កំពុងឈូសឆាយដីព្រៃខ្ទេចខ្ទីយកធ្វើជាកម្មសិទ្ធិ
- រតនគិរី
ខេត្តរតនគិរី ៖ ដីព្រៃរាប់រយហិកតាត្រូវបានគេប្រទះឃើញមានគ្រឿងចក្រចំនួនពីរដែលកំពុងធ្វើការឈូសឆាយផ្តួលរំលំដើមឈើធំៗដេកដួលរដូករណែលលើផ្ទៃដីដែលឈូសឆាយរួចជាអន្លើរល្វឹងល្វើយដាច់កន្ទុយភ្នែកដោយពុំមានសមត្ថកិច្ច ឬមន្ត្រីជំនាញចុះត្រួតពិនិត្យនោះទេ ។ ការប្រទះឃើញមានគ្រឿងចក្រធ្វើការឈូសឆាយនោះដែរ គឺនៅថ្ងៃទី ១៤ ខែឧសភា ឆ្នាំ ២០២៦ នៅត្រង់ចំណុច អូរខ្លែងពណ៌ ស្ថិតក្នុងភូមិ កាំបាក់ ឃុំតឺន ស្រុកកូនមុំ ខេត្តរតនគិរី ។
ក្រោយពីប្រជាពលរដ្ឋបានប្រទះឃើញមានគ្រឿងចក្រដែលឈូសឆាយដីព្រៃនោះរួចមកទំនងជាគេ (ម្ចាស់ចម្ការ) ខ្លាចប្រជាពលរដ្ឋរាយការណ៍ដល់សមត្ថកិច្ច និងមន្ត្រីជំនាញធ្វើអន្តរាគមន៍ទើបគេបញ្ជាឱ្យគ្រឿងចក្រទាំងនោះបើកបរចេញទៅចតលើដីចម្ការអ្នកផ្សេងនៅក្បែនោះ ជាបណ្តោះអាសន្ន គឺទៅពួនសិន ។
ប្រភពពីប្រជាពលរដ្ឋបានបង្ហើបថា ដីព្រៃដែលមានគ្រឿងចក្រធ្វើការឈូសឆាយនោះស្ទើរពេញមួយរដូវប្រាំងទៅហើយ ហើយម្ចាស់ដីឈ្មោះ វណ្ណា ជាមន្ត្រីប៉េអឹមស្រុកកូនមុំ ខេត្តរតនគិរី ដែលកំពុងកាប់រានដីព្រៃ យកធ្វើជាកម្មសិទ្ធិរាប់សិបហិកតាឯណោះ ។ ទោះជាយ៉ាងណា មិនអាចសុំការបំភ្លឺពីលោកវណ្ណា បានទេ ម្សិលមិញនេះ ព្រោះទូរស័ព្ទក្រៅតំបន់សេវារហូត ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ