដោយអគ្គិភ័យឆាបឆេះលំនៅឋាន និងតូបផ្សារទួលសង្កែកាល
រាជធានីភ្នំពេញ ៖ គណៈកម្មាធិការបក្សប្រជាជនកម្ពុជា ខណ្ឌឫស្សីកែវ កាលពីរសៀលថ្ងៃទី២៦ កក្កដា ២០១២ បាននាំអំណោយទៅចែកជូនដល់ប្រជាពលរដ្ឋរងគ្រោះដោយសារអគ្គិភ័យចំនួន១៣៩គ្រួសារ ដោយអគ្គិភ័យឆាបឆេះលំនៅឋាន និងតូបផ្សារទួលសង្កែកាលពីរសៀលថ្ងៃទី២៣ កក្កដា នៅក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។ ពិធីនេះបានរៀបចំឡើងនៅក្នុងវត្តទួលសុវណ្ណារ៉ាម ហៅវត្តទួលសង្កែ ដោយមានការអញ្ជើញចូលរួមចែកផ្ទាល់ពីសំណាក់ លោកឃ្លាំង ហួត ប្រធានគណៈកម្មាធិការបក្សប្រជាជនកម្ពុជាខណ្ឌឫស្សីកែវ និងលោកស្រី អ៊ួង សុផល្លា ប្រធានសមាគមនារីខណ្ឌឫស្សីកែវ ព្រមទាំងមានការចូលរួមពីសមាជិក សមាជិកាបក្សយ៉ាងច្រើនកុះករ ។
អំណោយដែលនាំចែកជូនក្នុងឱកាសនោះក្នុង១គ្រួសារទទួលបានអង្ករ២០គីឡូក្រាម, មី១កេស និង៥០កញ្ចប់, ទឹកត្រី១យួរ, ទឹកស៊ីអីុវ១យួរ, ត្រីខ១យួរ (១០កំប៉ុង), សារុង១ និងថវិកា៥០.០០០រៀល ។ លោកសយ កុសល ចៅសង្កាត់ទួលសង្កែបានឱ្យដឹងថា កាលពីរសៀលថ្ងៃទី២៣ កក្កដា ២០១២ វេលាម៉ោង២និង៣០នាទីរសៀលមានអគ្គិភ័យកើតឡើងបង្កឱ្យឆាបឆេះលំនៅឋានប្រជាពលរដ្ឋចំនួន៥៧ខ្នងស្មើនឹង១៣៩គ្រួសារ ។ បន្ទាប់ពីកើតមានអគ្គិភ័យអាជ្ញាធរសង្កាត់បានយកចិត្តទុកដាក់យ៉ាងខ្លាំងចំពោះប្រជាពលរដ្ឋ និងនាំអំណោយសង្គ្រោះបន្ទាន់ទៅចែកជូនដល់ប្រជាពលរដ្ឋរងគ្រោះដើម្បីជួយសម្រួលដល់ការលំបាក ហើយរាយការណ៍ទៅគណបក្សប្រជាជនខណ្ឌឫស្សីកែវ នាំអំណោយចែកជូនបន្តទៀតនៅពេលនេះ។
លោកឃ្លាំង ហួត ប្រធានគណៈកម្មាធិការបក្សខណ្ឌឫស្សីកែវ ជំនួសមុខឱ្យក្រុមការងារគណបក្សប្រជាជនទាំងអស់សូមចូលរួមរំលែកទុក្ខជាមួយបងប្អូនរងគ្រោះទាំងអស់ ។ នេះជាគ្រោះថ្នាក់ដែលយើងទាំងអស់គ្នាមិននឹកស្មានដល់គ្មាននរណាចង់ជួបប្រទះនោះទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ