ខេត្តសៀមរាប ៖ យ៉ាងហោចណាស់ប្រជាពលរដ្ឋម្នាក់ត្រូវបានក្រុមចោរប្លន់បាញ់សម្លាប់ និង២នាក់ទៀតត្រូវរបួសបាក់ជើង ខណៈព្យាយាមរត់ចេញពីកណ្តាប់ដៃក្រុមចោរពេលចាប់ធ្វើជាចំណាប់ខ្មាំងក្នុងរង្វង់ឡោមព័ទ្ធរបស់សមត្ថកិច្ចប៉ូលិស កងរាជអាវុធហត្ថ និងកងទ័ពដែលមានចំនួនរាប់រយនាក់ ។
ខេត្តសៀមរាប ៖ យ៉ាងហោចណាស់ប្រជាពលរដ្ឋម្នាក់ត្រូវបានក្រុមចោរប្លន់បាញ់សម្លាប់ និង២នាក់ទៀតត្រូវរបួសបាក់ជើង ខណៈព្យាយាមរត់ចេញពីកណ្តាប់ដៃក្រុមចោរពេលចាប់ធ្វើជាចំណាប់ខ្មាំងក្នុងរង្វង់ឡោមព័ទ្ធរបស់សមត្ថកិច្ចប៉ូលិស កងរាជអាវុធហត្ថ និងកងទ័ពដែលមានចំនួនរាប់រយនាក់ ។ ទោះបីជាបែបណា ក្រុមចោរក្បាលរឹងក៏បានស្លាប់៣នាក់ និងម្នាក់រងរបួសធ្ងន់ពេលមានការបាញ់តដៃជាមួយកងកម្លាំងប្រដាប់អាវុធដែលព្យាយាមតាមប្រមាញ់យ៉ាងក្តៅគគុកតាំងពីវេលាថ្ងៃត្រង់ បន្ទាប់ពីការចរចាគ្នាទទួលបរាជ័យ ។ ហេតុការណ៍នេះបានកើតឡើងនៅវេលារសៀលថ្ងៃទី២៣កក្កដា នៅចំណុចកណ្តាលវាលស្រែក្នុងភូមិគោកខ្ពស់ ឃុំល្វា ស្រុកពួក ដែលមានចម្ងាយពីផ្សារពួកប្រមាណជា៦គីឡូម៉ែត្រ ។ ខាងក្រោមនេះគឺជាព័ត៌មានជំហានដំបូងនៃការពណ៌នាដោយលម្អិតជុំវិញហេតុការណ៍ដែលបានកើតឡើង ។
ចោរប្លន់អ្នកលក់មាសកណ្តាលថ្ងៃត្រង់
ចាត់ទុកថាជាអំពើប្លន់ដ៏ព្រហើនបំផុតដែលក្រុមជនសង្ស័យជាចោរប្លន់ហ៊ានធ្វើសកម្មភាពប្លន់អ្នកលក់មាស ប្តូរប្រាក់ ក្នុងផ្សារពួក ដែលស្ថិតក្នុងភូមិចំបក់ហែ ឃុំពួក ស្រុកពួក មានចម្ងាយប្រមាណ១៦គីឡូម៉ែត្រពីក្រុងសៀមរាប តាមបណ្តោយផ្លូវជាតិលេខ៦ ។ អំពើប្លន់យ៉ាងសាហាវនេះបានកើតឡើងនៅវេលាម៉ោង១២ថ្ងៃត្រង់ដោយក្រុមចោរបានចូលមកបាញ់គំរាមតែម្តងនៅតូបអ្នកលក់មាសប្តូរប្រាក់២ គឺតូបលេខ០១B ដែលមានម្ចាស់ប្តីឈ្មោះថា ប្រពន្ធឈ្មោះរៀម និងតូបលេខ០២B មានម្ចាស់ឈ្មោះម៉ន សំបុក ភេទប្រុស ។ តាមប្រភពព័ត៌មានថា ដោយសារតែមានការប្រុងប្រយ័ត្នទប់ទល់នឹងអំពើប្លន់ជាយថាហេតុ អ្នកលក់មាសបានបែងចែកវត្ថុមានតម្លៃដាច់ពីគ្នា គឺមាសបានដាក់ថង់មួយផ្សេង និងដាក់តាំងប្លាទីនក្នុងទូចាក់សោ ។ ចោរដែលចូលមកបាញ់គំរាមនោះ គឺបានទារយកសោចាក់ទូ ពេលនោះស្ត្រីអ្នកលក់មាសបានលាក់ថង់មាស និងចាក់សោទូបើកឱ្យចោរប្រមូលយកប្រាក់ និងប្លាទីន ឯតូបមួយទៀតក៏ត្រូវបានប្រមូលដូចគ្នា ។ តាមម្ចាស់តូបលេខ ០១B បានឱ្យសមត្ថកិច្ចដឹងថា គ្រឿងប្លាទីនដែលក្រុមចោរប្រមូលយកទៅនោះគិតជាប្រាក់ប្រមាណ២ម៉ឺនដុល្លារ រីឯតូបមួយទៀតមិនបានឱ្យដឹងនោះទេក្នុងពេលកើតហេតុភ្លាមៗនោះ ។
ចោរមានគ្នា៤នាក់ជិះរថយន្ត និងម៉ូតូ
តាមប្រភពព័ត៌មានបានឱ្យដឹងថា ក្រុមចោរប្លន់មានគ្នាទាំងអស់៤នាក់ប្រដាប់ដោយកាំភ្លើងអាកាកាត់ស្នូក(ច្នៃ)មួយដើមនិងកាំភ្លើងខ្លីម៉ាក កា៥៩ ចំនួន៣ដើម គឺអាវុធគ្រប់ដៃ ។ រថយន្តចោរមួយគ្រឿងនោះមា៉កកាមរី ស៊េរី១៩៩៥ ពណ៌ស្លែ និងម៉ូតូមួយគ្រឿងមិនស្គាល់ម៉ាក ។ ក្រោយពេលធ្វើសកម្មភាពហើយនោះ ក្រុមចោរបានគេចខ្លួនតាមបណ្តោយផ្លូវជាតិលេខ៦ទៅទិសខាងលិច ដោយមានការបាញ់បើកផ្លូវផងដែរ ។
សមត្ថកិច្ចតាមប្រមាញ់យ៉ាងក្តៅគគុក
អំពើប្លន់ទាំងកណ្តាលថ្ងៃត្រង់ក្នុងផ្សារពួក ហើយមានការបាញ់គំរាមពីសំណាក់ក្រុមចោរផងនោះ កម្លាំងសមត្ថកិច្ចប៉ូលិស និងកងរាជអាវុធហត្ថស្រុកពួក បានចេញសហការគ្នាភ្លាមៗផងដែរក្នុងការបង្ក្រាប ។ ក្រុមចោរបានប៉ះទង្គិចជាមួយកម្លាំងសមត្ថកិច្ចឡោមព័ទ្ធដែលនៅមិនឆ្ងាយប៉ុន្មានពីផ្សារពួក ។ កងកម្លាំងរបស់ប៉ូលិស និងកងរាជអាវុធហត្ថស្រុកពួក ត្រូវបានបន្ថែមចំនួនជាលំដាប់ដែលអង្គភាពនីមួយៗមានគ្នារាប់សិបនាក់ និងបន្តបន្ទាប់កម្លាំងយោធាក៏ចេញធ្វើប្រតិបត្តិការដែរក្នុងការបង្ក្រាបក្រុមចោរដ៏ប្រហើននេះ ។ ការព្យាយាមរត់គេចរបស់ក្រុមចោរនេះ បានធ្វើឱ្យមន្ត្រីប៉ូលិសដែលមានឋានៈជាប្រធានប៉ុស្តិ៍រដ្ឋបាលទ្រាំងត្រូវរបួសបាក់ជើងដោយការបើករថយន្តបុកពីសំណាក់ក្រុមចោរ ។
ការតាមប្រមាញ់ក្រុមចោរក្នុងរយៈពេលមួយម៉ោងក្រោយមក ក៏មានការបាញ់គ្នាមួយប្រាវទៀតនៅចំណុចភូមិរកា ឃុំល្វា ស្រុកពួក ដដែល ដោយក្រុមចោរបានបង្ខំចិត្តប្លុងរថយន្ត និងម៉ូតូចោល ហើយរត់កាត់វាលស្រែឆ្ងាយពីផ្លូវជាតិ ។
ចាប់ប្រជាពលរដ្ឋ៤នាក់ធ្វើចំណាប់ខ្មាំង
ការរត់គេចរបស់ក្រុមចោរទាំង៤នាក់នៅកណ្តាលវាលស្រែនោះដោយសារតែស្ថិតក្នុងរង្វង់ឡោមព័ន្ធរបស់កម្លាំងប៉ូលិស កងរាជអាវុធហត្ថនិងកងយោធាផងនោះ ក្រុមចោរបានចាប់ភ្ជង់ប្រជាពលរដ្ឋ៤នាក់ដែលកំពុងស្ទូងស្រូវធ្វើជាចំណាប់ខ្មាំង ធ្វើឱ្យការផ្ទុះអាវុធពីសំណាក់សមត្ថកិច្ចត្រូវបានបន្ធូរការបាញ់សំឡុត ដោយសារខ្លាចត្រូវរបួសឬស្លាប់ចំណាប់ខ្មាំងដែលគ្មានកំហុស ។ ការស្ថិតក្នុងការឡោមព័ទ្ធនេះ ក្រុមចោរប្លន់បានបាញ់សម្លាប់ចំណាប់ខ្មាំងម្នាក់ជាការគំរាមដល់កម្លាំងសមត្ថកិច្ចមិនឱ្យតាមពួកខ្លួន ។ នេះជាការអះអាងរបស់មន្ត្រីប៉ូលិសមួយរូបដែលស្ថិតក្នុងរង្វង់ប្រតិបតិ្តការដែលមានកិច្ចសហការជាមួយកងរាជអាវុធហត្ថ ចំណែកកម្លាំងយោធាបានឡោមព័ទ្ធពីខាងក្រៅ ។
ការចចារដោយក្រុមចោរទំលាក់អាវុធបរាជ័យ
ក្នុងចម្ងាយផ្លូវដែលក្រុមចោរព្យាយាមគេចខ្លួនពី២ទៅ៣គីឡូម៉ែត្រកម្លាំងសមត្ថកិច្ចបានព្យាយាមធ្វើការចរចាដោយសន្តិវិធីជាមួយក្រុមចោរទាំងនោះគឺប្រើចិត្តសាស្ត្រឱ្យមានការទម្លាក់អាវុធនិងដោះលែងចំណាប់ខ្មាំង ។ ក្រុមចោរបានចាប់យកដំបូកកណ្តាលស្រែមួយដើម្បីជាលេណដ្ឋានស្ថិតក្នុងភូមិគោកថ្មី ឃុំល្វា ស្រុកពួក។ ការព្យាយាមចរចាបានទទួលបរាជ័យ និងបានអូសបន្លាយដល់ម៉ោងប្រមាណ៣រសៀល ។
លោកអនុសេនីយ៍ឯក ទេព ពុំសែន អធិការប៉ូលិសស្រុកពួក បានឱ្យដឹងថា ការចរចាជាមួយក្រុមចោរត្រូវបរាជ័យមិនអាចប្រើចិត្តសាស្ត្រឱ្យពួកចោរទម្លាក់អាវុធបានទេ ទោះបីជាបែបណាកម្លាំងប៉ូលិសនិងកងរាជអាវុធហត្ថស្រុកបានបង្កើនចំនួនឡោមព័ទ្ធជុំជិតទាំងអស់គឺមិនអាចឱ្យចោរអាចរត់រួចឡើយ ។
ចំណាប់ខ្មាំងរត់ ចោរបាញ់រះរបួសបាក់ជើង២នាក់ ការបង្ក្រាបត្រូវបានបញ្ចប់
លោកអធិការនិយាយថា យើងពិតជាលំបាកក្នុងការប្រើកម្លាំងបង្ក្រាបក្រុមចោរនេះ ដោយសារចំណាប់ខ្មាំងស្ថិតក្នុងកណ្តាប់ដៃក្រុមចោរ ។ នៅវេលាម៉ោង៣រសៀលក្រុមចោរបានបាញ់រះអស់ជាច្រើនគ្រាប់ គឺជាការរត់គេចរបស់ចំណាប់ខ្មាំងទាំង៣នាក់ ។ ការបាញ់រះរបស់ក្រុមចោរបណ្តាលឱ្យចំណាប់ខ្មាំង២នាក់របួសបាក់ជើង ក្នុងនោះម្នាក់របួសជើងទាំង២តែម្តង ។
ដោយសារស្ថិតក្នុងស្ថានភាពរត់គេចរបស់ចំណាប់ខ្មាំង ទើបកម្លាំងសមត្ថកិច្ចធ្វើការបាញ់ស្រោចទៅលើដំបូកដែលក្រុមចោរលាក់ខ្លួន បណ្តាលឱ្យពួកចោរទាំង៤នាក់ដួលដេករដូករណែល ក្នុងនោះ៣នាក់ត្រូវស្លាប់ និងម្នាក់ទៀតរងរបួសធ្ងន់ធ្ងរ ។ លោកវរសេនីយ៍ឯក ត្រី យូរ៉ា មេបញ្ជាការកងរាជអាវុធហត្ថខេត្ត មានប្រសាសន៍ថា តាមពិតទៅកម្លាំងសមត្ថកិច្ចដែលឡោមព័ទ្ធក្រុមចោរនេះមិនមានបំណងបាញ់ប្រហារទៅលើចោរទាំងនេះទេ តែពួកគេពិតជាសាហាវពេក គឺបានបាញ់សម្លាប់ចំណាប់ខ្មាំងម្នាក់មិនញញើតដៃ ហើយបានបាញ់រះមកលើចំណាប់ខ្មាំងដែលគ្នារត់គេច មានតែបាតដៃទទេ។ មិនតែប៉ុណ្ណោះ ក្រុមចោរបានគប់គ្រាប់បែកមកលើសមត្ថកិច្ចទៀត តែសំណាងល្អគ្រាប់បែកនោះមិនផ្ទុះ ទើបសម្រេចចិត្តផ្ទុះអាវុធតែម្តង ។ នៅម៉ោងជាង៣រសៀល ប្រតិបត្តិការត្រូវបានបញ្ចប់ដោយចោរ៣នាក់ត្រូវស្លាប់ និងរបួសធ្ងន់ម្នាក់ ចំណែកប្រជាពលរដ្ឋជាចំណាប់ខ្មាំង៤នាក់ ត្រូវចោរបាញ់ស្លាប់ម្នាក់ចំក្បាល និងរបួសបាក់ជើង២នាក់ ។ ការបញ្ចប់ភាពតានតឹងរបស់ក្រុមចោរ គឺសមត្ថកិច្ចប្រើពេលវេលាតែរយៈពេល១៥នាទីប៉ុណ្ណោះ ។
វត្តមានមន្ត្រីដឹកនាំការបង្ក្រាប
ជាមួយនឹងកងកម្លាំងសមត្ថកិច្ចរាប់រយនាក់នេះ គេក៏ឃើញមានវត្តមានលោកឧត្តមសេនីយ៍ឯក ជា ម៉ន មេបញ្ជាការភូមិភាគទី៤ លោកឧត្តមសេនីយ៍ត្រី ម៉ន សាម៉ុច មេបញ្ជាការកងរាជអាវុធហត្ថខេត្ត និងលោកឧត្តមសេនីយ៍ត្រី សត ណាឌី ស្នងការប៉ូលិសខេត្ត ។ ប្រជាពលរដ្ឋដែលជាចំណាប់ខ្មាំងដែលស្លាប់យោងតាមប្រភពព័ត៌មានជំហានដំបូងគឺឈ្មោះ ក្តាន អាយុ២៤ឆ្នាំ ត្រូវចោរបាញ់ចំក្បាល ចំណែកចំណាប់ខ្មាំង២នាក់ទៀតដែលរបួសដោយចោរបាញ់រះបាក់ជើងនោះ១-ឈ្មោះ ថៃ ផេត អាយុ២៥ឆ្នាំ និងឈ្មោះស្រី ស្រឹប អាយុ៣០ឆ្នាំ ។ រីឯម្នាក់ទៀតមិនត្រូវបានស្គាល់ឈ្មោះទេ ដោយសារតក់ស្លុតលោកបានគេចខ្លួនបាត់ ។ ចំណាប់ខ្មាំងទាំង៤នាក់ជាអ្នករស់នៅភូមិរកា ឃុំល្វា ស្រុកពួក ទាំងអស់គ្នា ។ ចំពោះការរឹបអូសបានមកវិញនូវគ្រឿងអលង្ការ និងប្រាក់ដែលចោរប្លន់យកទៅនោះ មិនទាន់មានការអះអាងជាផ្លូវការពីមន្ត្រីសមត្ថកិច្ចនៅឡើយទេ ដោយគ្រាន់តែសង្ស័យថា ស្បោងខ្មៅមួយនៅចុងជើងខ្មោចចោរ ប្រហែលជាគ្រឿងអលង្ការដែលចោរប្លន់បាន ៕
ចែករំលែកព័តមាននេះ