ខេត្តកំពង់ចាម ៖ ប្រជាពលរដ្ឋបានត្អូញត្អែពិបាកឆ្លងកាណូតដរទទឹងនៅភូមិស្វាយស្រណោះទី១ ឃុំរកាអា ស្រុកកងមាស ។ ដោយមិនបានឆ្លងពីត្រើយកងមាសឆ្ពោះទៅកាន់ព្រែកពោធិ៍កាត់ទទឹងទន្លេមេគង្គឆ្ពោះទៅស្រុកស្រីសន្ធរ ជាច្រើនថ្ងៃមកហើយដោយមិនដឹងមូលហេតុច្បាស់លាស់ បើសិនមួយខូច ម៉េចមិនរកមួយទៀតជំនួស…
ខេត្តកំពង់ចាម ៖ ប្រជាពលរដ្ឋបានត្អូញត្អែពិបាកឆ្លងកាណូតដរទទឹងនៅភូមិស្វាយស្រណោះទី១ ឃុំរកាអា ស្រុកកងមាស ។ ដោយមិនបានឆ្លងពីត្រើយកងមាសឆ្ពោះទៅកាន់ព្រែកពោធិ៍កាត់ទទឹងទន្លេមេគង្គឆ្ពោះទៅស្រុកស្រីសន្ធរ ជាច្រើនថ្ងៃមកហើយដោយមិនដឹងមូលហេតុច្បាស់លាស់ បើសិនមួយខូច ម៉េចមិនរកមួយទៀតជំនួស ?
អ៊ំស្រីម្នាក់អាយុជាង ៦០ឆ្នាំរស់នៅភូមិស្វាយស្រណោះទី ១ បានប្រាប់ឲ្យដឹងនាល្ងាចថ្ងៃទី ១៨ ឧសភា ឆ្នាំ ២០២៦ ថា កាលពីមុនមកកំពុងដរស្វាយស្រណោះនេះតែងតែមានប្រជាពលរដ្ឋធ្វើដំណើរដោយមធ្យោបាយកង់ និងម៉ូតូ ឆ្លងទៅឆ្លងមកពីកងមាសទៅព្រែកពោធិ៍ និងពីព្រៃកពោធិ៍មកកងមាស ទាំងព្រឹកទាំងល្ងាច ។ តែមួយរយៈចុងក្រោយនេះកំពុងដរនេះឃើញប្រជាពលរដ្ឋមកចាំពេលខ្លះអង្គុយពីរម៉ោងមិនឃើញកាណូតឆ្លងមក ហើយពួកគាត់រងចាំយូរពេកបានបង្ខំចិត្តជិះម៉ូតូទៅឆ្លងនៅកន្លែងផ្សេងទៀត ។
អ៊ំស្រីអាយុជាង ៦០ឆ្នាំរូបនេះបានរៀបរាប់បន្តឲ្យដឹងទៀតថា ជាធម្មតាបងប្អូនប្រជាជននៅស្វាយស្រណោះដាំដុះបន្លែបង្ការបានដោយដឹកតាមកង់ ឬម៉ូតូដើម្បីឆ្លងដរ យកទៅលក់នៅព្រែកពោធិ៍ ស្រុកស្រីសន្ធរ គ្រាន់នឹងបានលុយដោះស្រាយជីវភាពគ្រួសាររីឯអ្នកនៅព្រែកពោធិ៍ក៏បានយកផលិតផលផ្សេងៗមកលក់នៅក្នុងស្រុកកងមាសផងដែរ ។ មិនថារដូវប្រាំងឬវស្សានោះទេឱ្យតែបងប្អូនពលរដ្ឋណាម្នាក់មានជំងឺឬចង់ពិនិត្យសុខភាពត្រូវជិះកាណូតកំពង់ដរស្វាយស្រណោះ ដើម្បីឆ្លងទៅកាន់ព្រែកពោធិ៍ខ្លះមានលុយទៅពេទ្យឯកជននិងពេទ្យរដ្ឋក៏មាន ។
អ៊ំស្រីបានលើកឡើងទៀតថា មិនដឹងជាមូលហេតុអ្វីនោះទេបានជាកាណូតឆ្លងកាត់ទទឹងទន្លេមេគង្គនៅស្វាយស្រណោះមិនបានឃើញឆ្លងជាច្រើនថ្ងៃមកហើយ ដោយធ្វើឲ្យពលរដ្ឋដែលគ្នាមានជំងឺត្រូវទៅពិនិត្យសុខភាពឬព្យាបាលនៅព្រែកពោធិ៍ត្រូវជួបការលំបាកមិនមានមធ្យោបាយឆ្លងទន្លេដោយរងចាំកាណូតចេះតែបាត់ទៅៗមកដល់ពេលនេះរយៈពេលអាចលើសពី ១០ថ្ងៃហើយ ។
លោក ភោគ សាវុធ អភិបាលស្រុកកងមាស បានប្រាប់តាមទូរសព្ទឱ្យដឹងដែរថា កំពុងដកស្វាយស្រណោះនេះត្រូវបានវិនិយោគឲ្យក្រុមហ៊ុនឯកជនមួយដែលមានបុរសម្នាក់ឈ្មោះ ម៉ាប់ រយៈពេលជិត២០ឆ្នាំ ហើយនៅឆ្នាំ ២០២៨ នេះនឹងដាច់អាណត្តិ ។ លោកអភិបាលស្រុក បានពន្យល់ពីមូលហេតុដែលកាណូតមិនបានឆ្លងដោយសារតែខូចត្រូវយកទៅជួសជុលរយៈពេលមួយខែទើបរួចរាល់ ។
ប្រជាពលរដ្ឋក្នុងមូលដ្ឋានភូមិស្វាយស្រណោះ ឃុំរកាអា ស្រុកកងមាស បានលើកឡើងថា បើកាណូតសម្រាប់ឆ្លងទៅវិញទៅមកខូចគួរណាតែម្ចាស់វិនិយោគរកកាណូតផ្សេងទៀតមកឆ្លង ដើម្បីដឹកប្រជាពលរដ្ឋ ព្រោះថា រាល់ថ្ងៃអ្នកនៅស្វាយស្រណោះនិងតាមបណ្ដាភូមិផ្សេងទៀតត្រូវទៅរកសេវាសុខាភិបាលនិងវិស័យផ្សេងៗត្រូវជួបការលំបាក ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ