ខេត្តបាត់ដំបង ៖ ក្រុមក្មេងលាយឡំជាមួយនឹងចាស់អន្ធពាលសរុបចំនួន០៤នាក់ ដែលដេញវាយនិងគប់ដោយដុំថ្មទៅលើបុរសម្នាក់ផ្អើលកណ្ដាលរាត្រីនៅស្រុកសង្កែ ត្រូវបានកម្លាំងអធិការស្រុកនេះធ្វើការស្រាវជ្រាវតាមចាប់ខ្លួនបានចំនួន០៣នាក់ហើយ កាលពីរសៀលថ្ងៃទី១៨ ឧសភា តែនៅសល់មេខ្លោងម្នាក់ទៀត ដែលកំពុងរត់ចោលស្រុក ។…
ខេត្តបាត់ដំបង ៖ ក្រុមក្មេងលាយឡំជាមួយនឹងចាស់អន្ធពាលសរុបចំនួន០៤នាក់ ដែលដេញវាយនិងគប់ដោយដុំថ្មទៅលើបុរសម្នាក់ផ្អើលកណ្ដាលរាត្រីនៅស្រុកសង្កែ ត្រូវបានកម្លាំងអធិការស្រុកនេះធ្វើការស្រាវជ្រាវតាមចាប់ខ្លួនបានចំនួន០៣នាក់ហើយ កាលពីរសៀលថ្ងៃទី១៨ ឧសភា តែនៅសល់មេខ្លោងម្នាក់ទៀត ដែលកំពុងរត់ចោលស្រុក ។ នេះបើតាមការផ្ដល់ព័ត៌មានពីមន្ត្រីជំនាញ ។
តាមរយៈរបាយការណ៍ អធិការស្រុកសង្កែ លោក យុត តុងហូ បានឲ្យដឹងថា នៅក្នុងករណីអំពើហិង្សាដ៏កំរោលនេះ ភាគីបង្កមានបក្ខពួកចំនួន០៤នាក់ បានព្រូតគ្នាជិះម៉ូតូតាមដេញវាយផង និងយកដុំថ្មដេញគប់ផងទៅលើជនរងគ្រោះម្នាក់ឈ្មោះ ឈិន សឿម ភេទប្រុស អាយុ២២ឆ្នាំ នៅភូមិកំពង់ឆ្លង ឃុំវត្តតាមិម ស្រុកសង្កែ ដែលព្យាយាមរត់យ៉ាងត្រដាបត្រដួស ដើម្បីគេចពីហ្វូងចចក ដែលកំពុងតាមប្រមាញ់យ៉ាងប្រកិតពីក្រោយ ។
ឈិន សឿម ដែលអះអាងថា ខ្លួនជាជនរងគ្រោះ ត្រូវសមត្ថកិច្ចពិនិត្យឃើញមានស្នាមរបួសជាច្រើនកន្លែងនៅលើខ្លួន ។ ជនសង្ស័យចំនួន០៣នាក់ ក្នុងចំណោម០៤នាក់ដែលត្រូវឃាត់ខ្លួនរួមមាន៖ ១-ឈ្មោះ លី ឈុនលេង ភេទប្រុស អាយុ៤០ឆ្នាំ (ចាស់ពាល) នៅភូមិបោះពោធិ៍ ឃុំអូរដំបង១ ស្រុកសង្កែ ២-ឈ្មោះ អ៊ីន រ៉សា ភេទប្រុស អាយុ២០ឆ្នាំ នៅភូមិកំពង់ពិល ឃុំវត្តតាមិម ស្រុកសង្កែ និង៣-ឈ្មោះ ឃា សុខឡេង ភេទប្រុសអាយុ៣២ឆ្នាំ នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។ ប៉ុន្តែរត់គេចខ្លួនម្នាក់ដែលជាមេខ្លោង តែមន្ត្រីជំនាញបានស្គាល់សាវតាហើយ កំពុងតាមចាប់ខ្លួន ។
គេមិនបានបញ្ជាក់ពីដើមចម ដែលនាំឲ្យក្រុមជនពាលក្មេងចាស់នេះ ព្រូតដេញវាយជនរងគ្រោះទេ ។ ប៉ុន្តែបើតាមរបាយការណ៍អធិការស្រុកសង្កែបានបញ្ជាក់ថា មេខ្លោងម្នាក់ ដែលកំពុងរត់ចោលស្រុក ជាអ្នកនាំអាទិ៍បង្កហិង្សាទៅលើជនរងគ្រោះ ។ នេះជាចម្លើយជន០៣នាក់ ដែលជាប់ខ្នោះ បានឆ្លើយដាក់បន្ទុកទៅលើបក្ខពួកដែលរត់គេចខ្លួន ។
យ៉ាងណាក្ដី លោក យុត តុងហូ អធិការស្រុកសង្កែ បានបញ្ជាក់ថា ពេលនេះ មន្ត្រីជំនាញបាននិងកំពុងកសាងសំណុំរឿង ដើម្បីចាត់ការតាមនីតិវិធីហើយ ៕
ចែករំលែកព័តមាននេះ